زِندمان ءِ آپریچ ءَ کسے پہ ڈیھ ءِ پھازگ ءَ سوگاتیں سر ءَ ندْریگ کنت، گُڑا من ماں دردیگ بُوَگ ءِ بدل ءَ زِرد ءِ تھاریں کُڈُک ءَ چراگے بالان ءُ اھد کن آں!
زِندگی تو اے نگدیں موسم ءَ دِگہ چُنت سالونکیں سر پہ کَولیگی لوٹ ئے۔۔۔۔۔۔؟
اے مزارانی سرڈگار اِنت ، پہ روباه ءُ تولگی ھُولّاسگاں ڈیھ ءِ شیر ءُ مزار بیمّیں پُسّگ مرگ ءَ پہ کلوھے گون کن اَنت ، مِستاگی ئیں بام ءِ وش آتک ءَ ھوناکیں جمبرانی پُٹّواں گْوار اَنت ءُ ملپدے رند اَنت۔
مرچی مشکے ءِ دِلبند ءَ سالونکیں بچّاں پہ مُرادے وتی وابانی مانا کنگ ءَ بے مُلّیں سر ءُ ارواہ باھینتگ اَنت ءُ مارا ھمے دگ ڈسّ اِتگ کہ راج پہ جنگ ھتم نہ بَہ اَنت ، بلکیں راج ھما وھد ءَ چہ وتی ھُنڈالاں ولگوج کنگ بَہ اَنت کہ چہ آیاں آئی ءِ مِسکیں ڈگار پچگِرگ بِہ بیت۔۔۔۔۔۔
اے جنگ پہ ڈیھ ءِ آجوئی ءَ ، اے جنگ پہ راجی آکبت ءِ سمبھینگ ءَ ، اے جنگ پہ آیوکیں پدریچ ءِ وشھالی ءَ ، اے جنگ پہ وتی ھستمانی ءِ رکّینگ ءَ ، اے جنگ پہ شرپداریں زِندے یے گْوازینگ ءَ۔۔۔۔۔۔دانکہ راجدپتر ءَ ما رُزوائی ءِ بدل ءَ ھما راجانی داب ءَ زِندگ بِہ مان اِیں ءُ مئے جنگ ءِ داستان پہ اے دِگہ ایردست ءُ گُلامیں راجاں سبکّے بِہ مان اِیت۔۔۔۔۔۔۔
گُڑا پہ ما ھژدری اِنت کہ ما چو جنگولیں مُسلم جان ءَ ، چو ملّیں منسور ءُ آسریچیں سِنکندر ءَ ، چو کُنگُریں ساداللہ ءِ داب ءَ وتی شاشانیں ڈُوبر ءَ مِکّ بِہ کن اِیں ءُ دُژمِن ءَ پہ پادتراپ اے کلوہ ءَ بِہ دے اِیں کہ مئے ھونانی ھار ترا انچو پتار دنت کہ تو چہ بُن ءُ بُنچَلّ ءَ بیگواہ بَہ ئے۔۔۔۔۔۔۔کس ترا پہ کلھے گیر نیار اِیت ، ھو! ابیدے رُسوائی ءَ۔۔۔۔۔۔۔۔۔۔
پمیشکا اے ھبر بَہ کَول ء
Mutawalli Shaarawi
پہ ھما بے زِرداں مزنیں بِستار ءُ ارزِشتے دار اِیت کہ آیاں وتی زِرد ( ضمیر ) ءِ سودا پہ چندے لب ءُ متاه ءِ ھاتِر ءَ جتگ۔ ” اگاں راست گْوشگ چہ تئی ھاٹیگ ءُ بالاد ءَ در اِنت۔۔۔۔گُڑا پہ دُروگ ءِ واستا کم ءَ چہ کم مہ نِند ءُ چاپ مجن ” ۔
مرچی ھمے ورنا کہ پہ تئی سُھر دپیں بانگواہ ءِ ھاتِر ءَ گوں ریاست ءِ مُزّ واریں لشکر ءَ جنگ ءَ اَنت ، اِیشاناں ھم زاتی زِند گْوازینگ ءِ ھُبّ ءُ واھگ ھست۔۔۔۔۔۔۔۔، اِیشاناں ھم مات ءُ گْوھاری نیادانی پُرمھریں پتّر ءِ تلب ھست۔۔۔۔۔۔۔۔، اِیشاناں ھم وتی جِند ءِ زھگانی بالینگ ءِ واھشت ھست۔۔۔۔۔۔۔۔، بلے! اِیشاں وتی اے کُلیں واھگ ءُ ارمان کلّ کُتگ اَنت ءُ راجی واھگ ءُ ارمان ءِ پد جَنَگ ءُ موکگ ءَ ترشتیں تلارانی تلمب زِند ءِ ھمراہ ءُ سنگت جوڑ کُتگ اَنت۔۔۔۔۔دانکہ مئے راج چہ وتی ھستمان ءَ گار ءُ بیگواہ مہ بیت۔۔۔۔۔۔۔۔۔
پمیشکا من گْوش آں ۔۔۔ یک اِنسانے ءَ را پہ کُشگ ءَ آئی ءِ لیکہ کدی مرگ آماچ نہ بیت ، بلکیں آئی ءِ لیکہ گوں آئی ءِ ھوناں دوبر تیجار بیت ءُ سبز اِیت۔
مرچی اے شھیداں کہ وتی ھونانی ھار ملّینتگ ، اے ھونانی ھار ءَ راجی آکبت ءِ کِشار سبز اِیت ءُ دُژمِن ءِ بے دانیں پلاراں مٹ اِیت۔۔۔۔۔۔۔
بس مارا جُھد وتی جُھد گوں شیھدانی ارماناں مُھکم دارگی اِنت ءُ دیم ءَ جُنزگی اِنت ، چی ءَ کہ جُنز ءِ زِندگ بُوَگ ءِ مستِریں مُول ءُ مکسد اِنت ، ءُ بے مکسدیں زِند پہ زوال آسر بیت۔۔۔۔۔۔۔
ءُ مئے مکسد راجی آجوئی اِنت ، اے کُلیں دیمونی ءُ کُربانی پہ بام چکّیں راجی آجوئی ءَ ، ابید چہ راجی آجوئی ءَ۔۔۔اے گُلامی مارا پہ مُجّتی زِندگ ءَ نیل اِیت۔۔۔۔۔۔۔
