بلوچستان کے ضلع کیچ کے مر کزی شہر تربت میں مکران میڈیکل کالج کے طلبہ کی جانب سے جاری احتجاجی دھرنا کالج انتظامیہ، سینئر فیکلٹی ممبران اور کیچ سول سوسائٹی کے ارکان پر مشتمل مذاکراتی کمیٹی کے ساتھ کامیاب مذاکرات کے بعد عارضی طور پر مؤخر کر دیا گیا۔
مذاکرات کی کامیابی کے بعد طلبہ نے غیر مشروط طور پر سی پیک روڈ کو ٹریفک کے لیے کھول دیا، جس سے شاہراہ پر آمد و رفت بحال ہو گئی۔
دھرنے کے باعث سی پیک روڈ پر ٹریفک معطل تھی، تاہم فیکلٹی ممبران، کیچ سول سوسائٹی اور وائس پرنسپل مکران میڈیکل کالج کی سربراہی میں ہونے والے مذاکرات کے بعد احتجاج میں شریک طلبہ نے روڈ بلاک ختم کرنے کا اعلان کیا۔ طلبہ نے احتجاجی کیمپ سی پیک روڈ سے اٹھا کر مکران میڈیکل کالج (ایم ایم سی) کے اندر منتقل کر دیا ہے۔
مذاکراتی کمیٹی نے میڈیا سے گفتگو کرتے ہوئے بتایا کہ انتظامیہ نے طلبہ کے چند مطالبات تسلیم کرتے ہوئے ان کے فوری حل کی یقین دہانی کرائی ہے، جبکہ باقی مطالبات پر تفصیلی غور و خوض کے لیے کل دوبارہ مذاکراتی نشست منعقد کی جائے گی۔ کمیٹی کے مطابق انتظامیہ مسائل کے حل کے لیے سنجیدہ ہے اور بات چیت کے ذریعے قابلِ عمل حل نکالا جائے گا۔
احتجاجی طلبہ نے کہا کہ ان کا احتجاج تعلیمی اور انتظامی معاملات میں بہتری کے لیے تھا، اور انتظامیہ کی یقین دہانی کے بعد انہوں نے روڈ کھولنے اور احتجاج کو کالج تک محدود کرنے کا فیصلہ کیا ہے۔ طلبہ نے واضح کیا کہ اگر مطالبات پر پیش رفت نہ ہوئی تو آئندہ کے لائحہ عمل کا اعلان مشاورت کے بعد کیا جائے گا۔
