نور پہ بِچکند مکھیں مات ءِ کُٹ ءَ واب کپت ، نور ءَ پہ تمردی دُژمِن ءِ تیرانی دیم چو سائجی ءِ تیھریں بالاد ءَ داشت ، نور ءَ سنگریں مزن بند ءِ ڈیل گوں وتی زگریں ھوناں گوناپ دات ، نور ءَ وتی سالونکی ءِ ارمان ءُ تْراولیں واھِشت گوں گُلزمین ءِ مھرّانی سرّیچیں تاس ءَ مینت اَنت ، نور ءَ وتی وابانی زبادیں بانُک وشبوئیں ھاک ءِ سھاریں آکبت کُت ، نور ءَ ھیرآباد ءِ ڈُکّالیں زید یکرندے پد ءَ گوں وتی ھوناں بھارگاہ ءِ پلو ءَ گِرھن دات ، نور ءَ وتی ارواہ آیوکیں پدریچ ءِ باتِن ءَ کلّ کُت ءُ نمیران بوت۔۔۔۔۔۔۔۔۔۔۔۔
بلے! ھمے کَولانی پاسداری ءَ نور ءِ گامانی ھر نِشان مارا مئے مِنزل ءَ شون دنت ءُ گْوش اِیت ، نور گوں وتی چنگ بروتیں سنگت ءُ بیلی اِمداد جان ءَ پہ کَے ءَ کَولیگ بوت۔۔۔۔۔۔۔۔؟
ھمے جُست ءِ پسّو ءَ کَے دنت۔۔۔۔۔؟
من سرپد بہ آں اے جُست ءِ پسّو ءَ مئے دیمونی بِہ دے دنت ، چی ءَ کہ مرچی منی ند پہ ھاتِر بندی نویسگ ءَ نہ اِنت ، بلکیں اے آئی ءِ داتگیں دیمونیانی ابدمانیں کِسّو اِنت کہ من ءَ پہ نوشتہ کنگ ءَ مجبُور کنگ ءَ اِنت۔
ھو! اے گپّ ءَ الم گْوش آں ، منی ند سددرسد گوں آئی ءِ مزن شانیں کِرد ءُ داتگیں دیمونیاں اِنساپ کُت نہ کنت ، بلے وت کہ چیزے نویسگ ءَ اِنت۔۔۔۔۔اے ھما راستی اِنت کہ نوشتہ بُوَگ لوٹ اِیت۔۔۔۔۔۔۔۔۔۔
چی ءَ کہ راستی کدی نِوان ءُ اندیم کنگ نہ بیت ، انچو کہ گْوش اَنت روچ پہ شار کدی اندیم نہ بیت۔۔۔۔۔ھمے داب ءَ اگاں زُوراک ستر پہ راستی ءِ چیر دَیَگ ءُ ڈبّگ ءَ لانکبند ءُ پُر سِلاہ بِہ بیت۔۔۔۔۔۔بلے راستی انگت چو روچ ءَ وتی برانزاں ھر دریگ ءِ دِلبند ءَ شھار دنت ءُ وتی آشنائی کنت کہ من کَے آں۔۔۔۔۔۔۔۔؟
پمیشکا من گْوش آں ریاست پاکستان ءِ رستریں لشکر کُجام داب ءَ مئے شھیدانی مِسک مینتگیں جوناں وتی وڑ ءَ کلّ ءُ کونڈم بِہ کنت ، بے پد ءُ برمشیں گیابانں چگل بِہ دنت ، چہ زمین ءِ مھر ءَ سِست اِش کدی نہ کنت۔۔۔۔۔۔۔۔
چی ءَ کہ زمین ءِ مھر پہ زر ءُ کلدار بھا نہ رس اِیت کہ پہ بھا زُورگ بِہ بیت ، بلکیں اے ابرم ءِ مھر اِنت کہ مات ءِ پاسپانی ءَ لاڑیں بچّ ءُ یلیں پُسّگاں گوں ملکموت ءَ جنگ کنگ پرمائیت۔۔۔۔۔۔۔۔۔۔
ءُ اے گْواچنی ءَ گیدی ءُ راجدپتر ءِ ھِچّ تاکدیم رد نہ کنت کہ مرگ امبازیں راجاناں زُوراکاں پہ مُجّتی وتی زُورانسری ءِ کید ءُ اِشکیلاں داشتگ ، بلکیں آیاں گوں وتی دیمونیاں اے سابِت کُتگ ءُ پیش داشتگ کہ راج گوں کُربانیاں مان اَنت۔۔۔۔۔نیکہ پہ چاچ ءُ بٹاک ءِ درشانگ ءَ۔۔۔۔۔۔۔۔۔۔
مرچی بلوچ راج ءِ ورنایاں اے سابِت کُتگ کہ راجی آجوئی ءِ مُلّ سرانی کَولیگی لوٹ اِیت ، ءُ ھمے دگ ءَ پند بُرّگ ءَ اَنت ءُ راھی اَنت۔۔۔۔۔۔
دِلجماں آجوئی ءِ نوک چہ رولھی شینکانی مْیان ءَ گُلیں راج ءُ راج پانیں سراناں مِستاگی گیت ءُ شادِھانی منگیر پہ مُدامی مان اِیت۔۔۔۔۔۔۔۔
