(دومی بھر)
من پیسر ءَ شھید ءُ شھمیر ءِ لبز ءِ بارہ ءَ گپ ءُ تران کتگ اَت، شما سرپد بوت اِت بلے بیاکہ ایشاں نی دگہ دندایے شرو کتگ کہ سجھیں گالاں بدل کنگ ءَ اَنت! اے زبان منی نہ اِنت، یک مردمے ءِ نہ اِنت، تئی نہ اِنت، اے زبان کلیں بلوچ راج ئیگ اِنت، ءُ اے زبان ءِ پھازگ ءُ پھریزگ مئیگ ءُ شمئے کلانی زمہ واری اِنت، پرچاکہ مارا دگہ والی وارس نیست، مئے زبان ءِ والی وارس ما وتیں، مارا سرکار نیست، مارا وتی زبان ءِ پانک وت جنگی اِنت، اے لھتے مردم اَنت کہ ھدا بزانت نی من گوشت نکناں کسے ءَ پرماتگ اَنت، پگار وار اَنت یا وت چوش کنگ ءَ اَنت۔ اے زبان ءَ گڑ ءُ مُنج کنگ ءَ اَنت، انچیں لبز آرگ ءَ اَنت کہ مردم گڑ ءُ مُنج بہ بنت۔ بلے بلوچی زبان انچیں پراہ ءُ شاھگانیں زبانے کہ آئی ءِ تہ ءَ دری لبز ھم ھست، بلوچ ءَ وتی لبز دگر ءَ داتگ، وت ھم زرتگ، اے مزنیں زبانانی نشانی اِنت۔
چوش کہ دگہ گالے راجدپتر۔
راجدپتر تاریخ بزاں تئی راج ءِ دپتر، تئی راج ءِ تاریخ۔
ایشی ءَ اپو نامے داتگ اِش گوستانک۔۔ گْوستانک چے یے؟
وھدیکہ لبزے تئی گال گنج ءَ ھست، تئی لبزبلدانی تہ ءَ ھست گڑا زلورت چے اِنت کہ تو وتگڑے جوڑ کن ئے؟
نی مردم ھمے سرپد بیت کہ ایشانی مکسد بس زبان ءِ تاوان دیگ اِنت۔ ایشاں زبان ءِ دگہ پگر نیست۔
ءُ دگہ لبزے سرمچار ءَ مرچاں گْوش اَنت کہ جنگول!!
سرمچار ءُ سرنتاب اے دو لبز اَنت کہ پرے ھبر ءِ واستا کارمرز بنت۔
آ سرمچار یا سرنتاب جنگولے نہ اِنت، گنوکے نہ اِنت، آ پہ مکسدے ءَ جنگ ءَ اِنت، آ گوں ھرکس ءَ جنگ ءَ نہ اِنت۔ جنگول ءِ مانا وَ ھمش اِنت کہ ھرکس ءَ گند اِیت جنگ کنت ءُ جنگول گیشتر پہ مال ءُ دلوت چوش کہ گوک، پس، پاچن، گرانڈ ءَ کارمرز بیت کہ ھمیشاں گْوش اَنت جنگول۔
ھمے جنگولیں گوکے مردیناں نزیک ءَ نیل اِیت بلے جنینے روت نہ سُر اِیت، یا چکے روت نہ سُر اِیت، آئی ءَ تو جنگول گوشت نکن ئے۔ جنگول ھما اِنت کہ جنین، مردین، چک کَس وتی نزیک ءَ مَیل اِیت۔
نی چوں تو سرمچار ءَ جنگول گْوش ئے؟! اے جنگول وَ توھینے ناں پہ سرمچار ءَ۔
ءُ دو لبز تئی کرّ ءَ ھست یا بگوش ئِے سرنتاب یا سرمچار۔
سیمی دگہ لبزے کہ قرآن شریپ۔
بچار چار آسمانی کتاب اَنت:
قرآن، انجیل، زبور ءُ تورات۔
ھچ کس ءَ، ھچ کوم ءَ دنیگا ایشانی نام بدل نہ کتگ، قرآن ءَ قرآن گْوش اَنت، زبور ءَ زبور گْوش اَنت۔۔۔ نی ایشاں قرآن ءِ نام کتگ پاکوان یا پاکتاک! اے چے یے؟
قرآن ھزار ءُ چارسد سال اِنت کہ نازل بیتگ ءُ ما ایشی ءَ وانگ ءَ ایں۔ایشی ءَ کہ تو بدل کن ئے پاکوان کن ئے، گڑا زبور، انجیل ءُ تورات ءَ چے کن ئے؟ گڑا آیاں توبہ نعوذباللہ پلیت وان کن ئے!؟ آ ھم آزمانی کتاب اَنت۔ گڑا آیاں تو چون کن ئے؟ ءُ پد ءَ ایشی ءِ چے زلورت ھست ؟
انگریز قرآن ءَ قرآن گوش اَنت، یھودی قرآن گْوش اَنت۔۔
نی ایشاں وتگڑیں لبزے درکتگ پاکوان!
ھیال بکن اِت اے لبزاں کہ اے لبز مارا گِسر کن اَنت، مئے زبان ءَ بیراھاں پِرّین اَنت۔
نی اے وڑیں ھرچے وتگڑیں لبزے گند ئے سے چار رند ءَ ھیال بکن اِت کہ اے کے ءَ جوڑ کتگ؟ پرچا، کجام زلورت ءَ جوڑ ئِے کتگ؟
نی اے وڑیں چیزانی ھیال مارا شمارا لوٹ اِیت۔
اد ءَ بچار کہ ٹیلپون نمبر یک واجھے ءَ کتگ گوانک رِد!
نی تو اندازہ بجن کہ ٹیلپون مئے پروڈکٹ نہ اِنت، ما جوڑ نہ کتگ، ھرکس ءَ کہ جوڑ کتگ آئی ءَ نام ٹیلپون کتگ۔ باید اِنت کہ ما ھما نام ءَ داں ھما وھد ءَ بزیریں دانکہ مئے کرّ ءَ نامے در بئیت،
نمبر کتگ گوانک رِد۔۔۔
کجام گوانک اَنت کہ رِد اَنت؟
تو گوش ئے وتی ٹیلپون نمبر ءَ من ءَ بدے۔
تو اگاں یکے ءَ بگوش ئے کہ ٹیلپون گوانک رِد ءَ من ءَ بدے، آ مرد ھَیران بیت کہ چے یے؟“
نی ھمے ڈولیں بے سر ءُ بُنیں لھتے گال اَنت مروچاں اے مردم اِش کارمرز کن اَنت، چہ ایشاں مردم ھُژّار بہ بیت کہ ایشاں کارمرز مکنت، پرچاکہ وھدے لبزے گپ ءُ گال ءِ تہ ءَ آتک کارمرز بیت گڑا پد ءَ آ سر ءَ توک بیت۔
اے کتاب اِنت الی بکش دشتیاری ءِ۔
من نہ گوشاں الی بکش دشتیاری چوش کنت بلے زلور دگہ یکے ءَ کتگ کہ ھمے کتاب ءِ یک لیڈرے ءَ چیزے ھمائی ءَ وتی نیمگ ءَ کتگ، گوانک رِد !
ٹیلپون نمبر
نی اے وڑیں چیزاں شما ھیال بکن اِت ءُ بچار اِت کہ اے زبان ءَ شرتر نکن اَنت، ھراب تر ئِے کن اَنت۔ دنیا ءِ تہ ءَ یک چیزے گالے کومے ءِ کرّ ءَ کہ نیست اِنت آ ھما گال ءَ زیر اِیت۔ ھما پروڈکٹ ءِ کہ جوڑ بیتگ، آیاں نام داتگ، تنا وھد ءَ کہ مئے کرّ ءَ شریں نامے در مئیت باید اِنت مردم ھما ناماں بزیر اِیت۔
پد ءَ دگہ لھتے مردم ءَ دگہ دندایے شرو کتگ، ناماں بدل کنگ ءَ اَنت۔ بابا شمئے نامانی بدل کنگ ءَ چے پرکے کپ اِیت، ءُ پد ءَ تو ناماں وتیگ ءَ بدل کن ئے کن ع ءَ تو الف کن ئے، آیا تو ھمے لبز ءَ ھمے نام ءَ وتی پاسپوٹ ءِ تہ ءَ بدل کت ئِے کن ئے؟ وتی ایدگہ شناخت نامہ کہ ترا گون اَنت سپری کاگد ءُ زمینی کاگد ءُ اسکولی کاگد اود ءَ بدل بنت؟ اناں۔
گڑا وٹسپ ءِ دیوان ءَ نشتگ ءُ نام بدل کتگ، ایشی ءِ پائدہ، ایشی ءِ کٹ ءُ نپ، ایشی ءِ زلورت چے اِنت؟ ناماں مزیر اِت، اے وَ آسانیں کارے، بلوچی نام بزیر اِت۔ اے پیریں وت مِر اَنت، اے پیریں ھلاس بنت، سرپد بیت ئے؟
ءُ ھما شمئے بلوچی نام بنت، بلوچی نام وت شر اَنت۔
تو مرچی دوسد ءُ ھشتاد سال اِنت فاضل ءِ نام ءَ بدل کن ئے، عزت ءِ نام ءَ بدل کن ئے گوں الف ءَ نبیس ئے، اے ناھودگیں گپ اَنت ناں۔ تو اینچک کتاب چتور بدل کن ئے؟ چینچک کتاب چاپ ءُ شنگ بیتگ گوں ھمے ناماں، نی آ کتاباں چتور کن ئے؟
نی اے ڈولیں چیزاں ھیال بکن اِت کہ شما رد مہ ور اِت۔
سلامت بات اِت
***
