سوسنیں چاگرد …. میجر مجید

Ehsaas Welfare Organization
Ost Welfare Organization
Special Person Organization
School For All Welfare Organizations Society
Gulzar Welfare Society
Sangat Foundation
ءِ نام ءَ
آ مرد کہ زیر اَنت اگدواں
نَے مُرتگ اَنت نَے زندگ اَنت
چہ پرداں ٹک ءُ بولک جوڑ بنت ، چہ ٹک ءُ بولکاں کوم ءُ راج جوڑ بنت۔ چہ کوم ءُ راجاں گلزمین ءُ ملک ءُ وتن جوڑ بنت۔ کومانی یا راجانی وتی چاگرد بنت۔ سوسنیں چاگرد راج ءِ دیمروی ءِ مانزمان اِنت۔ سماج یا دودمان یا چاگرد کہ نادْراہ نابود ءُ زدگ ءُ زانبل بہ بنت۔ گُڑا سرجمیں راج بے سوب ءُ نابود بیت۔ ھمے داب ءَ کہ یک کومے ءِ واست ءَ زمین ءُ زمان ءُ دود ءُ ربیدگ الّمی اِنت۔ ھمے وڑ ءَ سوسنیں چاگرد ھم المی اِنت۔ چاگردی نزوری راج ءِ نزوری اِنت۔ زندگیں راجانی چاگردی جھدکار راج ءَ چہ سلکاریان، نزوریاں ردیاں پلگار اِیت۔ راج زند ءِ ھر ھما تک ءُ پھنات ءَ کہ نادْراھیانی آماچ اَنت ۔ ھما نادراھیانی توجیل کار چاگردی جھدکار انت۔ بلوچ گْوش اِیت۔
برات وتی برات ءِ
زاتگیں گوک اِنت
زندگیں راجانی اندر ءَ چاگردی جھدکارانی بلاھیں بستارے۔ ءُ دنیا ءِ ھر ھما زندگیں ءُ سرپدیں راج کہ ھست اَنت۔ آ راجانی اندر ءَ چاگردی جھدکار ھم ھست اِنت۔ بلوچ راج چوناھا بازیں اڑ ءُ جنجالاں دچار اِنت۔ پرچا کہ بلوچ ءَ دوزواہ ءُ واھند نیست۔ بلوچ ءِ دوست کم اَنت دژمن سک باز اَنت۔ اے جاورھالانی دْرچ ءَ چاگردی جھدکارانی کار ستا کرز اَنت۔ اے ھما انسانی جھد اِنت کہ اے جھد ءِ اندر ءَ کس ءَ زاتی تما نیست۔ ھر جھدے کنت انسانیت ءِ ھاتر ءَ کنت۔ انسانیت چہ ھر چیز ءَ بالاتر اِنت۔ دین ءُ مزھب، زات ءُ زریات سیاست دوستاں چیزے چاگردی گل جوڑ کتگ کہ اشانی مول ءُ مراد انسانی ھزمت اِنت۔ اے بلاھیں جوانیں کارستے۔ وتی چاگرد ءِ ھزمت وتی کوم ءُ راج ءِ داد رسی زندگیں راجانی چیدگ اِنت۔ بلوچ گْوش اِیت۔
آ کہ پہ وت ءَ ریشے نہ بیت
پہ دگر ءَ بروت نہ بیت
بلے چاگردی جھد ءِ دیمروی ءِ ھاتر ءَ چاگرد ءِ لس مھلوک ءِ ھوار بیگ الّمی اِنت۔ تاں لس مھلوک ھوار نہ بیت جھد سک گْران بیت۔ ھر کس وتی گشاد ءَ ھر کس وتی واک ءَ۔ بلوچ گْوش اِیت۔
ھشتر وتی بار ءَ وت بارت
بلے جی ءُ جان لوٹ اِیت
من سرپد باں کہ اے ورنایانی جھد بے مٹ ءُ بے درور اِنت۔ اے دابیں گل وھداں بلوچ راج ءِ اندر ءَ نہ بیتگ بلے زانت سما ءُ سسّا ءِ دیمروی گوں اے دابیں گل مروچی جوڑینت ءُ سک شر کار ءَ اَنت۔ بازیں نزوریں مردمانی داد رس بیتگ۔ باید ایش اِنت کہ گیش چہ گیش بلوچ اے گلانی باسک جوڑ بہ بنت۔ ھر یکے وتی وس ءُ واک ءَ اے گلّانی مدت ءُ کمک ءَ اکلاکی پلّامرزی ءَ بہ کنت اِنت۔ ایشاں یک کسانیں وھدے ءَ سک باز دیمروی کتگ۔ مبازیں گریب ءُ نیزگارانی الاج ءُ داد رس کتگ۔ مئے ملک ءَ انچیں نادْراہ سک باز اِنت کہ وتی الاج ءَ وت کت نہ کن اَنت۔ بلوچ گْوش اِیت
جان پہ جان اوشت اِت
جامگ درے جان ءَ اوست اِت
انچوش کہ شما زانت کہ یک مردمے ءِ الاج دگہ دو مردم ءِ ھمراھی الّمی اِنت تاں کہ نادْراہ ءِ چست ءُ ایر کنگ مشکل مہ بیت۔
نی سے مردم چہ کلبر ءَ یا تگران ءَ یا چہ دشت ءُ نگور ءَ جاہ نہ بیت پہ وتی الاج ءَ کراچی ءَ بہ روت چوشیں گریب سک باز اِنت کہ اے ھرچ ءُ درچ ءَ پوہ بیت مہ کنت۔ گُڑا ھمے چاگردی گل پرے کار ءَ لانک بند اَنت۔ اے گلانی واکدار وت چشیں ھزگار نہ اَنت کہ وت اے کار ءَ کت بہ کن اَنت۔ ایشاں راج ءِ کمک لوٹ اِیت۔ راج کہ پرے کاراں تپاک ءُ یکجاہ کہ بیت اے کار آسان بنت۔ اے گلاں تنی وھدے وت ءَ را ایمبولینس (Ambulance) بزاں کہ نادْراہ کَش گاڑی ھم نیست تاں کہ ایشانی کار ارزان تر بہ بیت کہ ابید نادْراہ کش گاڑی ءَ سپر کت نہ کنت۔ کم چہ کم ھر یک گلی یے ءَ دو دونادْراہ کش گاڑی بہ بیت۔ بلوچ بلاھیں راجے اگاں وتی دستاں ھوار بہ کن اَنت اے نادْراہ کش گاڑیانی بھا زیرگ ارزان اِنت۔ کوم ءَ زور مان کوم کہ یکجاہ بہ بیت جھد بہ کنت باز جوانیں کار کت کنت۔ بلے تپاکی الّمی اِنت۔ بلوچ راجی کواس ءُ شھلچّہ کار ملا پازل گْوش اِیت
گوں دلی بیلاں کہ بز ءُ سیاھی زیاد بیت
ماں ھزارانی تورواں سیاہ مار ساد بیت
مھر ءُ دوستی ءُ تپاک یکجاہ بیت
پلیں مستاگے ماں بشارتّاں گْواہ بیت
ما ءُ شما کُل سرپدیںاے گلاں سرکاری کمک ھچ گون نیست۔ اگاں کمکے ھست گڑا بلوچ راج اِنت۔ یک وھدے سرکار ءَ ھمے گلانی لھتیں اگدہ دار گپت ءُ بند کت اَنت ءُ پد ءَ یلہ کت اَنت۔ چوش کہ ملا لیاکت ولی، مھمد جان دشتی، ابدلھکیم وپا، ءُ دگہ لھتین ورنا کپ پد ءَ یلہ کت اَنت۔ ایشانی گناہ ءُ میار ءَ تاں روچ ء مرچی کس سرپد نہ اِنت۔ بلے پہ سرکار ءِ بیھاراں اے ورنایاں توبہ نہ کُت ءُ لگور نہ بیت اَنت پد ء۔ ھما داب ءَ وتی جھد اِش برجاہ داشت۔ اے واست ءَ گپت اَنت کہ شما پرچا بلوچ داد رسی ءَ کن اِت۔ اے سرکار چوں پرے کاراں کمک کنت۔ اے دھر ءِ ھاکمانی نزّ ءَ بلوچ ء، داد رسی بلاھیں گناھے۔
من برے برے سک پدرد باں ھمے چاگردی گل وت ماں وت ءَ کاٹ ءُ واٹ اَنت اد ءَ مردم سک بژنیگ بیت۔ شمئے لوٹ یک شمئے جھد یک شمئے ھدپ یک، ٹارگٹ یک، شمئے مول ءُ مراد یک۔ چے ءَ وت ماں وت ءَ کاٹ ءُ واٹ کن اِت۔ شما باید اِنت وت ماں وت ءَ تپاک بہ بہ اِت۔ یکے دومی مدت ءُ کمک ءَ بہ کن اِت۔ داں کہ شمئے جھد دیمروی بہ کنت۔ من گوں ھمے گلانی سرکامش ءُ سرھیلاں دزبندی کناں شما اے درگت ءَ چار ءُ گزار بہ کن اِت۔ وتی اگدہ دار ءُ باسکاں کڈن بہ کن اِت۔ کہ وت ماں وت ءَ کاٹ ءُ واٹ مہ کن اَنت۔ پرچا کہ لس مھلوک چہ شما دلپروش بیت۔ شمئے ڈونر ھمے مھلوک اِنت۔ شمارا مالی کمک ءِ سک زرورت اِنت۔ بلوچ گْوش ا،یت
آ کار ءَ کہ زر نہ کنت
ھچ مردم ئِے شر نہ کنت
بلوچ ورنا ءُ کماش ءُ لس ملوک باید اِنت کہ اے گلانی مدت کمک ءَ بہ کن اَنت اد ءَ منی مول ءُ مُراد بس مالی کمک نہ اِنت بلے اگاں مالی کمک کت کنت باز جوان اِنت۔ مالی کمک ءِ ھمراھی ءَ گوں اکلاکی کمک ھم المی اِنت۔ اے گلانی دلبڈی کنگ بزاں بلوچ راج ءِ دلبڈی اِنت۔ اے ورنا پہ بلوچ ءَ کار ءَ اَنت۔
راج ءِ دلبڈی ھم بلاھیں بستارے دار اِیت الّمی نہ اِنت کہ ھر کس زر بہ دنت ھما کہ زر دات کنت دنت بلے دلبڈی دیگ ءَ کس بھیل مہ بیت۔
گڈ سر ءَ من اے کلیں واکدار ءُ باسکانی پرے کار ءِ دیم ءَ برگ ءِ ھاتر ءَ مبارکی دیاں۔ شمئے جھد نمیران اِنت۔ شما بلوچ راج دپتر ءِ بھر اِت۔
شُمئے جھد سلامت بات
دژمن بے سوب بات
سید ھاشمی گْوش اِیت
بے پتّی ءُ بے سنّتی ءِ ھیل ءُ تب ءَ پْروش
توجیلے بہ کن پْرشتگیں باسکاں وتی تیمار
بوھیریں تپاکی ءِ گھیں سندلے امباز
تو سستگیں دستونک نہ ئے سنگ اِتگیں شار