جنگی جنگانی رِپکّ کتاریں بامردے
جنگی بُرز ھساریں درنگانی شھمیرے
جنگی سنگر سنگر باجبریں یاگی ئے
جنگی گوں ھوکّیں گُرازاں جنگجاھے جنگ ءَ اِیں
جنگی کوہ مزاریں راجی سالونکے
جنگی کندیل شھمیں اِستالے پہ ھاک ءَ
جنگی زمین پھازیں شھیدے ماتی ءِ
جنگی گیرے، یاتے ،اندوھے زِردانی
جنگی کارِستے، نوکیں اَھد ءِ نوکیں کِردانی
جنگی بیھارے پہ باروٹی بدّیں بدواھاں
جنگی آشوب چکاریں بامسارے باندات ءِ
جنگی دْرپشیت کوہ ءُ کیلگ ءُ ماتبنداں
جنگی زندگ مانیت گیدی ءَ
جنگی ھر دھیں شھیدانی یلیں بیلی
جنگی گوں آسِپ ءُ ملنگ، سراج اِیں شائِر ءَ
جنگی گوں دلجان ءُ منیر ءُ آرِپ ءَ
جنگی گوں شئیب ءُ کمال ءُ چراگیں کُنگر ءَ
جنگی گوں کُل شھیداں نمیرانیں جنگی سنگراں
جنگی شاپُک بانوریں شھیدانی
جنگی ڈانڈل بانوریں مُریدانی
جنگی جنگی نازینکاں ماتی مُرادے الھانیں
جنگی جنگی چوگاناں لیلویں گْوھارے ماہ گنجّیں
جنگی جنگی لئیکواں گُشانیں ماتے مھنازیں
جنگی سالونکیں اَبد ماتیں زمین ءِ دلبند ءَ
جنگی سالونکیں ابَد ماتیں زمین ءِ دلبند ءَ
