من چو مُدامیگیں وڑ ءَ کہ سُھب ءِ سر ءَ مھلہ چہ واب ءَ پاد اتک آں گُڑا اول وت ءَ گوں کِتابے ءَ دلگوش کُت ، منی دزرس ءَ شرپ شاد ءِ رجانک کُتگیں پرانس الجھیزر ءِ نامداریں لبزانکار ءُ کواس ، شھزانت ءُ گِدارنویس ، تاکار البرٹ کامیو ءِ گِدار بلوچی رجانک ” درآمد ” اِیر اَت ۔
من اے کِتاب ءِ تاکدیم ھپتاد ءِ وانگ بِندات کُت ، گْوش ئے انچو سما بوت کہ واجہ البرٹ کامیو ءَ منی ڈگار ءُ تیاب دپ ءِ کِسّہ نبشتگ کُت ءَ ،
” روچ ءِ تچکیں بْرانز آپ ءَ تِرپان چمّاں پچ بیگ ءَ نئیلگ ءَ اِت اَنت ۔ مردُم چہ تیاب دپ ءَ واتر بیگ ءَ اِت اَنت ۔ کِرّ ءُ کشّانی کُڈُک ءُ لوگاں چاکُو ءُ چمچوانی توار آیگ ءَ اَت ۔ کوہ چو آسگواریں کوہ ءَ جل ءُ پاھار کشّگ ءَ اِت اَنت ۔ انچو گرم اَت کہ ساہ ءِ کشّگ ھم گْران کپگ ءَ اَت ۔”
ھمے اشکامی زِرد ءِ رگ ءُ ریشگاں نوکی تالان بُوھان اَت کہ دِگہ گمے ءَ گْرندگ بُنگیج کُت ، گم گم ءِ کُوپگاں سر پہ چک اَت کہ ھیالاں سان زُرت ءُ جیڑگ ءَ تانسریں بالاد وتی امبازاں زُرت ۔
نیلبومیں زِر ءِ بھشت چکّیں نِدارگ ، کوہ ءُ کَورانی زُمزمیں چمّگ ، مچکدگ ءُ میزریں جنگل ، کُوچّگ ءِ زیبائیں دْروشم ءِ شھماں تیوگیں گیابان پتاتگ اَت ۔ نیلّیں آزمان گوں جمبری شینکاں بس پہ گْوارگ ءَ مھتل اَت ۔
دومی نیمگ ءَ پہ اِیشانی سوچگ ءُ پُر کنگ ءَ آسے جمبول اَت ، من ءَ پہ گْواچن انچو سما کپت کہ اے آس پہ منی راجی ھستمانی ءِ سوچگ ءَ رُوک کنگ بوتگ ، اگاں ما گوں راجی توان ءَ اے آس ءِ دیم نہ داشت گُڑا مئے پُتینکاں کس نز نیار اِیت کہ بلوچ نامیں سھدارے اے گیدی ءَ دمکاں ھست بوتگ ۔
ھمے جیڑگ جیڑگ ءِ پھنات ءَ چہ جبین ءَ لھڑیں پاھارے وت ءَ ھیال ءِ دْروشم ءَ آشنا کنان اَت کہ من وانگی اِیر کُت ءُ ند ماں دست ءَ رودپتر ( ڈائری ) ءِ پُولگ بِندات کُت ، وھدے رودپتر ( ڈائری ) چہ بیگ ءَ کش اِت ءُ پہ نبشتہ کنگ ءَ چاڑ بیتّ آں ، چاراں اولی تاکدیم ءَ تئی داتگیں سوگات پہ منی نام ءَ نبشتگ اِنت۔۔۔۔۔۔۔رمس ( 28 ، 11 ، 2018 ) نوتک بلوچ ۔
گوں اے رمس ءِ چمّانی دیمے گْوزگ ءَ ھیالاں یکرندے پد ءَ من ءَ ھما پتّر ءَ بُرت کہ ما شُما داں ھپتگے گیش یکجاہ اِت اِیں ، بلے چوشیں ساھتے نیست اَت کہ ما شُما بیدے مُلکاری ءِ گپ ءُ تْران ءَ گْوازینت ۔
بلے من اے ھیال شموشت ءُ دِہ دِہ ءَ وتی اتکگیں ھیال ءِ نویسگ بِندات کُت داں چو مُرگ ءَ بال مہ کنت
منی زمین۔۔۔۔۔!!
من وھدے مونجا بَہ آں ، گُڑا آزُردگیں زمین ءِ زیمیں گم من ءَ چاگِرد کنت ۔ دِل ءِ ھُلّاں شِنت ءُ نوکیں جوزگے چیدگ کنت ءُ گْوش اِیت ، دِل ءَ مہ ور۔۔۔۔۔اے سکّیں ساھتانی کھرمانیں روچ الم آسر بَہ اَنت ۔
تہ دِل ءَ آسیں پاھارے سُرمگیں بیگاہ ءِ تاسیں دِلبند ءَ شپ ءِ کِسّہ ءَ کار اِیت۔۔۔۔۔۔۔
الوت الوتّ ءَ بام ءِ ھون درنزیں بالاد ءِ بْرھنگیں اکس ءِ اندر ءَ منی زمین ءِ تھاردیمیں مُلبت تانسر ءَ گُباراں مانپُوشتگ ، ھمے مانگیشّگ ءِ مْیانجی ءَ چاراں چہ دُور ءَ تیاب ءِ چَولانی ھمراھی ءَ زیمریں توارے جکس اِتگ ءُ ھمے گْوشگ ءَ اِنت۔۔۔۔،اگاں لوٹ ءِ کہ من زِندگ بِہ ماناں۔۔۔۔۔۔۔گُڑا کریم ءِ گوں سنگتاں رند پداں پُول۔۔۔اگاں نا اے آس مُپت ءَ جمبول کنگ نہ بوتگ۔۔۔۔۔۔۔
ھمے ساھت ءَ چم پد ءَ پہ رودپتر ( ڈائری ) ءَ کپ اَنت ءُ تئی نام ءَ چمّ گوں وت بُرت اَنت ءُ دِگہ مارِشتے آس اِت کہ اے ھیال ” منی زمین ” نوتک ءِ گْوشتگیں دانک نہ اَنت کہ ترا پہ نبشتہ کنگ ءَ کڈّن اِش کُتگ ، من جیڑ اَت تہ راستی ھمیش اِنت کہ اے ھیال نوتک ءِ گْوشتگیں دانک اَنت بلے تو نبشتہ کُتگ اَنت ،
ترا یات اِنت یکرندے ما سنگتانی پتّر ءَ نِندوک اِت اِیں نوتک ءَ چے گْوشت۔۔۔۔۔؟ ، من پہ اجکّھی ھیال ءِ پسّو ترّینت ءُ گْوشت ، نا! من ءَ یات نہ اِنت۔۔۔۔۔۔
ترا یات نہ اِنت ، گُڑا من ترا تْرانگ ءَ گیجاں کہ آ روچی سنگتانی پتّر ءَ نوتک ءَ چے گْوشتگ ، سنگتانی دیوان ءَ گپ گپ ءِ سر ءَ زِرپھازیں پِدائیگیں سنگتانی سر ءَ گپ ءُ باوست بُنگیج بوتگ ، گُڑا نوتک ءَ دیوان ءِ اندر ءَ ھمے گْوشت۔۔۔۔نوں وھد چہ بلوچ راج ءِ ھر برات ءُ گْوھار ءَ ، زھگ ءُ مات ءَ ، چُک ءُ پِت ءَ ، چہ ملّیں ورناھاں ھمے لوٹ ءَ کنگ ءَ اِنت کہ پہ وتی ڈیھ ءِ پھازگ ءَ دُژمِن ءِ بگیری ءَ انچیں گامگیج چِست کنگی اِنت دانکہ دُژمِن ءِ ھمراھی ءَ تانسریں گیدی بِہ لرز اِیت ءُ وتی دلگوش ءَ گوں تو گْور بِہ کنت کہ بلوچ راج پرچا ھونریچیں جنگ ءِ پِڑ ءُ میدان ءَ مان دیان اِنت۔۔۔۔۔؟
ھو! یات اِنت ، نوتک ءَ راست گْوشتگ ۔ مارا نوں گوں وھد ءِ رواجاں ملگی اِنت ، اگاں نا کمّیں پشت کپت اِیں گُڑا وھد ءِ رنگ پہ بدل بُوَگ ءَ دیر نہ کنت ۔ گوں ھمے ھیالاں من رودپتر ءُ واجہ البرٹ کامیو ءِ زمین جُمبیں گِدار کش ءَ ایر کُرت اَنت ءُ گوں گْوانکو ءَ دلگوش گْور کُت ، چاراں سنگتے ءِ اسٹیٹس ءَ سنگت سلمان ھمّل ءِ شَیرے اسکرین شاٹے اِیر اِنت کہ سرگال ءَ نبشتگ اِنت “رُکست اَپ اواراں سنگت ” ۔ گوں اے سرگال ءِ گِندگ ءَ ھیال ، جیڑگ ءُ مارِشتانی سر دُور ماں گْوست ءَ مانگیشّ اِت ، ھمے مانگیشّگ ءِ مْیان ءَ چاراں داں زُرمش ءَ نیوزے شِنگ ءُ تالان بوت کہ کراچی ءَ پاکستان ءِ اسٹاک ایکسینج ءِ سر ءَ اُرش بوتگ ءُ جنگ برجاہ اِنت۔۔۔۔۔۔
نوں منی مارِشت ءِ سر وت ءَ راست کنان اَت کہ بِہ گِندے نوتک گوں ھمے رُمب ءَ گون بِہ بیت ءُ پہ آیوکیں پدریچ ءَ دِیدانکی درونتے نبشتہ بِہ کنت ۔
یکرندے پد ءَ گوں ھمے ھیالاں چیر ءُ سر اِت آں کہ راستی ءَ وت ءَ سھرا کُت ءُ نوتک ءِ پجّار پِدائیگ ءِ نام ءَ بوت ، کہ نوتک گوں دِگہ سئے سنگت تسلیم بلوچ ، شھزاز ءُ سراج بلوچ ءِ ھمراھی ءَ پاکستان ءِ اسٹاک ایکسینج ءِ سر ءَ اُرش کُتگ ءُ دُگنیا ءَ را اے کلوہ داتگ کہ ما پہ وتی ڈیھ ءِ آجوئی ءَ زِند ءِ پِڑ ءَ ھر وڑیں کُربانی ءِ دَیَگ ءَ ساڑی ئیں ، بلے پہ وش نیاتکاں مئے سرڈگار جَور اِنت ۔
چہ اے کارِست ءِ پلگارگ ءَ پد چاراں منی ند کُنٹ بُوھان اِنت ءُ شدریں لبزانی مُھرگ کم ترّان اَنت کہ من سلمان ھمّل ءِ کِرد ءُ داتگیں دیم ھونی ءِ سِپت ءُ ساڑا ءَ بِہ کن آں۔۔۔۔۔
پمیشکا گُڈّی ءَ ھمے نبشتگ بوت ، پَھِل کن! پہ تئی کِرد ءِ سِپت ءُ ساڑاھگ ءَ ند ءُ لبز ھردوکاں منی ھمراھی یل داتگ ، چی ءَ کہ تئی کوھیں بالاد ءِ ستاہ پہ منی دوھیں دانکاں مُھتاجی نہ اِنت ، تو ھما کِردار ءِ ھُدابُند ئے کہ آ کِردار بلوچ راج ءِ راجی آکبت ءِ مانزمان اِنت۔۔۔۔۔۔
