راج ءِ مکہیں شیرِزال
بام ءِ درپشناکیں استال
حق ءُ راستی ءِ منوگر
پرسیگ انت توار ءُ زیمر
بیوانکاں تیاب نیلیں زّر
نالاں انت کپوت تلانی
آہ ءُ زاری انت چوریگاں
بازار تیوگیں موتکیگاں
آسے کہ دلاں مان کپتہ
مارا تئی روئگ گران کپتہ
ارسانی رگاماں گورتہ
آہے کہ دلاں سنگرتہ
کوش ءَ گریوگءُ پریاتیں
موتکانی لڑے بنداتیں
شنگ ات میتگاں شومیں ہال
بام ءِ درپشناکیں استال
است ئے ءُ ابدمان ئے تو
راج ءِ دپتر ءَ مان ئے تو
دانکہ یک بلوچے مانیت
جیڑیت ءُ تئی نام ءَ گیپت
گرانیں ساہتاں گوازین ات
بیا ات بانک ءَ نازین ات
بانور انت وتئی پہ ڈیھ ءَ
سہریں ادلساں مانپوشیت
شانے پہ شہادت نوشیت
ڑیھ ءَ پہ وتی ساہے دنت
مارا پہ روئگ راہے دنت
ہرکس کیت گوں جنزاں بیت
دیم پہ منزل ءُ منگیر ءَ
شال ءَ تاں بگر ملیر ءَ
تمپ ءَ تربت ءَ یا مند ءَ
بیدئے پرشتگیں بچکند ءَ
بیدئے گریوگ ءُ پریات ءَ
لاڈیں پہ گہار ءُ مات ءَ
راج ءِ بانک ءَ سر داتہ
نیکہ سرزمین بکشاتہ
جوریں دژمنانی دست ءَ
استان مردگیں مردگ بات
فکر تئی دائما زندگ بات
رہشونیں کریمہ ماتیں
دروت پہ جنزگاں تئی باتیں
