پہ آزاتی ءِ چراگ ءِ بالینگ ءَ راجدپتر نویسیں راجاں وتی زِند ءِ ھر ساھت ءُ دمان ندْر ءُ کولیگ کُتگ ءُ زیر زِندی ءِ بدّیں روچانی دُرشک ءُ اگّڑ داتگیں ساھگ گوں ھونکّی ءَ بدل کُتگ۔ پمیشکا الجزائر ءِ راج گوں ھمے اُوگام ءَ دیم ءَ کِنز اِیت ءُ جار ءَ پِرّین اِیت کہ ” آزاتی لوٹگ نہ بیت ، زِنگ بیت "۔
پرے ھاتِر ءَ الجزائر ءِ آزاتی ءِ جنگ پہ مئے وڑیں زیر زِندیں راجاں راہ ءِ چیدگ ءُ شونداتی ءِ مِکّیں کوٹ ءُ کلات اِنت ، ءُ آزاتی ءِ جنگ ءَ الجزائری کوم ءُ راج ءَ ھوار دُگنیا ءِ ھر ھما راجاں پہ آزاتی ءِ زِنگ ءَ ھون ءِ جُوہ تاتکگ ، بلے مرچی ھما راج زِندگ نہ منتگ اَنت کہ آ بے مارِشت ءُ بے مارگی ءِ دوار ءَ واجہ ءِ سواسانی ساپ کنگ ءَ مُلمہ بوتگ اَنت۔
بَہ کَول ء کواس ءُ ساچِشتکارے کہ جاھے گْوش اِیت: کُجام راج کہ وتی دست ءِ سانکلاں تِلاہ سرپد بِہ بیت چہ آئی ءَ مستِریں بےاگل نیست ، چی ءَ کہ آئی ءِ زِند ادارُکی وشّی ءُ شاتکامیانی کورچات ءَ انچو کپتگ ءُ گُمسار اِنت۔۔۔۔۔پہ آئی ءَ راجی لیکو ءُ مکسد ھِچّ وڑیں مانایے نہ دار اِیت ، نیکہ آزاتی ءِ زیبائیں زِند ءِ مُلّ ءُ ارزِشت ءَ بلد ءُ سوھو اِنت۔
بس پہ آئی ءَ زیر زندی واجہ ھُدا ءِ داتگیں داد ءُ سوگاتے ، گُڑا اے دابیں راجاں چہ گار ءُ گُمساری ءَ کسے پھاز اِت نہ کنت کہ آ وتی پجّار ءُ دودمان ءِ ھُلکہ ءَ پہ مُدامی زِندگ بِہ مان اِیت۔۔۔۔۔۔۔۔
مرچی بلوچ راج پہ وتی راجی زرمبش ءِ دیم ءَ جُنزینگ ءَ گوں ھوناک ءُ ھوناپیں جنگے ءَ دیمپان اِنت ، ڈیھ ءِ چاریں آتراپ ءُ تیوگیں در ءُ دمکاں ھوک ءُ تولگانی ھُولگ ءُ ھُولّاسگ اِنت۔ ناھاری کارپدانی نپت ءُ بیر ءِ جکسگ اِنت۔
بلے مرچی اے دُژمِن ءِ کُلیں زورانسری ءُ آزاتیں دُگنیا ءِ بے کِماری مئے راہ ءِ اڑاند ھِچّ رنگ ءَ نہ بَہ اَنت۔۔۔۔۔دانکہ ما گل ءُ تنزیمے ءِ دْروشم ءَ دیم پہ وتی چراگیں مِنزل ءِ پاند ءَ جُنزگ ءَ اِیں ،
چی ءَ کہ اے شِنگ ءُ شانگیں تاکت ھما روچ ءَ دُژمِن ءَ تیلانک دنت کہ آ گل ءُ پاٹی یے پابند بیت۔ پمیشکا اے نپس سِندیں گْوانک مُدام گُوشاں ھلوت کنت کہ بلوچ راج ءِ یکمُشت ءُ تِپاکی وھد ءِ توار اِنت ، ءُ تِپاکی راجانی باندات ءِ مانزمان اِنت۔
پرے ھاتِر ءَ مارا راجی آجوئی ءِ لیکو ءِ پُژدر ءَ وتی تِپاکی ءِ سنگر مُھکم کنگی اِنت دانکہ دیستگیں واب بے مانا مہ بَہ اَنت ، ءُ بلوچ راج ءَ را ھم اے دلجمی بِہ بیت کہ گُلام ءُ ایردستیں راجانی وشھالیں آکبت کْوزہ گیر ءِ پارلیمنٹ ءَ نا ، بلکیں گوں آجوئی ءَ ھمگرنچ ءُ بندوک اِنت ۔
چی ءَ کہ گُلامی ءُ ایردستی کوراسیں شپ ءِ درور اِنت ، پہ تھاریں شپ ءِ روژنائی ءَ آجوئی ءِ چراگ ءِ بالینگ ھژدری اِنت ، اگاں نا اے گُلامی ءِ شپ ءِ تھاری چو اژدِھا ءَ پِلِکّ اِیت۔۔۔۔۔۔۔۔۔۔۔۔
مرچی بلوچ راج وھد ءِ ھما پدیانک ءَ اُوشتاتگ ، پہ آئی ءَ ھمتواری ءَ جُنزگ زِندگ بُوَگ ءِ اولی ءُ گُڈّی جار اِنت ، اگاں نا پاکستان گوں چین ءِ ھمراھی ءَ تئی ڈیھ ءَ چو کہ مان کپتگ۔۔۔۔۔پہ ترا ھِچّ نہ مان اِیت۔۔۔۔۔۔۔
پہ چین ءُ پاکستان ءِ دیم ءِ دارگ ءَ ترا وتی راجی تاکت ءِ سر ءَ بھیسہ کنگی اِنت ، وھدے تو وتی شِنگ ءُ شانگیں تاکت چِت ءُ نزّارت۔۔۔۔۔گام دیم ءَ شھار دات اَنت۔۔۔۔۔گُڑا دُگنیا ءِ بے کِماری وت ، وتی دنز ءُ مُجاں چنڈّان کنت ءُ پہ ترا دِرکّ بند اِیت کہ تئی بے وسی ءَ شالے پوشاں۔۔۔۔۔۔۔۔
پمیشکا مئے واستا ھمسنتی ءُ تِپاکی ءِ سنگر ءِ مُھکم کنگ ھژدری اِنت دانکہ وھد ءِ ھمراھی ءَ پشت مہ کپ اِیں ءُ بے نام مہ بَہ اِیں۔۔۔۔۔۔۔۔، چی ءَ کہ ” آزاتی لوٹگ نہ بیت ، زِنگ بیت "۔۔۔۔۔۔۔۔
