شھید کمانڈر مھم جان پنام بابادرویش ءِ نام ءَ – شیھک شاہ

تئی ھمراھی ءِ گیر اَنت
من ءَ آرام ءَ ھچ نئیل اَنت
زھیراں بےکساس زُرتگ
تئی اکس کُڈک ءَ درتکگ
تئی بیراں گِراں مھم جان
منی نوں ھمسفر دلجان
گُناگار من نباں واللہ
نوں بدواہاں جناں اللہ
رواں دیم ءَ پہ بِسم اللہ
منی بیلاں مدت اللہ
نوں رکست اِت شُما بیلاں
من بدواہاں بد اِیں نیلاں
من کوہ ءُ جنگل ءَ ویلاں
من ءَ مھم جان ءِ زھیر نیلاں
من زامُران ءَ جناں پند آں
من گریوان ءُ من بچکند آں
من راہ ءُ راھسراں نِند آں
وتی مھم جان ءَ من گِند آں
نہ لوٹاں بان ءُ بادگیراں
من ءَ زُرتگ تئی گیراں
تئی یاتاں گوں دزگیراں
وتی ورناھی ءَ پیراں
گِراں مھم جان تئی بیراں
من کوہانی وتی شوانگ
نباں لوگ ءَ وتی پانگ
وتی ڈیھ ءَ پہ دیوانگ
من ءَ نئیل اَنت تئ ترانگ
یل ءَ دے شیھک تو بان ءَ
برو کوہ ءَ پہ مھم جان ءَ
وتی بیلانی دیوان ءَ
بہ گرد ءُ کوہ ءُ گیابان ءَ
سلام اِنت پھر ءُ تئی شان ءَ
سلام اِنت پھر ءُ تئی شان ءَ