ماہ جوھان اَت ءُ مِھلبیں کَوش شیکّـگ ءَ اَت کہ من ءُ تو گوں سنگتاں دیم پہ مچکدگ ءِ وابجاہ ءَ راہ گِپت اِیں ۔ وھدے مچکدگ ءَ سر بوت اِیں ، چاراں کُلّیاں مچکدگ سر ءَ زُرتگ اَت ءُ گوں وتی زیمریں توار ءَ گْوش ئے سَوت الھانگ ءَ اَنت ۔وھدے کُلّیانی اے زیمریں توار ءِ اِش کنگ ءَ من ءَ چیف اسٹیل ءِ گْوشتگیں دانکے گیر اتک ۔ آ گْوش اِیت : اے مُرگ گوں وشیں توار ءَ وھدے الھان کن اَنت۔۔۔۔۔گُڑا من ھمے سرپد بَہ آں کہ آشوبی سَوت گْْوشگ ءَ اَنت ءُ شھیداں نازینگ ءَ اَنت۔۔۔۔۔۔۔۔۔۔۔۔۔۔۔۔۔۔۔۔
لکمیر!
من گوں ھمے ھیالاں گیروشگ اِت آں کہ تو گوں لھمیں بچکندے ءَ درّائینت ، مرچی مچکدگ گوں بُلبُلانی شینزارگاں بھشت ءِ چھرگ ءَ جنت ۔ دومی نیمگ ءَ ماھِکانیں شپ ءِ زیبائی کہ ھر نیمگ ءَ چم پہ ماتیں مرزبُوم ءِ بے دَروَریں جلواہ ءَ کپ اَنت۔۔۔۔۔۔گُڑا دِل بود کار اِیت ءُ توکل ءَ ھاٹیگ رس اِیت۔۔۔۔۔۔۔۔۔۔۔۔۔۔۔۔
بس اے ھُوشامی ئیں زِرد ترا پہ آجوئی بِہ گِند اِیت یا ھُوناں تئی دامُن ءَ بِہ ریچ اِیت ، بلے پہ ھلو ھالو تو بکشگ نہ بَہ ئے کہ دُژمِن شاتکامی بِہ کنت ءُ آیوکیں پدریچ وتی جِند ءِ ھکّیں بُندر ءَ درآمد بِہ بیت یا چو پلستینی گْونڈل ءَ مارا پِٹّ ءُ لانت بِہ کنت۔۔۔۔۔۔۔۔۔۔۔، اے ھبر شات نہ بیت مارا پہ وتی بالاد ءَ ۔ مرگ زِند ءِ گُڈّی مِنزل اِنت ، چہ مرگ ءِ تُرس ءُ بیمّ ءَ کدی تچگ نہ بیت ، گُڑا ھما مرگ ءَ پہ وت شات بکن کہ آیوکیں پدریچ پِٹّ لانت کنگ ءِ بَدل ءَ پھر بِہ بند اِیت ءُ ناز بِہ کنت کہ من کئی پدریچاں۔۔۔۔۔۔۔۔۔۔۔۔۔
چرئے گپّاں پد من پسّو ترّینت ءُ گْوشت ، ھَو لکمیر جان تو راست گْوش ئے۔۔۔۔۔۔۔!!
اگاں ما پہ آیوکیں پدریچ ءِ ھاتر ءَ جُھد مہ کن اِیں ءُ کُربانی مہ دے اِیں ، انچُوش کہ مرچی ما گْوش اِیں۔۔۔۔۔ مئے پِت ءُ پیرُکاں کُربانی بِہ دات اِیں ما اے ایردست ءُ گُلامیں زِند نہ گْوازینتگ ءَ ، باندا الّم آیوکیں پدریچ ھم ، ھمے گپّ ءَ جنت ءُ مارا میاری کنت۔۔۔۔۔۔۔۔۔۔۔۔۔۔
بلے!
لکمیر تو مرچی زِندان ءِ تھاریں کُوٹی ءَ وتی گْوشتگیں کَولانی پُژدر ءَ نہ زان آں پہ راجی باندات ءِ ھاتر ءَ دُژمِن ءِ چونیں زُلمانی دیم ءَ آھنیں بالاد میلانک کُتگ ،
اِنچو زان آں تئی لاگریں ڈیل ءِ واک ءُ توان ءَ دُژمِن ءِ ریز ءُ پُوپلیں سانکل پْروش دات نہ کن اَنت ، چے ءَ کہ راجی پِگرانی مِنزل ءِ راھی وتی ندْر ءُ کُربان کنگ ءَ ساڑی بَہ اَنت بلے سر جھلی ءُ دُژمِن ءِ پادانی دیم ءِ کپگ ءَ پہ وت شات نہ کن اَنت۔۔۔۔۔۔۔۔۔۔۔۔۔۔۔۔۔۔۔۔۔
پمیشکا من جزمّاں لکمیر کہ تو زِند ءِ مانا ءُ مکسد ءَ سوھو ءُ سرپد ئے ، پہ اھد ءَ سُکراتے بَہ ئے۔۔۔۔۔۔۔۔۔۔۔بلے چہ وتی وارتگیں کَول ءُ سوگِند ءَ پد کِنز نہ بَہ ئے۔۔۔۔۔۔۔۔۔۔۔۔۔
لکمیر!
اے ھبر ءَ ھم ترا ھال دَیَگ لوٹ آں کہ چہ تئی زِندانی ءَ پد مچکدگ ءُ ماھِکانیں شپ ءِ تْرانگ منی زِرد ءِ رودپتر ءَ نبشتگ اَنت کہ کدی بے ھیال ءُ شموشگ نہ بَہ اَنت۔ کُجام وھد ءَ گوں مچکدگ ، کُلّی ءُ ماھِکانیں شپ ءَ دُچار بِہ کپ آں۔۔۔۔۔۔۔۔۔گُڑا تئی گیرانی کماتگیں لڑ پرّیچان بیت ءُ یکرندے پد ءَ ماں ھما مچکدگ ءَ بارت کہ دو وار منی سر انگت نہ کپتگ ، بلے گوں تئی زپتیں یاتاں من ھرّو آ مچکدگ ءِ سیل ءُ سواد ءَ رَو آں۔۔۔۔۔۔۔۔۔۔۔۔۔۔۔۔
انوں اے ساھت ءَ نہ زان آں تو کُجام جیڑگ ءُ مارِشتانی دیمپان ئے ، بلے اے ھبر ءَ پہ سِتک گْوش آں تئی گیرانی لڑ ترا مِسکیں ڈگار ءِ برے میتگے ءَ بارت ءُ دیوان پرمائیت۔۔۔۔۔۔۔
بلے! من گوں ھمے ھیالاں تئی گیرانی ھنکین ءَ وت ءَ سھڑیناں کہ بِِہ گِند ئے تو بِیائے ءُ مارا چہ شھدیں بچکنداں دوبر بھر مند بکن ئے ۔۔۔۔۔۔۔۔۔۔۔۔۔
شالا انچوش بات۔۔۔۔۔۔۔۔۔
