پاکستان کے سینیٹ کے قائم مقام چیئرمین سیدال خان نے پی ٹی آئی کے رویے کو ریاست اور اداروں کے خلاف شرمناک اور ناقابل برداشت قرار دیتے ہوئے واضح کیا ہے کہ ایوان میں دی گئی ان کی رولنگ مکمل طور پر آئین اور قانون کا تقاضا تھی جس پر کسی قسم کی لچک یا رعایت نہیں دی جائے گی۔
نجی ٹی وی سے خصوصی گفتگوکرتے ہوئے سیدال خان نے کہا ہے کہ اپنی رولنگ کی روشنی میں پی ٹی آئی کے پارلیمانی لیڈر کو باضابطہ خط لکھیں گے، جب کہ اس خط کی کاپی تمام پارلیمانی لیڈرز کو بھی بھجوائی جائے گی۔
انہوں نے کہا کہ اداروں کے خلاف حملہ، تنازع اور انتشار پھیلانے کی اجازت کسی صورت نہیں دی جائے گی، اور رولنگ پر سختی سے عملدرآمد کرایا جائے گا۔
سیدال خان نے بتایا کہ اب تک برداشت کیا گیا، مگر آئندہ کسی بھی خلاف ورزی کی صورت میں متعلقہ سینیٹر کی رکنیت فوری طور پر معطل کر دی جائے گی، جب کہ مسلسل خلاف ورزی پر رکنیت طویل مدت کے لیے بھی معطل کی جا سکتی ہے۔
قائم مقام چیئرمین سینیٹ نے واضح کیا کہ پارلیمان کی حرمت اور ریاستی اداروں کا احترام ہر رکن کی بنیادی ذمہ داری ہے، اور ایوان کے نظم کو کوئی بھی سیاسی جماعت یا فرد سبوتاژ نہیں کر سکتا۔
