زمین ءِ آشکانی کِبلہ زیردستیں ڈیھ ءِ آجوئی اِنت۔۔۔۔۔۔۔۔۔۔، پہ آجوئی ءَ بے تْرھیں درد ءُ رنجانی گٹّیں راہ بُرّگی اِنت۔۔۔۔۔۔۔۔۔۔، تُنّ ءُ گُژن ءِ سپر ءَ گامانی ھاٹیگ گوں مُھکمیں توکل ءِ آس ءَ ماندارگی اِنت۔۔۔۔۔۔۔۔۔۔۔۔۔
دانکہ پند ءِ بُرّگ ءَ ھوار آشوبی کَیپ ءِ چاڑ توانمند بِہ بیت ءُ لیکہ ءِ زیمر گوں شھیدانی دیستگیں واب ءَ بِہ شِنگ اِیت ءُ وتی مانا ءِ سِتکیں پرّیچ ءَ ھمے زانت ءُ زانگ ءَ بِہ شکسائیت۔۔۔۔، کہ اے ھون ءِ رگام وھدے چہ زمین زادگانی مِسکیں ھوناں گْوار اِیت۔۔۔۔۔۔
گُڑا پہ جزم اے ویرانگاں ڈُکّال ءِ پدمنتگ ءُ دْرشکیں موسم وتی بالاں بند اِیت ءُ گُڈّی ساسار ءَ گوں بھارگاہ ءِ شھدیں بچکنداں پْروش اِیت۔۔۔۔۔۔۔۔۔۔۔
بلے! ھمے درس زمین آشکانی ھمراھی ءَ راج ءِ ھر پُسّگ ءَ را دربرگی اِنت ءُ وتی کِبلہ تچک کنگی اِنت۔۔۔۔۔۔۔۔۔۔۔۔۔۔دانکہ باندا راستی ءِ جار گوں آتارگ ءِ پُر مھریں لیکواں وت ءَ بِہ گْوپ اِیت ءُ پدّر بِہ کنت۔۔۔۔۔آکبت مانزمانی ءِ کِسّہ راجدپتر ءِ تاکاں نبشتگ بِہ بیت۔۔۔۔۔۔
ھمے وڑ ءَ پہ اے دِگہ زیر زِندیں راجاں اے درونتے بِہ مان اِیت کہ دیمونی داتگیں راجانی رندپداں کسے پہ دیمونی دَیَگ بُہ جُنز اِیت ءُ سپر بِہ کنت۔۔۔۔گُڑا آ الم وتی ڈسءُ نشان۔۔۔۔۔۔۔مِنزل ءُ مُدیمی ئیں بُنجل ءَ سر بیت۔۔۔۔۔۔۔
من ءُ تو ، راج ءِ ھر زھگ بِہ جیڑ اِیت کہ منی راج ءِ راجی زِندمان ءِ سمبھینگ ءَ من چے کنگی اِنت ، انچو کہ مُسلم ھُسین ءُ منسور جان ، سِکندر ءُ سادُو جان وتی پرز ءُ راجی ڈُبّہ ءَ کُجام داب ءَ پیلو کن اَنت۔۔۔۔۔۔۔ھمے داب ءَ مارا ھم وتی راجی ڈُبّہ پیلو کنگی اِنت۔۔۔۔۔۔۔۔
چی ءَ کہ تو وھدے راجی جنگانی گْواچِنیں داستان ءُ گْوستانک ءَ وان ئے گُڑا ترا ھمے نبشتگیں تاکدیم گِندگ ءَ کَیت کہ راجی تاکت ءِ دیم ءَ گیدی ءِ ھِچّ تاکت نہ جلّ اِتگ۔۔۔۔۔۔نیکہ جلّ اِیت۔۔۔۔
مرچی پاکستان ءَ پہ تئی گار ءُ گُمساری ءَ جنگ ءِ ھر پِڑ ءَ مان داتگ ءُ گوں تْرندی ءَ گاماں دیم ءَ شھاران اِنت ۔ کُشگ ءُ ٹپّ ءُ ٹوریں جونانی ماں جنگل ءُ ویرانگاں چگل دَیگ۔۔۔۔۔۔۔۔، برّگ ءُ زِندانی گار ءُ بیگواہ کنگ۔۔۔۔۔۔۔، لجّ ءُ ننگ ءِ لگتمالی۔۔۔۔۔۔، کُڈُک ءُ گدانانی آس دَیَگ۔۔۔۔۔۔۔۔۔ھِچّ پش نہ گِپتگ۔۔۔۔۔۔۔۔
اگاں ما انگت وتی راجی تاکت ءُ یکمُشتی ءِ درنگازی ءَ مہ کن اِیں۔۔۔۔۔۔گُڑا کد۔۔۔۔۔۔۔؟
اے جُست مئے مجگ ءَ کد اِیر کپ اِیت ءُ وتی پسّو ءَ پُول اِیت۔۔۔۔۔۔۔۔؟
ھمے پسّو ءِ پسّہ کنگ مئے راجی آکبت ءِ رُوژنائی اِنت ، ھمے پسّہ دانکہ ما نہ پُول اِتگ مارا دُژمِن ھر گام ءَ تاوان دنت ءُ وت شاتکامی ءِ بیٹ سراں شادان بیت ۔
اگاں یک نِگاھے تو وتی جُھد ءُ جنگ ءِ سر چمشانکے بِہ دے۔۔۔۔۔گُڑا الم گِندئے کہ تئی جنگ ءُ جُھد ءَ دُژمِن چینچو آسیگ کُتگ ، ءُ ھمے آس دُژمِن ءَ پہ دائِمی سوچ اِیت ءُ پُر کنت۔۔۔۔۔۔
ھمے آس کہ ما دار ءِ بدل ءَ گوں جوناں رُوک کُتگ۔۔۔۔۔۔، ھمے آس مارا مِرگ ءَ نئیلگی اِنت ، اگاں بے بلاہ اے آس مُرت۔۔۔۔۔۔ما ھمے سرپد بِہ بَہ اِیں ءُ شرّی ءَ نِہ زان اِیں کہ اے آس نہ مُرتگ۔۔۔۔۔۔۔۔، بلکیں ما مُرتگ اِیں۔۔۔۔۔۔۔۔۔۔
چی ءَ کہ اے رُوکیں آس مئے زِندگی اِنت۔۔۔۔۔۔۔، اگاں اے آس مُرت گُڑا ما ھم مِرّ اِیں۔۔۔۔۔۔۔، پمیشکا مارا پہ وتی زِندگ بُوَگ ءِ واستا اے آس مرگ آماچی ءَ کدی نئیلگی اِنت۔۔۔۔۔۔۔چونیں کہ دیمونی دَیَگ ءِ درکار بوت۔۔۔۔۔۔۔۔مارا پدکِنِزگ ءِ بدل ءَ گام دیم ءَ شھارگی اَنت ءُ اے آس بالگی اِنت۔۔۔۔۔۔۔۔۔
ھو! اے آس بالگی اِنت۔۔۔۔۔۔۔۔۔۔، چی ءَ کہ اے آس مئے زِندگی اِنت۔۔۔۔۔۔زِندگی۔۔۔۔۔۔۔
