شال ءَ ارس ءِ ھور گْواریت – لچّہ: سرباز وپاؔ

رُژن نہ گْواھیت دیدوکاں
دل زدگ چہ اندوھاں
درد جبین ءَ ودّان اَنت
کھر بُوھان اِنت اے امروز
کِسّھاں زبان رُودینتگ
ھر کس گِندیت چم ء وت
ارس ءِ ھارے مَلّان اِنت
پیریں زال ءِ پریاتاں
ھِچ اِد ءَ اوں مانا نیست
اللہ اللہ اُپ اللہ
چینچو سنگ دل بنی آدم
کسی گُوشاں مورے نہ وارت
گیرت بلوچی لَج ءُ ننگ
ھر روچ زار ءُ پریاتاں
گِریواں گِریواں ھیسکاراں
امروز مھشر جوڑ بوتگ
آہ ءُ زاراں چُکّانی
پیریں مات ءِ اُپّاراں
بچّ ءِ درداں در پہ در
دائم جُست کنت چہ اکس ءَ
ابّا کدی تو واتر بَہ ئے
کے بہ مار اِیت اے درداں!
شال ءَ ارس ءِ ھور گْواریت
شال ءَ ارس ءِ ھور گْواریت