حکومت بلوچستان نے بلوچستان بھر میں 15 اگست سے سرکاری اسپتالوں میں (آئوٹ پیشنٹ ڈپارٹمنٹ) او پی ڈی کھولنے کا فیصلہ کیا ہے۔
سیکرٹری صحت بلوچستان دوستین جمالدینی نے میڈیا کو بتایا کہ صوبے کے تمام سرکاری اسپتالوں میں بند او پی ڈیز کو 15اگست سے کھولنے کا فیصلہ کیا گیا ہے۔
انہوں نے بتایا کہ اس حوالے سے تمام سرکاری اسپتالوں کے میڈیکل سپرنٹنڈنٹس (ایم ایس) کو مراسلہ بھی ارسال کر دیاگیا ہے جس میں کہا گیا ہے کہ اسپتالوں میں کورونا وائرس سے بچاو¿ کے لیے بہترین انتظامات کیے جائیں اور انفیکشین کنڑول کے ضابطہ کار پر سختی سے عملدآمد کو یقینی بنایا جائے۔
ان کا کہنا تھا کہ اسپتالوں میں کورونا وائرس کے علاوہ باقی تمام امراض کے مریضوں کو داخل کیا جائے گا۔
خیال رہے کہ بلوچستان میں کورونا وائرس کے پھیلاو¿ کے پیش نظر 19 جون کو سرکاری اسپتالوں کی او پی ڈیز کو بند کیا گیا تھا۔
