تپاکی ….. میجر مجید

آجوئی ءَ چون گر ئے تاں تپاک نہ بہ ئے
منزل ءَ چون رس یے تاں تپاک نہ بہ ئے
مِھر، دوستی ءُ تپاکی سوبمندی ءِ مستاگ اِنت
چون استاراں گْورامباز کن ئے تاں تپاک نہ بہ ئے
دژمن ءِ سوبمندی اِنت تئی بھر ءُ بانگ
تاں کینگ ءِ جَلھار ءَ جُش ئے تپاک نہ بہ ئے
سیاہ ءُ اسپیت، زات ءُ زریات زئیاں درکپ
چوں تو پْروش ئے دھر ءِ پِر ئوناں تاں تپاک نہ بہ ئے
تاں شَگرب ءُ مَگرب بلوچ یک مہ بیت
چوں دژمن ءَ ایردست کن ئے تاں تپاک نہ بہ ئے
رھدبر ءُ رھشون ءِ پنت شونداتے
رُنگراھاں بیگْواہ بہ ئے تاں تپاک نہ بہ ئے
زگریں ھوناں شھیدانی وتی مُزرو کن
پُھل ءِ سَرات ءَ چون گْوز ئے تاں تپاک نہ بہ ئے
لال ءُ گَوھریں پنتاں شھیدانی وتی باور کن
جَنگ ءَ تو نہ کٹّ ئے تاں تپاک نہ بہ ئے
وت بْرات ءَ مہ ڈوبار ءُ مہ سِند چہ وت دِیر
باسک ءَ کہ وتی وت پْروش ئے تپاک نہ بہ ئے
ھاتر ءَ راج ءِ تئی اکِلاں زَھر ءِ پیالہ وارتگ
تاں کہ سُکرات نہ بہ ئے تپاک نہ بہ ئے
منزل شھیداں زَھمانی زِھاں ساسارتگ
زگریں ھونانی وپادار نہ بہ ئے تپاک نہ بہ ئے
تئی چیدگیں ننگ ءُ نمُوس دژمن ءَ پادمال کُت
تاں کمبر ءُ سبزیں سگار نہ بہ ئے تپاک نہ بہ ئے
تئی زِرزمیں زمزیلاں پتاتگ ڈُنگاں
تاں ھمل ء جیئند نہ بہ ئے تپاک نہ بہ ئے
پاد ءَ ھوناں ھمرنگ اِنت تئی ماتیں زمین
ھوناں گوں وتی ھوناں نہ شود ئے تپاک نہ بہ ئے
جُھدانی پڑ ءَ بورتاچی ءَ پِڑ سک پْراہ اِنت
تاں یکّے دومی ءَ نہ وان ئے تپاک نہ بہ ئے
چار چار ھشت ءِ مسیتاں پْروشان کن
تاں جُمہ ءِ نماز ءَ یکجاہ نہ وان ئے تپاک نہ بہ ئے
جی منی مات ءُ گْوھاراں شیرزالیں
تاں کہ روزاتون کمال نہ بہ ئے تپاک نہ بہ ئے
گُرکاں شنگینتگ تئی ھارمَلّیں رمگ
تاں بُزگل ءِ شپانک نہ بہ ئے تپاک نہ بہ ئے