ھو مرچی مئے راج ءِ بازیں کُٹم ھست اَنت، گوں ودار ءِ گرانیں نوبتاں دُچار کرتگ اَنت، ھمے گال کہ ودار ءِ درگت ءَ کنگ بوتگ، آ ھم بہ گند ءِ کہ اے نسبت ءَ نہ بوتگ، چوشکہ جاہ ءَ روگ ءِ یا وتی کسے ءِ آیگ ءِ انچیں بابت ءَ بوتگ، راستی یے ودار مردم ءِ آرام ءُ کرار ءَ پچ گیپت ءُ بے تاھیری ءِ گرانیں ساھتاں گوں دُچار ئِے کنت، اگاں ودار ءِ آماچ بوت ئے گڑا روھ ءِ زمین ءِ ھرچ ندارگ نہ وش گندگ بیت بےتاھیری انچُش وداں بیت، بیگاہ ءِ کوش، سھب ءِ سمین درینّ ءِ رنگ دراہ بے نما اَنت، ءُ کدی ھم مردم ءَ گوں باگ ءِ ڈولداریں پُل ءُ بلبل ءِ وشیں توار وَ کپوت ءِ کوکو ءُ ناکو پیزوک زیمُر ءُ نورھان ءُ آرپ ءِ الھان دراہ نہ وش لَگ اَنت ءُ زندماں ءِ دراھیں شاتکامی ھچ مانا نہ دار اَنت ۔
مرچی ھمے ودار ءِ گرانیں ساھتاں گوں دُچار کپتگ اَنت، مئے ھمک مات ءُ گُھار ءُ چُشیں گسے نیست کہ پشت کپتگ ءُ چَمّ ئِے ودار ءِ رھسرانی چاروک نہ اَنت، اگاں نامان اِش دیم بیار اَنت گڑا تاکانی تاک ھم چَکار بنت نام اِش آسر نہ بنت، بہ گند ناماں بگراں گوں کسے ءَ انساپ مہ بیت، مئے وتن شاھیگانیں بلوچستان ءِ ھمک وارس متاسر ھست اَنت ءُ کسے نام دیم ءَ آرگ مہ بیت،الم ھما کس ءَ را ازیت بہ رس ایت۔
اے نبشتھے سرھال ” بلوچ بیگواھیں پرزند اَنت، نام گپتیں اسلامی ڈیھ ءُ جھان ءِ ناشرکاریں اِستان “کادو ھجام ءِ ءُ برتاینہ ءِ پندلانی باپُشت ءَ ءُ ٹھینتگیں ڈیھ ھپتاد ءُ سئے سال ءَ رند ھم وتی کاگدی اڑ داتگیں دستور ءِ سر ءَ وت اَمل کنگ ءَ آمادہ نہ اِنت، دومی راجانی ھزار سالیگیں زمین کبزہ کُتگ اَنت ئِے ءُ راجدپترانی پُلگ ئِے بندات کرتگ ، کسے ءَ وتی راج ءِ دودمانی رکینگ ءِ گپّ جنت گڑا میاریگ اِنت بیگواہ کنگ بیت ءُ کُنٹے ماں کوہ ءُ جنگل ءَ دَور دیگ بیت، ھمے بیگواہ بیتگیں زمین زدگاں” چہ یکے ڈاکٹر دین بلوچ اِنت مرچی آئی چست کنگ ءِ دوازدہ سال سرجم اِنت، بیست ءُ ھشت جُلکان (جون ) دوھزار نُھ ءَ چہ اورناچ ءَ چیریں گلانی دْز ءُ رستریں کارمنداں چہ نادراہ جاہ ءَ چست کتگ،دین مھمد ھمے نادراہ جاہ ءِ میڈیکل آپیسر بوتگ وتی بزّگیں راج ءِ نادراھانی الاج ءُ ھزمت ءِکنگ ءِ زمہ واریاں ءپیلو کنگ ءَ بوتگ ءُ آئی گوں یک ھمے نادراہ جاہ ءِ دگہ نوکرے ساڑی بوتگ ءُ ھمائی چمّانی دیم ءَ نیم شپ ءَ کا اَنت ڈاکٹردین مھمد ءَ پہ زورانسری لٹ دینت گوں وت بر اَنت ۔
ڈاکٹر دین مھمد بلوچ ءِ بیگواھی بگر تاں روچے مرچی آئی دُتگ” سَمی دین ءُ مھلب دین وتی واجھین پِت ءِ آوار جنگ ءِ ھلاپ ءَ ھرچ ھما دروازگ ٹُک اتگ کہ پنجاب ءُ زورگیریں سروکاں توار سر بہ بیت،
بَلے !
سَمَی دین ءُ مھلب دین ءِ ھبر انگت ھچ کسے ءِ گوشاں نہ پُتر اَنت، چُک ئِے پہ زندماں ءِ سارتیں ساھگ ءُ گاریں وشیانی شوھازگ تُروارگ ءَ اَنت اے وھد ءَ گرانیں سکی ءُ سوریاں گوں دُچار اَنت ۔
چہ وتی وانوکاں پھلی لوٹاں ۔۔۔۔۔
اے دانکاں من نبیسگ ءَ آں کہ بلوچ ءِ ھکدار ءَ دَر بہ بنت ۔۔
اے ھم گپّ ھست!!
پِت ءِ بستار ءَ ھما کس بزانت کہ آ را وت ءَ پِت ھست، پنجاب واکدار یا سروک ھیرامنڈی ءِ ودی بوتگیں بے پت اَنت۔۔۔۔
پِت ءِ بستار ءَ پمیشکا نہ زان انت، ھرّوچ چُک پہ وتی بیگواھیں پِتانی آجوئی ءَ گریوگ ءُ زار ءَ اَنت ماں دگّانی سر ءَ زھرشانی کنگ ءَ اَنت، چُنت مات ءُ گُھار گوں ھمے واھگ ءَ اکس اش ماں دلانی سر ءَ داروک بوتگ اَنت، گوں ارمانیں دلے بیران بوتگ اَنت، اُپ کہ چونیں گرانیں ساھتاں مئے راج ءِ مات ءُ گُھار،جَن ءُ چُک اش دیمپاں کرتگ اَنت ۔
مئے راج ءِ بانکیں دتک سَمی دین ءُ مھلب دین ءِ پادانی پند شال تا کراچی ءُ نامرادیں اسلام آباد ءِ روگ ءُ زھرشانی راج ھچبر پراموش نہ بیت، ڈاکٹر دین مھمد ءُ زاکرمجید ءِ بیگواھی ءِ کھریں زند ءِ دوازدہ سال ءِ سرجم بوگ ءَ تیوگیں بلوچ راج گمیگ اِنت، گوں “سَمی دین ءُ مھلب دین یکجاتی ءَ ھور اُوشتاتگ۔ ۔
راجی رھشون ” زاھدکرد ءُ شبیرجان، رمزان جان ءَ ھوار دراھیں بندیگانی آجوئی ءَ انسان دوستیں گَل توار چست بہ کن انت تا بلوچ راج ءِ بیگواھیں پُسگ زوت واتر بہ بنت۔۔
بیگواھیں پُسگانی لوگانی رُژن واتر بہ بات اَنت ۔
