اھد نویسیں راجپان ، سرڈگار ءِ شیشاریں اِشک ءَ مھر ءِ ھُوشامی ئیں مُساپِر ، شیدائی ءَ انچو گْور جتگ ءَ ، دِگہ ھِچّ چیز ءِ سما ءَ نہ اَت ۔ نا گرم ءُ سارت۔۔۔۔۔۔۔۔۔۔۔نیکہ اِشکریں گُژن۔۔۔۔۔۔۔۔۔۔۔
تھنا گوں وتی مھروان ءِ گم ءَ زِندگی کنگ لوٹگ ءَ اَت ، ھما زِند کہ آئی ءَ چہ مھروان ءِ ھُوشامی ئیں مھر ءَ دست کپتگ اَت ، ھما گم آئی ءِ زِندمان ءِ اولی ءُ گُڈّی بھر جوڑ بوتگ اَت۔۔۔۔۔۔۔۔۔
ھمے گم ءِ چاڑاں مُدام ھنوش ءُ ملار اَت ، آئی ءِ باتِن ءَ اے ھیال کدی نیاتک کہ اے سپر ءَ زِند گوں گْرانیں اڑ ءُ جنجالاں ، سکّی ءُ سُوریاں ، گم ءُ مُشکِلاں مانگیشّ اِیت۔۔۔۔۔۔
بلکیں سرڈگار ءِ شیشاریں اِشک ءَ آئرا مھر ءِ اے سبکّ داتگ اَت ، تو کہ پہ اے سپر ءَ وتی شِپادیں گام بستگ اَنت ، گُڑا اے شِپادیں گامانی ھمراھی ءَ ترا وتی توکل ءِ ساد ھم مھکم ڈکّ دَیَگی اِنت دانکہ پرّیچگ ءِ بدل ءَ گیش ریس ءُ پرّیساں تاب وران بِہ بیت، بلے مہ سِد اِیت۔۔۔۔۔۔۔۔۔۔۔
چی ءَ کہ تو زانتگ اَت۔۔۔۔۔۔۔۔۔۔۔۔۔۔! چاگِرد ءِ لبّ ءُ تماہ ءِ آس ءَ سُتکگیں گنوک ،ترا ھم گنوک گْوش اَنت۔ بلے راستی ءَ تو گنوکے اِت ئے۔۔۔۔۔۔۔۔۔۔۔،
تو ھما گنوک کہ ترا دُگنیائی ءِ ھِچّ سُدّ ءُ سما نیست اَت۔۔۔۔۔۔بید ء ڈیھ ءِ گم ءَ ، ءُ ھمے گم تئی ساری ءُ شھپگری ءِ مستِریں منّانک اَت۔۔۔۔۔۔
پمیشکا ترا پند بُرّگی اَت ، چی ءَ کہ اے پند ءِ دنز ءُ گُبار کہ چو پُکّی ءَ چِست بوتگ اَنت ، اِیشاں ترا چو مِھلب ءَ وشبو چکاریں اشکامے شکساتگ۔۔۔۔۔۔۔۔۔
ھما وھد ءَ تئی کہ سر زِندان ءَ کپتگ اَت ، تو زانتگ اَت کہ گوں ترا چے چے بوتگ ، بلے تو کُلیں درد ءُ دور پہ سبر ءُ تھمبل وتی کُت اَنت ءُ دیم ءَ جُنز اِت ئے پہ ھونکّیں مِنزل ءِ سبائیں بُنجل ءَ۔۔۔۔۔۔۔۔۔۔۔
چی ءَ کہ اے رُوژنائیں مِنزل ءِ سارتیں ساھگ پہ راج ءِ آیوکیں پدریچ ءَ۔۔۔۔۔۔۔۔۔۔، اگاں کسے ءَ اے جیڑ اِتگ کہ من پند بُرّگ ءَ آں۔۔۔۔۔۔۔۔۔من ءَ اے سارتیں ساھگ ءَ ساسار کنگی اِنت ، گُڑا اے آشوبی لوٹانی گواچنیں مانا نہ اِنت کہ ما دِل بستگ۔۔۔۔۔۔۔
بَہ کَول ء شھزانتیں سید کہ جاھے گْوش اِیت:
داں کہ جل ماں تئی دریائیں دِل ءَ آچ نہ بیت
پہ تئی بانوراں گُلیں تنگھّیں پرداچ نہ بیت
پمیشکا چو تئی داب ءَ اے دریائیں دِل ءِ چَولانی دیم ترّینگی اِنت دانکہ آشوب ءِ بوجیگ وتی کِبلہ ءَ راست بِہ کنت ءُ مِنزل ءِ پاند ءَ سر بِہ گیت ، چی ءَ کہ آشوب ءِ لوٹانی پیلو کنگ مارا مئے جِند ءَ ڈسّ اِیت۔ ءُ وتی ڈسّگ۔۔۔۔۔۔مِنزل ءِ ڈسّ اِنت ، اگاں کسے وت ءَ مہ ڈسّ اِیت۔۔۔۔۔۔گُڑا مِنزل ءَ کدی سر نہ بیت۔۔۔۔۔۔۔
بلے مرچی تو پہ دلجمی وتا ءُ وتی مِنزل ڈسّ اِت ، چی ءَ کہ ھما مِنزل ءَ تو پہ پھر ءُ شان رھادگ اِت ئے۔۔۔۔۔۔۔۔آ مِنزل ءِ دگ شِل سریں کُنٹگاں چکار ، ھوناکیں جمبراں بستگ اَت ءُ مُدام نپت ءُ بیر گْوارگ ءَ اَت۔ ھر گام ءَ ملکموت پہ وش آتک ءَ ساڑی اَت ، بلے ھمے دگ ءَ تو گوں وتی مُھکمیں توکل ءَ پند بُرّگ ءَ اِت ئے ، ھمراھاں سِکین ءُ سرپدی شکساھگ ءَ اِت ئے ، دمبرگ ءِ نام نزانت۔۔۔۔۔۔۔۔۔۔، بس سپر۔۔۔۔۔۔۔۔۔۔سپر۔۔۔۔۔۔۔جُنز۔۔۔۔۔۔۔جُنز۔۔۔۔۔۔۔
چی ءَ کہ اے جُنز تھنا پہ تئی کھول ءُ سیاداں نا ، بلکیں اے جُنز راجی آجوئیں آکبت ءِ مانزمانی ءِ سوب مندیں منّانک اَت ، ءُ ھمے جُنز ءَ را تئی ھونانی پکار اَت۔۔۔۔۔تو چک ءُ پد نہ بوت ئے۔۔۔۔۔۔
مرچی تئی پہ زیبائئں ڈیھ ءُ ماتیں بُندر ءَ داتگیں دیمونی راج ءِ ورنایانی واستا مُدیمی ئیں درونت ءُ سِکینے منتگ ، ءُ ھمے درونت مارا مئے۔۔۔۔۔مِنزل ءَ سر کنت۔۔۔۔۔۔۔۔
بلے تو پہ مُجّتی ابدمان بوت ئے! تئی دیمونی ءِ رَتکگیں کِسّہ راجدپتر ءِ تاکانی جلواناکی اِنت ۔ پمیشکا من پہ جزم گْوش آں! اگاں کسے تئی رند پداں دیم پہ مِنزل ءَ سپر بِہ کنت ، آ وھد ءِ دنز ءُ مُجاں کدی بیگواہ نہ بیت۔۔۔۔۔۔۔
بلکیں شپاں چو چاردھی ماہ ءَ بلیت ءُ ھر سبا گوں روچ ءِ زگریں بْرانزاں زمین ءِ دِلبند ءَ وتی گاماں اِیر کنت ءُ راج ءِ ھر پُسّگ ءِ دِل ءِ دِریکگاں زُبانے دنت۔۔۔۔۔۔۔۔۔۔۔۔
