شانتُل رپتگیں ارواھاں زراں،،
بام بے چاڑیں چِڑکہاں کونجان انِت
کوش ھیسکارگاں دزگوْپیت زھیروکیں
گُلزمین تراولیں مولماں نازینیت شاگیں گوانزگ ءَ
کوہ ءُ تلاردیمیں ھسار اگریچیں بیراں بُنگراں
جنگلءِ مُرگ ءُ شانتُل رپتگیں ارواھاں زراں
رمگ بیگواھ بنت کاروان ءِ مُجتی
بھار ڈُکّالی نوبتاں پُرسیگ بنت
راج ءِ شیرزال ءُ بامردیں گُھار کریمہ
لبزانی جنگجاھے ءِ سُپاھیں کامریڈ
دور پندیں روانکانی مُھکمیں توکل
پِگر آشوب ءِ سُھرچکیں بامسار
زانگول بہ بنت کیننڈہ ءِ دمک ءُ ویرانگاں
برمش پالومپ بہ بنت کرِد بہ بنت سانکلاں
ھچ مہ نیت سیاشپیں میتگاں
دمک کورآس بہ بنت
دھر گوں گرْنچےءَ مُھر تیلاں بہ بیت
زندگی چو گُنگدامے ءَ زندگی ءَ پاھو بہ دنت
پنجاب ءُ چین ءِ باروٹی ئے
شاتکامی بہ کنت ،کندگ ءُ ٹھک بہ دنت
پہ گُھارئے ءِ شھادت ءَ
پہ مات ئے ءِ کوش ءُ زانگولی ءَ
پہ لجّانی پاسداریں کامریڈ ءَ
پہ آشوب چکّاریں کریمہ بانُک ءَ
باز اپسوز بیت
دید ارسانی ھوناں گرداں
کیننڈہ چو دژمن ئے رمیزاں بہ بیت
چو پنچاب ءَ چُک چینی ءِ چیرجنگی ءَ کِردے بہ کنت
زِرپھازیں ھملّانی گیرتاں گُٹگیر بہ کنت
گوں دُژمنیں باروٹیاں ھمنیاد بہ بیت
چو کینگانی ھَسار تیجار بنت
بلوچ ءِ ھاک جنگجاھے ءِ آزمان ئے ڈّک دنت
انچو چاکرے جہ جنت پہ پُرتگیزیاں
انچو ھملّ ئے شاگ ئے نول پہ پرنگیاں
مئے شھید ابدمان بنت
مئے شھید ابدمان بنت
