بلوچستان کے ضلع کچھی کے تحصیل سنی میں ایک گھر کے اندر خوفناک بارودی سرنگ دھماکے کے نتیجے میں 3 کمسن بچے ہلاک جبکہ 3 افراد زخمی ہوگئے۔
قائم مقام ایس پی کچھی جان محمد کھوسہ کے مطابق دھماکہ عبدالحئی جتوئی نامی شخص کے گھر میں اس وقت ہوا جب بچے کھیل رہے تھے۔
پولیس کے مطابق ہلاک ہونے والوں میں ندیم احمد، سونا خان اور بی بی بختاور شامل ہیں، جن کی عمریں تقریبا 13 سے 14 سال کے درمیان تھیں۔
دھماکے میں زخمی ہونے والے تین دیگر افراد کو فوری طور پر مقامی اسپتال منتقل کر دیا گیا۔
پولیس کا کہنا ہے کہ ابتدائی تحقیقات کے مطابق نامعلوم افراد نے دو روز قبل گھر کے اندر بارودی مواد بچھایا تھا، جو بدقسمتی سے پھٹ گیا۔
