پہ بلوچ راجی آکبت ءِ سینگارگ ءَ پِدائیگ ءُ راجی جنگول ، سالونکیں سر چہ زِندمان ءِ زِرّیں واھگ ءُ واھشتانی سارت ءُ ھونکّیں ساھگ ءَ در راجپھازی ءِ جنگ جاہ ءَ ڈیھ ءِ موکگ ءَ مُلمہ اَنت ، پرے ھاتِر ءَ کہ مئے ریزبستگیں ڈگار چہ دُژمِن ءِ پنجگاں آزات بِہ بیت ءُ اِیمنی ءِ امبریں کَوش ھرچار کُنڈاں بِہ کشّ اِیت ءُ آزات بلوچستان پہ گیدی ءِ مھلوک ءَ امن ءُ سلامتی ءِ کلاتے بِہ بیت ۔
انگت کسے کَیت ءُ دُژمِن ءِ گْوشتگیں گپّ ءَ دپ ءَ دوچ اِیت ءُ گْوش اِیت کہ پِدائیگ راجی جُھد ءَ میان اُستمانی تک ءُ پھنات ءَ نِزور کنگ ءَ ابید دِگہ چوشیں ھِچّ کلوھے شِنگ ءُ تالان نہ کنت کہ آ بلوچ ءِ آکبت ءَ چہ تھاری ءَ در بِہ کنت ءُ رُوژنائی ءِ نیمگ ءَ راھی بِہ کنت ۔
ھمے بیگْوائیں بلوچ پُسّگانی ھاتِر ءَ کہ آیانی کھول ءُ پسائندگاں جُھدے بُنگیج کُتگ ، آ جُھد دُگنیا ءِ دمکاں منّگ ءِ بدل ءَ ایر جَنَگ بیت۔۔۔۔۔گُڑا اے گامگیج پہ بلوچ ءَ مزنیں تاوانے ۔ بلے ھمے نام گِپتیں دانشمند ءُ اِنساندوستی ءِ بیرکدار چو سرپد نہ اَنت کہ دُگنیا وتی سیاسی نپ ءُ سیتاں کُجام سَنگ ءَ تور کنت ءُ راستی ءَ کُجام نِگاہ ءَ چار اِیت ، نیکہ بلوچ ءَ وتی جنگ دُگنیا ءِ واھشت ءِ پُژدر ءَ بِندات کُتگ کہ آ من ءَ کُجام نام ءَ دنت ءُ اِیر جنت ۔ ءُ اے ھبر ھم راستی یے کہ ایردستیں بلوچ راج کُجام رھبنداں گوں وتی جُھد ءُ جنگ ءَ دیم ءَ برگ ءَ اِنت آ میان اُستمانی تک ءَ منّ اِتگیں رھبند اِنت کہ ھر گُلام ءُ ایردستیں راجاں ھمے رھبند ءِ رِد ءَ وتی جنگ دیم ءَ بُرتگ ، اگاں مرچی دُگنیا چہ وتی منّ اِتگیں رھبنداں در بلوچ ءَ ناشرکار گْوش اِیت۔۔۔۔پریشی ءَ بلوچ وتی جنگ ءُ جُھد ءَ کدی مھتل نہ دار اِیت کہ دُگنیا چے گْوشگ ءَ اِنت ، بلکیں بلوچ راج ھما رھبنداں گوں دیم ءَ گام جنت کہ آ رھبندانی اندر ءَ اِنسانیت ءِ مانزمانی نبشتہ اِنت ، ءُ بلوچ ءِ جنگ ءِ جُھد سددرسد اِنسانیت ءِ اگبالانی پاسدار اِنت ۔اے راستے کہ پاکستان ءُ آھگی زرھرِیدیں رسانک در ھر رنگ ءَ پہ بلوچ راجی جُنز ءِ نِزور کنگ ءَ چابُک ءُ چاردست اَنت ، بلے مئے دانشمند ءُ اِنساندوست چرے راستی ءَ روگرد کدی مہ بَہ اَنت کہ راستی ءُ دُروگ ءِ پرک ءُ دَرک چی اِنت ۔
بَہ کَول ء بلوچ راجی رھشُون واجہ ڈاکٹر اللہ نِزر بلوچ کہ وتی بیان ءِ تہ ءَ گْوش اِیت : بلوچ سرمتابیں ورنا ، ماتانی دِلدوست ءُ لاڑُکیں بچّ پہ سُودابازی ، پہ نام ءُ نامداری ءِ ھاتِر ءَ نا ، بلکیں وتی ایردستی ءُ زیرزِندی ءِ کلوہ ءُ پیام ءَ ماں دُگنیا ءَ سر کنگ ءُ دُژمِن ءِ گُروناکی ءِ پُروش دَیَگ ءِ ھاتِر ءَ پِدائیگ جوڑ بَہ اَنت ۔
آ اے اُوست ءُ اُمیت ءَ الم دار اَنت کہ بلوچ راج آیانی داتگیں کُربانی ءُ دیم ھونیاں زوال نہ کنت ۔ چی ءَ کہ زُوراکی ءِ بُنیات کْوزہ گیر اِنت ، ءُ کْوزہ گیر ءِ توامیں ھُنڈال ءُ آگُنڈ گوں زُوراکی ءَ ڈکّ اِتگ ءُ چیر اَنت ۔ پاکستان ءِ وڑیں ریاست ءِ مُکابِلہ ءُ دیمپانی ءَ آشوبی درونت مارا چہ چی گویرا ءُ ھُوچی منہ ءِ دابیں ھستیانی پِگر ءُ لیکھاں ، ءُ چہ بلوچ راجی ربیتاں رستگ ۔
مرچی مئے آشوبی جنگ ءِ سر ءَ نام گِپتیں دانشمند ءُ کواس نگدکاری کنگ ءَ اَنت کہ چرے گامگیج ءَ پاکستان ءِ زُوراکی ءُ زُورانسری ءَ موہ رس اِیت ، آیاناں ھسیبہ ءُ سیما ءِ ارس گِندگ نیا اَنت کہ آیانی زِرد ھُلّاناں ریاستی پوج ءَ کُجام اُرش ءِ وھد ءَ گوں سِلاھاں گِپتگ ءُ ماں زِندان ءِ تھاریاں گُبّارتگ۔۔۔۔۔۔؟
آیاناں اے راستی پرچا گِندگ ءَ نئیت کہ پاکستان ءُ چین تزویراتی لِیاز ءَ دُگنیا ءَ مرگ ءُ زِند ءَ دیمپانیں بلوچ سرڈگار ءِ سر ءَ بلوچ راج ءِ گارءُ سِیاہ کنگ ءِ اَمَلی پیسلہ کُتگ ۔ پاکستان ءِ زُلم ءُ زُوراکی مرچی ءَ پیش ھپتاد سال اِنت کہ جاری اِنت ۔ ءُ ھمے پاکستان ءِ زُلم ءُ زُورا، دگ ءُ چارراھانی سر ءَ بلوچ سیاہ سر ءُ نیاڑیانی ارس مئے جنگ ءِ تہ ءَ تْرندی ءِ ودی کنگ ءِ سَوَب جوڑ نوتگ اَنت ۔
اے ارسانی بدل چہ پاکستان ءُ آھگی آلہ کار ءِ ھمدستاں گِرگی اِنت ، من ءَ شرّی ءَ مالُوم اِنت کہ پاکستان اے اُرشاں بَھانہ جوڑ کنت ءُبلوچ راج ءِ چُکچینی ءِ تہ ءَ گیشی کار اِیت ، بلے چراِیشی ءَ مارا ھتم ءُ ھلاس کُت نہ کنت ۔
ھمے وڑ ءَ آمِر رانا گْوش اِیت کہ وھدے عالمی رسانک در ( میڈیا ) ءَ رپورٹ کنگ بیت کہ پاکستان ءِ بُنجاہی ( مرکزی) اِسٹاک مارکیٹ ءِ سر ءَ اُرش بوتگ ، گُڑا اے ھم گْوشگ بیت کہ اُرش کنوک چونیں بوتگ اَنت ۔ آیانی مُول ءُ مُراد ، مکسد چے اِنت ءُ چے لوٹ اَنت۔۔۔۔۔۔۔۔؟
گُڑا دُگنیا ءَ را ھمے پسّو رس اِیت کہ اے اُرش کار
بلوچ سرمچار بوتگ اَنت ءُ پہ وتی آجوئی ءِ درگت ءَ جُھد کنگ ءَ اَنت کہ پاکستان ءَ آیانی ڈگار گوں وتی زُور ءُ واک ءَ کْوزہ کُتگ ، چہ ھما روچ ءَ پد اے جُھد بِندات بوتگ ءُ دانکہ مرچی جاری اِنت ، بلے مرچی ءِ جُھد ءِ رنگ ءُ دْروشم پیشیگیں نہ اِنت ۔
مرچیگیں بلوچ راجی جُھد ءُ جُنز ءِ واگ بلوچ ورنایانی دست ءَ اِنت کہ آ مرچی پہ وتی ڈیھ ءِ پاسپانی ءَ بَہ کَول ء راجی رھشُون واجہ ڈاکٹر اللہ نِزر آ ھر وڑیں گامگیج ءِ چِست کنگ ءَ ساڑی ءُ جاڑِیگ اَنت دانکہ آجوئی ءِ گُڈّی مِنزل ءَ ،
بلے بژن پرے ھبر ءَ کہ ھما اِنسانی اگبالانی پانک جن اَنت ءُ وت ءَ مزن نامیں دانشمند ءُ کواس لیک اَنت آ ھم نِشتگ ءُ دُژمِن ءِ گْوشتگیں دانکانی پلہّ مُرزی ءَ موتک ءُ زھیریگ جَنَگ ءَ اَنت کہ چرے پِدائیگانی اُرش ءَ میان اُستمانی تک ءَ بلوچ راجی جُنز اِیر جَنَگ بیت ءُ آئی ءِ وش آتک ءَ کس وتی گاماں شھار نہ دنت ءُ تیمیچ نہ کنت ۔
من ھمے دانشمند ءُ کواساں بس ھمے گْوشگ لوٹ آں دُگنیا ءِ ھما مُلک ءُ اُستمان کہ زِی گُلامی ءِ کبس ءَ بندیگ بوتگ اَنت آیاں پہ وتی آجوئی ءَ چے کُتگ کہ مرچی پہ بلوچ راج ءَ شرتگے مان اتکگ۔۔۔۔۔۔۔؟
بلکیں آیاں ھم پہ دُژمِن ءِ بے سوب کنگ ءِ ھاتِر ءَ وتی وس ءُ واک ءَ جُھد ءِ ھر راہ ءُ در چکّاستگ دانکہ مئے راجی توار گیدی ءِ دمک دمک ءَ سر بِہ بیت ءُ ھمے کلوہ شِنگ بِہ بیت ما پرچا وتی ارواہ ءُ جان ءِ ندْر کنگ ءَ جنگ ءِ میدان ءَ در کپتگ اِیں ، مئے مُول ءُ مُراد ، مئے مکسد چی اِنت ، ھمے داب ءَ بلوچ راج ءَ جم پہ وت مرگ ءِ راہ گچین کُتگ دانکہ منی راجی گْوانگ جھان ءَ چہ گْراں وابی ءَ جھ بِہ سِرینّیت ءُ سرپد بِہ کنت کہ من پرچا مرگ ءِ امبازگ ءَ پہ بِچکند گاماں دیم ءَ شھار دیاں ءُ لپرزگ نہ بَہ آں۔۔۔۔۔۔۔
اے بلوچ راج ءِ گوں وتی ھاک ءَ ، گوں وتی گُلزمین ءَ گْواچنیں اِشک ءُ مھر اِنت کہ مرگ ءَ زِند ءِ کوار ءَ پہ بِچکند جاگ دنت ءُ پہ آیوکیں پدریچ ءَ نوکیں راھے شوھاز اِیت ، اگاں دُگنیا ءِ گْران کدریں مھلوک چرے مھر ءَ زِبھر اِنت ، گُڑا آ بلوچ ءَ کُجام نِگاہ ءَ چار اِیت یا کُجام نام ءَ دنت۔۔۔۔میاریگ نہ اِنت ، نیکہ پہ بلوچ ءَ گِلگے پشت کپ اِیت۔۔۔۔۔۔
بلے اے ھبر ءَ پہ سِدک گْوش آں کہ بلوچ کسے ءِ واھش ءُ رزا ءِ باپُشت ءَ وتی راجی آجوئی ءِ جُنز ءَ ھِچّ رنگ ءَ مھتل نہ دار اِیت کہ کَے من ءَ کُجام نام ءَ توار کنت ۔
