بلوچستان کے علاقے کوہلو میں فائرنگ اور ہرنائی میں مکان کی چھت گرنے سے بچی سمیت 2 افراد ہلاک اور 2 بچیاں زخمی ہوگئیں۔
کوہلو سے اطلاعات ہیں کہ نصوبہ کے مقام پر نامعلوم افراد کی فائرنگ سے ایک شخص ہلاک ہوگیا۔
پولیس ذرائع کے مطابق مقتول کی شناخت محبت خان عرف ماوے ولد نودھان رامکانی سکنہ نصوبہ کے نام سے ہوئی ہے۔
دوسری جانب ہرنائی میں مکان کی چھت گرنے سے ایک بچی ہلاک اور 2 بچیاں زخمی ہوگئیں ۔
منگل کو ہرنائی کے علاقے طالب لیز میں مسلسل بارش کے باعث نعمت نامی شخص کے کچے مکان کی چھت گر گئی جس کے نتیجے میں ایک بچی سورسانگہ ہلاک جبکہ اسکی دو بہنیں نازکہ اور ببو زخمی ہوگئیں۔
واقعہ کے بعد ریسکیو حکام نے جائے وقوعہ پر پہنچ کر لاش اور زخمیوں کو ہسپتال منتقل کردیا۔
مزید کارروائی جاری ہے۔
