اے وھد ءَ زورگیریں اِستان ءَ بلوچ سرڈگار ءِ وارس بلوچ راج ءَ را گرانیں جاورانی دیمپان کرتگ ، اگاں کجا بلوچے ھست گُڈّا زورگیریں استان ءَ پہ ھمائی زندگی ابید ازاب ءَ ھچ پشت نہ گیتکگ ءُ بلوچ راج ماں وتی ھنکین ءِ سر ءَ ھر پیمیں گم ءُ رنجانی دیمپان اِنت۔۔
ھاسکن۔!
دوھزار نوزدہ ءَ پُنو ءِ کیچ ءَ آس پیلوشتگ، رنجیت سنگھ ءِ ناجائزیں اولاداں پہ بلوچستان پہ بلوچاں جھنم جوڑ کرتگ ءُ لھتیں انچیں ٹوھیں ویل ماں کیچ ءَ دیم ءَ اتکگ کہ پورائیں بنی آدم ءِ ٹوھیں جیڑھے ءُ سک ءَ ناوشیں ویل زانگ بنت، چہ ھمے جیڑھاں تیوگیں بنی آدم ءَ را ازیت رس اتگ۔۔
چوشکہ” برمشُل ءِ مکھیں مات "بی بی ملک ناز ءِ کوش ۔۔! ماں تمپ ءِ دَمگ دَازن ءَ "بی بی کُلسوم ءِ دلسوزیں کوش۔!!
آئی چُکانی دیم ءَ نیم شپی پاس ءَ آیگ ءُ مات ئِے ھلار کنگ۔!!
بلوچ ءِ نامیں اکسکار(آرٹسٹ) ” بانک شاھینہ شاھیں ءِ کوش ۔!!
کراچی شھدربرجاہ ءِ نودربر ھیات بلوچ ءِ کوش ۔!
کہ مات ءُ پِت ءِ چَمّانی دیم ءَ لشکری کاینت ءُ چُک ءَ ئِے لَٹ دے اَنت، رند ءَ مات ءِ سریگ ءَ زُور اَنت چَمّاں ئِے بند اَنت ءُ لھتیں گام دیم ءَ بَر اَنت ئِے کسان سالیں ھیات جان ءِ نازُرکیں دلبند ءَ وتی تُپنگ دار اَنت ءُ رکبارے تیر ماں دلبد ءَ آس ئِے دے اَنت ۔۔
ھمے پیم ءَ زالبولانی اُکبالانی پھازوکیں باسک بانُک تئیبہ بلوچ ءِ آریپیں پِت بلوچی زبان ءِ گُشندہ "واجہ ھنیپ چمرُوک ءَ ماں کلب ءِ توک ءَ آیگ ءُ تیرگواری ءُ شھید کنگ۔!
ھمے درستیں ویلانی پُشت ءَ بلوچ وتن ءِ وارساں ھوار ماں جھان ءِ کُنڈاں ترندیں زھرشانی کتگ ءُ اِستان ءِ رستریں ءُ بے سریں کارپد سک ڈوبارگ بیتگ اَنت۔۔۔ـ
وھدیکہ تاکشان ءِ بیست رمس ءَ دوھزار بیست ءَ بلوچ راج ءَ انچیں ٹپے جتگ دژمناں کدی پہ درمان دراہ نہ بیت، بلوچ ءِ مزن بالاد ءُ لاڑوکیں دُتگ ءُ راجی رھشون بانک کریمہ بلوچ ءِ ماں کینیڈا ءِ دَمگ ٹورینٹو ءَ کوش ءِ ویل ءِ دیم آیگ ءَ چہ پد تیوگیں بلوچ راج ءَ را سِیرین پروش کرتگ ءُ اے راجی جنز ءِ واستا مزنیں تاوانے زانگ بیت ،اے وھد ءَ ماں جھان ءِ کُنڈ کُنڈ ءَ ترندیں زھرشانی بوگ ءَ اَنت، بلوچ راج پُرسیگ ءُ سیاھیں روچانی دیمپان اِنت ـ
جُستے۔۔؟؟
چِہ آواران ءِ دمگ جاہ آھو ءِ کلیں مردماں شما زاناں بلوچ سرڈگار وارس نہ اِت۔۔؟
اے زلم ءُ زورکی شمئے ھند ءُ دمگ بوگ ءَ نہ اَنت ۔۔؟
دراہ بوگ ءَ اَنت سرجھل کنگ پہ زندگیں راجاں بژنی گپّے زانگ بیت، ھود ءَ وَ آجوئی ءِ جنگ شَرّیں وڑے ءَ بوگ ءَ اِنت، شھیدانی گُڈی وابجاہ ءُ بیگواھیں پُسگ میتگ پہ میتگ کوہ ءُ کوچگ ءَ ھست ءُ ساڑی اَنت، چہ استان ءِ لشکر ءِ زوراکیاں لَڈاتگیں مھلوک ھالیگیں لوگ ءُ ھر روچیگیں لشکرکشی ھمے گواھی دے اَنت، جاہ آھو ھم چہ زیبائیں بلوچستان ءَ جتا نہ انت۔۔۔ ـ
سرجھلی ءُ چَمّ جھلی چَم جلاں مراد بات اِنت
سربرز ءُ بلند بات اَنت سربرز ءُ بلندانی ـ
مراد ساھر ـ
آجوئی ءِ گلانی زرمُبش بلوچ سرڈگار ءَ ھوار جاہ آھو ءَ ھرکسی گوشاں کپتگ ـ بی این ایم ءُ بی ایس او آزاد ءِ اڑ داتگیں مراگش۔!
رھشونانی گُشتانک کہ ھر کس ءَ اُشکتگ اَنت۔۔ ـ
شیریں ءُ پرھاد ءِ مھر ءُ مھبت ءِ کسہ ءُ گُڈی وابجاہ۔!آواران ءِ دَمگ جاہ آھو ءَ مزنیں شانے پیشدار اِیت ، ماں ھپتاد ءُ سے ءَ گوں استان ءِ لشکر ءَ سرمچنڈانی جنگجاہ کہ ماں کوہ دُمگ ءُ جھل جاہ آھو مَجد ءِ کوہ ءِ کوھنیں دگ ءِ سر ءِ سنگرانی چیدگ کہ انگت مِک انت۔۔
بی این ایم ءِ سروک چیرمین ھلیل بلوچ، شھید ڈاکٹرمنان بلوچ شھید اُستاد اَلی جان ءُ زاھد کرد ءِ راجکاری ءِمُھکمیں بنجل۔۔!
ڈاکٹر منان جان پوسٹ (نوکری) ماں بگاڑی زیلگ جاہ آھو ءَ بوتگ، آئی مھر ءُ نزدیکی گوں کوہ ءُ کوچگ ءِ ھَمک کماش ءُ پیرزال ءُ ورنایاں ءُ آئی ءِ پُرمھریں بچکند ءُ ٹھکانی توار کہ جاہ آھو پُرنور کرتگ اَت۔۔۔! ـ
اُستاد الی جان گوں ھمراھاں میتگ پہ میتگ تر ءُ تاب ءُ سرپدی دیگ ءِ گواھی ءَ دے انت، سور ءُ پُرسانی پتر ۔!
،”رزا جھانگیر ءِ ءُ بانُک کریمہ بلوچ ءِ پادانی رند پد ماں جاہ آھو ءِ دلبند ءَ انگت ھست اَنت،”بانُک کریمہ ءِ جاہ آھو آیگ ھَمُک مردم ءَ شَرّ گیر کیت، "وت ءُ پرزانہ مجید”گوں یک براتے ءِ ھمراھی ءَ چہ شھر ءَ اتک اَنت ءُ "اُستاد شھید الی جان بلوچ چِل ءُ پرس ءِ مراگش ءَ بھر زورگ ءُ تلو ءِ سر ءَ” ڈاکٹر منان جان، "چیرمین زاھد کرد، "رزاجھانگیر، "پرزانہ مجید ءُ "بانک کریمہ ءُ "چیرمین کمال ھور نشتگ اَت اَنت، وتی گُشتانکانی نوبت ءِ ودار ءَ ات انت، اے مراگش ءَ تیوگیں جاہ آھو ءِ مردماں بَھر زُرتگ اَت، وانگجاہ ءِ چار دیوال تہ ءَ مردماناں جاہ نیست اَت، وانگجاہ ءِ کوٹیانی سر ءَ ورنا نشتگ اِت اَنت، ءُ رھشونانی ھبراں ماں جوانی ءَ گوشدارگ ءُ چاپانی توار ءَ وانگجاہ ءِکوٹیانی دیوال جکسگ ءَ اِت اَنت۔۔۔ ـ
تاں اے وھد ءَ جاہ آھو ءِ پیسریگیں شھیداناں” جنگولیں اتا ء ھَریں سمالانی ءِ گوں ھمراھاں بزان اھمد برامی ءِ نوزدہ سد ھپتاد ءُ سے شھیداناں پد ۔۔۔
جاہ آھو ءِ راجی جُنز ءِ تہ ءَ نوکیں شھید "ناکو ھیربکش ءُ اُستاد الی جان بلوچ اِت اَنت، نوں جاہ آھو ءِ میتگ پہ میتگ کوچگ ءُ کوھاں شھیدانی گڈی وابجاہ گندگ ءَ کاینت ءُ شھیدانی مزنیں لَڑے ھست۔۔ ـ
وھدیکہ بانُک کریمہ اھمد برامی ءِ شھید” مات پیراڈی ءُ سومری ءِ پُشتپدانی گندگ ءَ ءُ پُرس ءِ پتر ءَ ماں جَکی ءَ وتی نازرکیں پاداں ایر کنت،
"میر رھیم ءِ گور ءَ روت،” ڈاکٹر منان جان” بانک کریمہ بلوچ ءُ ایدگہ راجی رھشوناں۔۔۔
دُمگ ءُ اھمد برامی ءِ شھیدانی ارماں گون اَت اَنت۔۔
چی کن ئے۔۔؟
"میر رھیم ء چُوٹک ءَ وتی مات ءُ لوگ بانک ءِ دردناکیں کوش کہ دو زال پہ تُن گژن ءِ سوب ءَ شھید بوتگ اَنت ءُ کُنٹ اِش ھم دست ءَ اِش نہ کپتگ اَنت۔۔،
بَلے!
رھیم بکش ءَ بلوچی گیرت ءَ ایمان ءُ ھاٹیگ ءَ چہ”شھید اتاء ھَریں ،شھید مھبت، شھیدموسیٰ، شھید ھسن ءِ شھید سومری، شھیدپیڑاڈی ءُ ایدگہ شھیدانی چہ شھیدی ءَ پد یلداتگ اَت ءُ لگوری ءِ چادر اِش وت ءَ مانپوش اِتگ اَت۔۔۔
بھادریں "نیک مھمد ءَ سرکار ءَ لھتیں سال پیسر جنائینت، پرچاکہ ھپتاد ءُ سے ءِ جنگاں اتاء سمالانی ءِ جنگولیں سنگتے نیک مھمد بوتگ اَت ءُ مولابکش ءَ مات ءِ ءُ بلُک ءِ ھون بھا زُرتگ اَت ءُ وت ءَ چیریں اداھارانی کارمند پدر ئِے کُت۔۔ـ
راجی آجوئی ءِ گل” بلوچ نیشنل موومنٹ ءُ بلوچ نودربر گل، بلوچ اسٹوڈنٹس آرگنائزیشن آزاد ءِ راجی رھشوناں ھاسکن "ڈاکٹرمنان جان گوں وتی ھمکوپگیں سنگتاں راجی آجوئی ءِ کلوہ جاہ آھو ھمَک دَوَار ءَ سر کتگ اَت ءُ چہ پھوال دِھکان ،پوریاگیر ءُ ھالم دین ھور زندمان ءِ ھمک پڑ ءُ ھمک دیدانکی مردماں رسینتگ اِش ، گوں ھرکس ءَ نشتگ ءُ آجوئی ءِ بنگپ ءِ سر ءَ دیوان کرت اِش۔۔۔
بانُک کریمہ ءَ را گوں بلوچ ءِ وتن ءَ ءُ بزّگیں راج ءَ انچیں مھر بوتگ کہ آ را ڈیھ ءِ یاتاں نندگ ءَ نہ اشتگ۔
مھر ءِ بابت ءَ چُش گوش اَنت، مات ءَ را پہ چُک ءَ دومی جاہ ءَ گُش اَنت، شپ پہ جنگولاں مھروانیں ماتے،ماں مڑاھانی دَور ءَ چہ دژمناں رکینت ءُ وتی دلبند ءَ ءُ گرمیں امبازاں زُورت ءُ دژمن کور بیت ۔۔ـ
گڑا من ھمے گُش آں، شھید بانُک کریمہ بلوچ جھان ءِ پہ ایردستیں راجاں مزنیں رھشونے اَت، بلوچ راج ءِ مکھیں مات اَت، بیست ءُ یکمی کرن ءِ تہ ءَ مزن نامیں جوانیں زالبولے اَت،دوھزار پانزدہ ءِ بی بی سی ءِ سروے رد ءَ ماں جھان ءِ سد پُرمڑاھیں زالبولانی تہ ءَ بانک ھم ھساب بیتگ اَت ءُ چہ آئی جُتائی ءَ بلوچ راج چہ یک بھادر ءُ زانتکاریں رھشونے زِبھر بوت، بلوچ راجدپتر ءِ اولی بلوچ زالبول اِنت کہ راجی پُر آشوبیں دَور ءَ سروکے بوتگ بزان بی ایس او (آزاد) ءِ سرکماش (چیرپرسن) بوتگ ءُ آئی ءِ جُتائی ءَ مرچی ھمَک زھگ ءُ زالبول پیر ءُ کماش ایندگہ بلوچ دردیگ اَنت چَمّ اِش ارسیگ اَنت ۔۔۔۔ـ
