پاکستان اور افغانستان میں پیر کی شام سے ایسی خبریں گردش کر رہی ہیں جن کے مطابق کالعدم تنظیم تحریک طالبان پاکستان کے سینیئر رہنما اور سابق ترجمان محمد خالد بلتی عرف محمد خالد خراسانی کو افغانستان میں قتل کر دیا گیا ہے۔
تحریک طالبان پاکستان نے ایک بیان میں کہا ہے کہ ان کے موجودہ ترجمان محمد خراسانی زندہ ہیں لیکن وہ سابق ترجمان محمد خالد بلتی عرف محمد خالد خراسانی کی ہلاکت کی خبروں سے متعلق ‘تحقیق’ کر رہے ہیں۔
ٹی ٹی پی کے بیان میں کہا گیا ہے کہ ’تحریک طالبان پاکستان کے ترجمان محمد خراسانی زندہ وسلامت ہیں۔ البتہ مفتی خالد بلتی کے حوالے سے ہماری تحقیق جاری ہے، جیسے ہی کنفرم معلومات حاصل ہو جائے نشر کر دیں گے۔‘
سات ہی بیان میں کہا گیا ہے کہ خالد بلتی کے پاس فی الحال تحریک میں کوئی خاص ذمہ داری نہیں تھی۔
واضح رہے کہ تحریک طالبان پاکستان (ٹی ٹی پی) کے موجودہ ترجمان محمد خراسانی کے نام سے جانے جاتے ہیں تاہم ہلاکت کی خبریں ٹی ٹی پی کے سابق ترجمان محمد خالد بلتی عرف محمد خالد خراسانی سے متعلق ہیں۔
سوشل میڈیا پر بھی اس بارے خبریں گردش کر رہی ہیں تاہم ان کی آزادانہ طور پر تصدیق نہیں کی جا سکی۔
ادھر افغان طالبان کے ترجمان نے ان خبروں کو مسترد کر دیا ہے اور کہا ہے کہ اس طرح کا کوئی واقعہ ان کے ملک میں پیش نہیں آیا ہے۔
افغانستان کے محکمہ اطلاعات کے ایک ترجمان بلال کریمی نے بی بی سی کو بتایا کہ ’اس خبر میں کوئی صداقت نہیں ہے ہم اس کو مسترد کرتے ہیں ہمارے ملک میں ایسا کوئی واقعہ پیش نہیں آیا۔‘
البتہ پاکستان میں سکیورٹی ذرائع کے مطابق کالعدم تنظیم تحریک طالبان پاکستان کے سابق مرکزی ترجمان محمد خالد بلتی افغانستان کے ننگرہار صوبے میں قتل کر دیے گئے ہیں۔ ذرائع کے مطابق ان کا اپنا نام خالد بلتی تھا اور وہ پاکستان میں آپریشن ضرب عضب کے دوران افغانستان فرار ہو گئے تھے اور وہ متعدد واقعات کی منصوبہ بندی میں ملوث تھے۔
کالعدم تنظیم تحریک طالبان کے سابق کمانڈر محمد خالد بلتی کا تعلق گلگت بلتستان سے بتایا جاتا ہے۔ وہ جس دور میں تحریک طالبان پاکستان کے ترجمان تھے اس وقت انھیں محمد خالد خراسانی کے نام سے جانا جاتا تھا۔
پاکستان میں ٹی ٹی پی کے سابق ترجمان شاہد اللہ شاہد کے بعد محمد خالد بلتی عرف محمد خالد خراسانی کو تنظیم کا ترجمان نامزد کیا گیا تھا۔ شاہد اللہ شاہد نے چند دیگر ساتھیوں کے ہمراہ داعش میں شمولیت اختیار کر لی تھی۔
محمد خالد بلتی نے دینی تعلیم کراچی کے مدرسے میں حاصل کی اور پھر طالبان کی میڈیا شاخ ’عمر میڈیا‘ میں کام کرتے رہے اس لیے انھیں میڈیا سے تعلقات اور نشر و اشاعت کے کام سے واقفیت تھی۔
ایسی اطلاعات ہیں کہ یہ عہدہ حاصل کرنے کے بعد وہ شمالی وزیرستان منتقل ہو گئے تھے اور جب شمالی وزیرستان میں سال 2014 میں فوجی آپریشن شروع کیا گیا تو محمد خالد بلتی عرف خالد خراسانی افغانستان فرار ہوگئے تھے۔
مقامی ذرائع نے بتایا کہ افغانستان سے بھی محمد خالد بلتی نے متعدد حملوں کی ذمہ داری قبول کی تھی اور وہاں متحرک رہے تھے۔
افغانستان کے سابق صدر اشرف غنی کے دور میں ننگر ہار میں آپریشن کے دوران محمد خالد بلتی کو گرفتار کر لیا گیا تھا اور انھیں باگرام جیل میں رکھا گیا تھا۔
ایسی اطلاعات ہیں کہ افغان طالبان کے افغانستان میں اقتدار میں آنے کے بعد جب جیلوں کے دروازے کھول دیے گئے تھے اس دوران وہ جیل سے باہر آگئے تھے۔
رہائی کے بعد وہ ننگرہار صوبے میں آ گئے تھے اور انھیں امید تھی کہ شاید انھیں دوبارہ تنظیم میں کوئی عہدہ مل جائے لیکن چونکہ ان ہی کے نام یعنی محمد خراسانی کے نام سے ایک ترجمان ان دنوں تنظیم کے لیے کام کر رہے ہیں اس لیے انھیں کسی عہدے کی پیشکش نہیں کی گئی تھی۔
ایسی اطلاعات بھی ہیں کہ محمد خالد بلتی تنظیم کے قائدین کے قریب رہے ہیں اور تنظیم کے مختلف دھڑوں کے اتحاد کے لیے بھی کافی عرصے سے کوششیں کرتے رہے تھے۔
