دومی بَھر
ھبکّہ ءُ چیرڈاھی: ماں چیرجنگ ءَ زورانسریں دژمن باید انت تئی ھند ءُ بُنجل ءِ بارہ ءَ ھچبر سھیگ مہ بیت بلے تو آئی ءِ ھر ھند ءُ بُنجل ءَ وَ سھیگ بِہ بَہ ئے پمیشکا دژمن ءِ سر ءَ ھبکّھیں اُرُشانی کنگ ءَ آئی ءِ کِرّ ءُ کشاں وتی راجی دوزواھیں سنگتانی چیرڈاھواں بہ دار کہ دژمن ءِ جنگی تیاری ءِ بارہ ءَ چیرجنگولاں وھد ءِ سر ءَ ڈاہ بہ رس ایت۔ اگاں تئی جریدہ کتگیں اُرُشانی مراسا ءِ ھال پاشک بوت انت گُڑا چیرجنگول وتی اُرُش ءَ زیت بدل کن اَنت۔ چوناھیگا چہ ھمے راج ءِ دوزواھیں چیرڈاھوانی ڈاہ دیگ ءَ چیرجنگولاں سما بیت کہ راجی چیرجنگ ءِ گل ءِ لاپ ءَ راجدْروہ مان اَنت یا اِنّاں۔ پمیشکا پہ دژمن ءِ اندری ھال ءُ اھوال، دژمن ءِ جنگی مراسانی بارہ ءَ زانگ ءُ دژمن ءِ سِرسُر ءِ ھالانی درگیجگ ءَ چیرڈاھی سک زلوری انت کہ تو دژمن ءِ سر ءَ ایمنی ءَ ھبکھیں اُرُشاں بُنگیج کُت کن ئے۔ چوناھیگا اگاں زیردستیں راج ءِ لس مھلوک ءِ تہ ءَ راجی گلامی ءِ مارشت ھست انت گُڑا چیرجنگولاں چیرڈاھی برجاہ دارگ ءُ دژمن ءِ سر ءَ ھبکھیں اُرشانی کنگ سَک آسان بیت ءُ چریشی ءَ دژمن وت ءَ را وت درآمدیگے زان ایت ءُ زیت پْروش وارت پمیشکا باید اِنت گُلامیں راج ءَ وتی گلامی ءِ مارشت ءُ راجی آجوئی جُنز ءِ بابت ءَ سرپدی اَلمی اِنت۔
گوں راج ءِ اُلس ءَ ھمگرنچی: ماں چیرجنگی جُنز ءَ گوں راج ءِ لس مھلوک ءَ رھوت دارگ ءُ ھمگرنچ بیگ سَک زلوری انت انچو گْوش ئے اُلس راجی چیرجنگیں جُنز ءِ زِرد(دل) انت۔ اگاں دژمن راج ءِ سر ءَ زُلم ءُ زوراکی کنت گُڑا باید انت کہ راجی چیرجنگول گوں آئی ءَ رھوت بہ دار اَنت گُڑا دلجمی ءَ بزان کہ راجی جُھد سد در سد سوبین بیت چی ءَ کہ چہ ھمے زیردستیں مھلوک ءَ ترا ھبکھیں اُرُشانی آسر کنگ ءَ پناہ رس ایت، سپر ءِ ساھت ءَ ترا نگن ءُ ورگے دے انت، بزاں چہ دژمن ءَ چیرڈاھی، زری کُمک، سامان ءُ ورناھیں باسکانی ماں جنگ ءَ ھوار بیگ دْراہ چہ لس مھلوک ءَ کیت۔ ھمے لس مھلوک چیرجنگولانی ھک ءَ زھرشانی ءِ روانکاں کش انت ءُ راج ءِ تہ ءَ راجی جُھد ءِ سرپدی ءُ آگاھی یے ودی کن انت۔ وھدیکہ راج ءِ لس مھلوک ءَ راجی آشوب ءُ راجی مارشتانی سما بیت ءُ راجی جُنز ءِ گیشتر آگاھی یے ودی بوت گُڑا بزاں تئی جُھد شریں نیمگے ءَ روگ اَنت ءُ تو سوبین بہ ئے۔ اگاں راج چہ راجی جنگولاں دلپروش بیتگ گُڑا اے جُھد یک پَکّیں بے سوبی یے۔ گُڑا باید انت کہ چیرجنگول وتی راج ءَ رھوت بہ دار ایت ءُ ھیالداری کنت کہ ھمے رھوت دژمن ءِ گوشاں ھلوت مہ بنت انچوشکہ چریشی ءَ راج ءِ لس مھلوک گِرانیں اندوھے ءِ آماچ بیت بزاں راجی چیرجنگول لس مھلوک ءَ ھچبر وتی ھلاپ ءَ مہ کنت۔چیرجنگولیں گل ءُ آئی ءِ باسکانی اولی زمہ وار ھمیش بہ بیت کہ چہ زورانسر ءِ بندیگاھاں لٹ شاپ وارتگیں مردماں وتی چیرجنگولی گل ءَ ھوار کنائین اَنت۔ دومی ھما راج ءِ ورنا کہ راجی چیرجنگولانی کُمک ءَ کنگ ءَ انت آیانی رازاں ھچ جاہ پاشک مہ کن انت بزاں وتی جِند ءِ باسکاں ھم سما مہ بیت چی ءَ کہ گوں چُشیں کنوگیاں راج ءِ مھلوک چہ راجی جنگولاں بیزار بنت ءُ وتی راجی جُھد ءَ دلپروش بنت۔
تْراکانی تُرس ءُ بیم ءِ کارمرزی: چیرجنگ ءَ دژمن ءِ شھرانی تہ ءَ دژمن ءِ بلاھیں ترامگیجانی سر ءَ بمب تْراک کارمرز اَلم بہ بنت کہ تئی جُھد ءُ تئی جیڑہ میان اُستمانی رسانکدر ءُ جھان ءِ مُلکانی دیم ءَ بئیت چریشی ءَ دژمن ءِ راج وتی راجداری ءَ تْراکانی سوب ءَ ھم جُست بہ کنت۔ البت بلاھیں پائدگ ئِے ایش انت کہ چَہ چُشیں تْراکاں دژمن ءِ دژمناں تئی بامردی ءِ سما بیت ءُ گُڑا توری زری ءُ توری جنگی سامان ءُ ازباب یا دگہ کُمکے تئی چیرجنگیں جُھد ءَ بیت تئی ھر وڑیں کُمک ءَ کیت ءُ ساڑی بیت انچوشکہ ماں چیرجنگ ءَ ڈن مُلکی کُمک سَک زلوری انت۔ انچوشکہ میان اُستمانی ڈِپلومیسی ءِ دستورے کہ دژمن ءِ دژمن منی دوست اِنت(اینمی آپ دی اینمی از مائی پرینڈ) ءُ بلاھیں پائدگ ایش انت ئِے کہ چیرجنگ ءِ باسک ءُ راج ءِ تہ ءَ ھاٹیگے ودی بیت۔ تئی چَپیں گَل بے وانک بنت۔ چُشیں بمب ترکائی ءَ ماں دژمنیں مُلک ءَ میان اُستمانی ڈنی واپار(پوران انویسٹمنٹ) نئیت، دژمنیں مُلک ءَ بے پوریاگِری یے ودی بیت ءُ جاور ئِے نگیگ بنت۔
بلے دلگوش بِہ بَہ ایں کہ دژمن ءِ سر ءَ ھمے بمب تْراکائی تئی جِند ءِ زیردستیں مُچی ئیں شھرانی لاپ ءَ مہ بنت کہ چریں تْرکانی زَد ءَ تئی راج ءِ بزگیں لھس مھلوک ءَ بیرانی یے بیت ءُ راج ءِ تہ ءَ تئی ھلاپ ءَ زھرے ودی بیت بلکیں تْراک دژمن ءِ جِند شھرانی تہ ءَ ترامگیجانی سر ءَ بہ بنت کہ ترامگیج ءِ باسکاں بیرانی بیت۔ ھیالداری بیت کہ اگاں دژمن ءِ بے گناھیں لس مھلوک چہ تْراکاں کُشگ بیتگ گُڑا میان اُستمانی راجانی تہ ءَ ترا بد چارگ بیت ءُ تئی لابی ابرمی نزور تر ایت۔
کوہ ءُ گیابان: چَہ بازیں تندجاہ ءُ وانگیاں نبشتہ انت کہ زیردستیں راجاں وتی راجی چیرجنگی جُنز ءِ سکین ءَ آئی ڈیھ ءِ زیبائی وت دنت۔ اگاں تئی ڈیھ ءَ بلاھیں کوہ ءُ گیابان ھست انت گُڑا بزان تو تھنا ءُ بے وارس نہ ئے۔ درآمدیگی زورانسریں دژمن زیردستیں راج ءِ بزگیں لس مھلوک ءَ چہ وتی لٹ شاپی، گار ءُ بیگواہ کنگ، کُشگ ءُ دور دیگ ءُ وڑ وڑیں ناروائیں زورانسری ءِ آسر ءَ وت چیرجنگی ءَ بے وس کنت ءُ راج ءِ ورنائیں راجی بامرد دیم پہ کوہ ءُ گیاباناں روان کن انت ءُ راجی جُھد ءَ ھوار بنت ءُ گل ءَ بز کن انت گُڑا ھمے دژمن ءِ پْروش ورگ ءِ اولی یکیں نشانی یے کہ بزگیں اُلس ءِ سر ءَ زلم ءُ کھر کنگ ءَ بندات کنت ءُ چریشی ءَ راج ءِ تہ ءَ گلامی ءِ مارشت ودی بنت۔ انچوشکہ 1971 ءَ گوں بنگالیاں بوتگ چہ ھمے آکبت ءَ دْراھیں بنگالی مُکتیبانی ءِ چیرجنگ ءَ ھوار بیتگ انت ءُ زورانسر ءَ پْروش داتگ۔ کوہ ءُ گیابان ترا پہ لِکّگ ءَ سک کُمک کن انت دژمن ءِ سر ءَ ھبکّہ ءُ بے گمانی اُرُشاں پیلو کنگ ءَ ترا باز جْوانیں وڑے ءَ ھمکوپگ بنت، تو ڈیھ ءِ کوہ ءُ لداں جْوان سوھو بہ ئے، شپانک ءُ دیر میتگانی راج ءِ مھلوک ترا ھال ءُ اھوال دنت بلے درآمدیگیں دژمن مُدام چہ کاسگ چٹّاں وازمند انت چمیشکا کوہ ءُ گیان راجی جُنز ءِ یک ٹوھیں بھرے ۔
ڈنّ مُلکانی زری، سیاسی، جنگی کُمکّ ءُ بُنجل: ھر وڑیں چیرجنگاں ڈنّی مُلکانی کُمکّ سک زلوری اِنت اے کُمکّ توری جنگی ساز ءُ سامان ءِ مُپت ءَ دیگ ءِ بہ بیت، توری نوکدربریں چیرجنگولاں نوکیں سِلاھانی گُلینگ ءِ دربری کنگ بِہ بیت، توری چیرجنگ ءِ بلاھیں رھشون ءُ آئی کھول ءَ ھند، بُنجل زَری کُمک دیگ بہ بیت یا توری میان اُستمانی مُچیانی تہ ءَ زیردستیں راج ءِ راجی آجوئی ءِ ھک ءَ گپ کنگ ءِ بہ بیت اے دْراہ چیرجنگ ءُ راجانی آجوئی ءَ کار دے اَنت۔ اگاں جنگانی تہ ءَ جنگی رھشون شھید کنگ بنت گُڑا پلّہ مُرزی ئیں مُلک چیرجنگولانی پلّہ مُرزی ءَ جارکشی کنت ءُ دژمن ءِ زورانسری ءَ پِٹ دنت۔ چریشی ءَ راجی جیڑہ ماں میان اُستمانی رسانکدراں ھر وھد ءَ نوکیں باوستے زور ایت ءُ میان اُستمانی راجانی گل یو این ءُ دگریں ترامگیجاں جنگی اندوہ دلگوش کنگ بیت چریشی ءَ جیڑہ گیشتر ھاٹیگ زور ایت۔ گُڑا بہ زان کہ زیردستی ءِ نادْراھی پہ میان اُستمانی بنی آدم ءِ ھکانی ترامگیج ءَ یک ٹوھیں جیڑھے بیت کہ توجیلّے دربگیج ایت ئِے۔ پمیشکا ھر راج ءِ راجی سیاسی جُھدکارانی ڈُبہ ءُ زمہ واری بیت کہ پہ وتی راجی چیرجنگولانی سوبین بوگ ءِ ھاتر ءَ ڈنی ملکی کُمکاں بہ درگیج اَنت۔
چوناھیگا سیاسی جُھدکاراں پہ وتی راجی چیرجنگولاں اے وڑیں آسراتی چہ دژمن ءِ دژمن ءَ سَک آسانی رس انت۔ انچوشکہ بنگلہ دیش ءِ مُکتیبانی ءَ پاکستان ءِ ھلاپ ءَ ھندوستان ءِ بلاھیں کُمکے گون بوتگ، ھمے داب ءَ اوگانستان ءِ مُجاھدیناں سوت یونین ءِ بگیری ءَ امریکہ، سھودی، چین ءُ پاکستان ءِ ھر وڑیں کُمک گون بوتگ انت، پد ءَ اولی ھلیج یا گلپ وار ءَ کُرد پشمرگا ءِ چیرجنگولاں ایراک سرکار ءِ ھلاپ ءَ امریکہ ءُ سھودی ءِ ھر وڑیں جنگی کُمک گون بوتگ، ھمے داب ءَ ھستیں وھد ءَ یمنی ھوتی چیرجنگولاں سھودی اَرب ءِ سرکماشی ءَ اَرب کولیشن پورس ءِ ھلاپ ءَ ایران، تُرکی ءُ کتر ءِ کُمک گون انت۔
البت چیرجنگ راجی آجوئی ءِ یک سرپدی ءُ آگاھی یے کہ راج ءَ وتی راجی مارشت ءُ راجی جُھد ءِ سرپدی بہ بیت لھم لھم ءَ چیرجنگ دژمن ءَ ژند ءُ پند کنت ءُ زورانسر ءِ دژمن راجی دژمن ءِ سر ءَ جنگ بُنگیج کنت ءُ دوئیں راج وتی راج ءِ ٹوھیں سیتاں پیلو کن انت انچوشکہ ھندوستان ءَ 1971 ءَ چہ مُکتیبانی ءِ کُمک کنگ ءَ گوں پاکستان دو ونڈ ئِے کتگ چی ءَ کہ چریشی ءَ دوئیں ھندوستان ءُ بنگالہ دیش ءِ پائدگ اَت۔ ھمے داب ءَ امریکہ 1991-92 ھلیج جنگ ءَ کُرد پشمرگا ءِ کُمک کت ءُ ایراکی سدام ھُسن ءِ ھلاپ ءَ چہ جنگ آسانی ءَ باج ئِے بُرتگ ءُ چریشی ءَ دوئیں کُرد ءُ امریکہ وتی راجی سیت پیلو کت انت۔ بزاں اگاں تئی دژمن ءِ سر ءَ یک بلاھیں جنگی اندوھے آتک گُڑا تو سد در سد آجو بہ ئے بلے گوں اے بَے ءَ کہ تو وتی زیردستیں راج ءَ مُدام راجی جُنزاں آگاہ ءُ سرپد بہ دار کہ راج ءِ لس مھلوک ءِ تہ گلامی ءِ مارشت ءُ راجی آجوئی ءِ جزبگ زندگ انت۔۔۔۔۔۔
روان اِنت۔۔۔۔
