گنوک!
ڈیھ ءِ گنوک،
ڈیھ ءِ سرمتابیں بچّ!
گوں گُلزمین ءَ تئی مھر ءِ کُجام کِسّو ءَ بِیار آں۔۔۔۔۔؟
ھمُک کِسّہ ءِ بِندات ءُ آسر کنگ ءَ ند ءَ وتی ھاٹیگ شموشتگ ءُ بے ارواہ اِنت ، بس دیدگاں ھوناپیں جمبرانی جُڑاں بستگ ءُ گْوارگ ءَ اَنت ۔ ھیالانی رودپتر ءَ گْواچنیں مھرانی گمے لھم لھم ءَ بُجان ءُ چہ زِرد ءِ دِیوال ءَ سرکشّان۔۔۔۔۔۔۔۔۔۔۔۔۔۔۔یاگی ئیں وابانی یاگی ئیں اُمیتے ، ابدمان ءُ مُجّتی ئیں ڈسّ ءِ گیابان ءَ میتاپیں دوار ءِ پُولگ ءَ سرسر جنان ءُ پہ راہ گِیراں دیمونی ءِ دگے گوں زاپِرانیں ھوناں رجان۔۔۔۔۔۔
ھمے ھونانی ملپداں رُژن ءِ شیدائیں بالو چراگ ءِ گْورامبازاں زِندمان ءَ چو پروانگ ءَ ندْریگ کنان ، ھمے وڑ ءَ پہ ڈیھ ءَ کولیگ بوتگیں بچّانی سرپ ءَ دِگہ آشنائیں نامے ءَ وت ءَ نبشتگ کُت ۔
آ چیدگیں نام اِسھاک پنّام ء رھمین اِنت کہ مُدام جنگ ءِ میدان ءَ سِلاھبند اَت ءُ دُژمِن ءِ وابانی کلاتے ڈیرینتگ اَت۔ دُژمِن ءَ نپر کُت کہ بِیا من ترا زر ءُ کلدار دے آں تو چہ وتی راجی آجوئی ءِ جُنز ءَ دزکشّ بو ، تُپنگ ءَ چگل دے ءُ منی دیم ءَ سر ءَ جھل بکن ، مُپت ءَ پرچا وت ءَ کوہ ءُ اگاراں ، وار ءُ بزّگ کُتگ ، جنگل ءُ گیاباناں تچ ئے ءُ وت ءَ مئے تیر ءِ شِکار کن ئے ، گھ ھمیش اِنت کہ وت ءَ چہ مرگ ءَ پیسر مئے دیم ءَ پیش بکن ءُ سبز ءُ اِسپیتیں بیرک ءَ سلامی بِہ دے۔۔۔۔۔۔
بلے! رھمین ءَ ھمے کلوہ پہ دُژمِن ءَ دیم دات کہ من اے جُھد پہ اے ھاتِر ءَ بُنگیج نہ کُتگ کہ باندا تئی دیم ءَ سر ءَ پہ سُجدگ ءَ دور بِہ دے آں ءُ راجدپتر ءِ تاکدیماں پہ ابد رُزوا بِہ بَہ آں ، بلکیں من اے جُھد پرے ھاتِر ءَ بِندات کُتگ کہ وتی پدمنتگیں راج ءَ رُوژنائیں بانداتے بِہ دے آں ءُ ایردستی ءِ شپ پہ مُدیمی سبا بِہ بیت۔۔۔۔۔۔۔۔۔۔۔،گُلامی ءِ بدّیں بو ءُ بھار چہ منی ڈیھ ءِ چاریں آتراپاں وتی بار ءَ کُوپگ ءَ بِہ کنت ءُ پہ مُدامی بِہ لڈّ اِیت ،
گُڑا من اے ھبر پہ سِدک زانتگ کہ من شھید بَہ آں ءُ منی زھگ چورہ ، منی مکھیں مات ، برات ءُ گْوھار ، سیاد ءُ وارس ، کھول ءِ اے دِگہ مردُم ءُ ساہ بکشیں بیل ءُ سنگت ھم من ءَ چہ منی رَوَگ ءَ پد الم گیر کار اَنت ءُ بِہ گِندئے ارس ھم بِہ شل اَنت ۔
منی مھرانی ھُدابُند ءُ وابانی بانُک ھم چہ منی رَوَگ ءَ پد گوں زھگاں کہ دمے تھنا بیت، گُڑا ھِیڈیسک اِیت ءُ من ءَ ھر ساھت ءُ دمان گیر کار اِیت ءُ دِل ءِ آزگیں زیماں واد پِرشان اِیت ، گْوست ءَ چو آدینک ءَ دیم ءَ کنت ءُ مُروارِدیں ارساں شل اِیت ، لُنٹاں گٹ پاچ اِیت ءُ گوں زپتیں ترانگاں لیب کنت ، برے اکس ءَ چار اِیت ءُ وت ءَ تسلّا دنت ، برے ھیال ھیال ءِ تہ ءَ پہ گِریوگ ءَ باھند کنت ءُ من ءَ چہ وت ءَ گِستا مار اِیت۔۔۔۔۔۔۔۔۔۔
بلے! من اے کُل گُلزمین ءِ مھر ءِ باپُشت ءَ کِمار نہ کُت اَنت ءُ چاگل گوں تُوپّک ءَ ماں کُوپگاں دْرتک ءُ دیم پہ ھشیمیں کوھاں جُنز اِت آں کہ راج ءِ دیستگیں واب ءَ مانایے بِہ دے آں۔۔۔۔۔۔۔۔۔۔
مرچی چتور! من چہ وتی پِگر ءُ لیکہ ءَ لگور ءُ پدگرد بِہ بَہ آں ءُ تئی سلام ءَ بِیا آں کہ واجہ منی کچکول ءَ چہ لال ءُ گوھر ءَ سرّیچ ءُ چکار کنت ، واجہ من ءَ چہ شُدلاپی ءِ دوزہ ءَ کشّ اِیت ءُ سیرلاپی ءِ بھارگاہ ءَ سر کنت ، واجہ منی نیزگاری ءَ گوں ازگاری ءَ گوناپ دنت ءُ من ءَ دِگہ جھانے یے ھُدابُند کنت۔۔۔۔۔۔۔۔
چی ءَ کہ من اے جُھد تھنا پہ وت ءَ ، پہ وتی کھول ءُ زھگاں بُنگیج نہ کِتگ اَت کہ تئی داتگیں لب ءُ متاھانی دیم ءَ سرجھل بِہ بَہ آں ، بلکیں من اے جُھد پہ راج ءِ شیربامیں آکبت ءَ بُنگیج ءُ کولیگی ءِ راہ ءَ سپر کنگ بِندات کُتگ کہ باندا من وتی راج ءِ دیم ءَ ملامت مہ بَہ آں ، گُڑا چتور اے بدّیں نام من ءَ پہ وت ، پہ وتی گُلیں راج ءَ شات بیت کہ من تئی سلام ءَ بِیا آں ءُ سر ءَ جھل بکن آں۔۔۔۔۔۔۔۔۔۔۔۔۔۔؟؟
اے ھبر رھمین ءَ سابِت کُت ءُ پیشداشت کہ من مُرت کن آں ، بلے چہ وتی آجوئی ءِ جُنز ءَ گامے پد ءَ کِنز اِت نہ کن آں۔ مرچی آئی ءَ شِل سریں تیر باتِن ءَ جاگہ دات اَنت ءُ ڈگار ءِ سینگ ءَ واب کپت ، ءُ آئی ءِ واب ءِ مانا گوں آجوئی ءَ بیت۔ آجوئی مئے کُلیں شھیدانی دیستگیں واب ءُ راج ءِ مُجّتی ئیں زِندمان ءِ مانزمان اِنت ، پہ مُجّتی ئیں زِندمان ءَ ادارُکی زِندمان ءِ ندْریگ کنگ پہ ما کُلاں ھژدری اِنت ، اگاں نا وھد ءُ راجدپتر چو ریڈ انڈینانی داب ءَ کس ءَ نہ بکش اِیت۔۔۔۔۔۔۔۔۔۔
