نہ مُرتگ ئے تو زندگ ئے
او مات دروریں گْوھار
مِرَگ و پَتَّرا نہ اِنت او بانڑی ئیں شیر زال
نہ پِگرءَ تئیگءَ کُشت کنت
زمانگءِ ھدائی ءِ اے زُلم ءُ زور
کئی اے ناتوانیں ھاٹی ءِ مَجال
کجا اے کُشت کنت ترا بدیں لگور
تو زندگ ئے تئی پِگر زندگ اِنت دلاں
بلوچے دانکہ مان ایت ماں اے زیدءُ سُرمگیں ڈلاں
شپانک دانکہ ملما بنت۔ گوں نَلاں
داں سرزمینءِ دامنءَ بلوچی پَشک پوش بیت
داں کاڑے چَنڈی کُنلاں
تو در نَیا ئے چہ دلاں
بِگِر داں مَندءُ زامُران
داں آپریچ اِنت مَکُّران
داں گْوادرءُ بلیدہءَ داں کولواہءِ کھچراں
تئی یات انگہ زندگ اَنت
شَمءِ تلاریں سینگءَ
دلانی پہ زرینگءَ
نہ مُرتگ ئے تو زندگ ئے
داں سرزمینءِ دامنءَ مَرِی یے تاب دنت بروت
داں بگٹیءُ داں ھست ھوت
داں رِند چاکری کن اَنت
داں جھاڑو یے پہ کول بیت
مَں سرزمینءَ جنتیں
داں جمبیت ھَشّے سرشپاں
داں پیر زالے جنت سوت
پہ نام ءَ شَر ءُ گَندگ ءِ
نہ مُرتگ ئے تو زِندگ ئے
او مات دروریں گُھار
