دومی بَھر
گوں لٹّ شاپی ءُ دِگہ بازیں سزاآں من دیمپان اِت آں کہ یک روچے یکّے ءَ منی چم بُتک اَنت ءُ گوں آجزیں بچکندے ءَ دِرّائینت ، ھاں ورنا۔۔۔۔۔۔۔۔۔۔۔۔!
چتور ئے۔۔۔۔۔۔۔۔۔۔۔؟
من چہ بازیں لٹّ ورگ ءُ سزاآں ژند ءُ پند اِت آں کہ پسّو دات نہ کُت۔۔۔۔۔۔۔۔۔۔۔۔۔۔۔۔۔، گُڑا ھما دمان ءَ ھمیشی ءَ دِگہ کسے گْوانک جت ءُ گْوشت ، بُرو اے بیچارگ ءِ واستا جوس ءُ شربتے بِیار گوں داں بزّگ ءِ جان ءِ ھاٹی بئیت ءُ جُستانی پسّو ءَ شرّیں رنگے ءَ دات بِہ کنت ءُ آجو بِہ بیت ۔ مُپت ءَ پرچا وت ءَ بزّگے کُتگ ءُ مارا میاریگ۔۔۔۔۔۔۔۔۔!
اے ھبر ءِ اِش کنگ ءَ ھوار من پھم اِت کہ اِیشاناں الم دیم سْیاھی یے دِل ءَ اِنت ، اگاں نہ پمّن چو مھروان نہ بوتگ اَنت کہ جوس ءُ شربت بِہ وارین اَنت۔
من ءَ جُست ءُ پُرس ، پُولگ ءَ لگّ اِت ،
بِہ گْوش ورنا! تو کئی ھمراہ ئے۔۔۔۔۔۔؟
کامریڈ دِلیپ یا ماسٹر ابدین ءُ یھیا ئے۔۔۔۔۔۔۔؟
تئی کماندار کَے اِنت۔۔۔۔۔۔؟
تئی سنگت ءُ ھمراہ کَے کَے اَنت۔۔۔۔۔؟
شُما مئے چینچو نوجوان شھید کُتگ۔۔۔۔۔۔؟
شُمئے وتاک ( اُوتاک ) کُجا اِنت۔۔۔۔۔۔۔۔۔؟
شُمارا جنگ کَے ھیل دنت ءُ سِکّارینیت۔۔۔۔۔۔۔۔۔؟
شُمارا زر ءُ کلدار کَے دَیَگ ءَ اِنت۔۔۔۔۔۔۔۔۔۔۔؟
شُمئے ھندی کُمکّار کَے کَے اَنت۔۔۔۔۔۔۔؟
شُما راشِن چہ کُجام دُکّان ءَ زُور اِت۔۔۔۔۔۔؟
اُو! بے ھال بوت آں۔۔۔۔۔۔!!
یکّیں پاد ءَ اِنچو جُست ءُ پُرس ءِ پسّو کُجا۔۔۔۔۔۔۔۔۔۔۔۔؟
منی کِرّ ءَ یک جُستے ءِ ھم پسّو نیست اَت ۔ چی ءَ کہ من چرئے جُستانی کابیل ءَ بِل اِیرگْوات ءَ ھم نہ گْوستگ اِت آں۔۔۔۔۔۔۔۔۔۔۔۔۔۔
من گْوشت سر۔۔۔۔۔۔۔۔۔۔!
من اے جُستانی جواب ءَ چون دات کن آں کہ ھچّی ءَ سرپد نہ آں ، ھمراھی دُوریں ھبرے۔۔۔۔۔۔۔۔۔۔۔
پد ءَ پہ بچکند گْوشگ ءَ لگّ اِت ،
ورنا۔۔۔۔۔۔۔۔۔۔۔۔!
بِہ چار مارا مجبُور مہ کن کہ ما تئی چیریں پُتینکاں گوں لٹّ ءُ کُٹّاں پدّر بِہ کن اِیں۔۔۔۔۔۔۔۔۔۔، اگاں تو پہ رزا تیوگیں گپّاں وت گْوش ئے ما ترا چہ گریبی ءَ وشھال کن اِیں ءُ آسودگیں زندے دئے اِیں ۔اگاں مارا مجبُور کُت گُڑا تئی ھڈّ ءُ ھُوڈاں کس نہ گِند اِیت کہ کُجام ناھار ءِ وردن بَہ اَنت ، نے تئی مات ءُ گْوھار ءِ ھَیر بیت ۔ شَورءُ سلاہ تئی دست ءَ اِنت چے کہ پہ وت جیڑ ئے۔۔۔۔۔۔۔۔۔۔۔۔۔
من پد ءَ پہ لاچاری پسّو ترّینت ءُ گْوشت ،
سر شُما وت زان اِت من گریب ءُ بے میاریں مردُمے آں۔۔۔۔۔۔۔۔۔۔!
من کُجا ءُ اے کارِست ءِ پیلو کنگ ، کُجا۔۔۔۔۔۔۔؟
من ءَ وھیل کن اِت گوں مات ءُ گْوھار ءَ ، پہ مئے بندیگ کنگ ءَ شُمارا چے سیت ءُ نپّ۔۔۔۔۔۔۔۔۔۔
گوں اے گپّاں کمّیں برانز گِپت ءُ پد ءَ بچکندگ ءَ لگّ اِت ، سھتے بے تواری ءَ رند گوں وتی ھمراہ ءَ پاد اتک ءُ گْوشتے ،
ورنا۔۔۔۔۔۔۔۔۔۔۔۔۔۔!
اے تئی گُڈّی موہ اِنت۔۔۔۔۔۔۔۔۔۔۔۔۔۔، وتی مُواڑ ءَ بِہ چار ۔ اگاں نا۔۔۔۔۔۔۔۔!
رندے پشومانی ھِچّ آسری کارے نہ کنت ، پُشتے ماندات ءُ رپت۔۔۔۔۔۔۔۔۔
گوں اِیشانی رَوَگ ءَ پد منی ارواہ ءِ دم گُٹگِیر بُوھان اَت ، چی ءَ کہ من ءَ چہ وتی جِند ءَ گیش مات ءُ نازی ءِ گم جبین ءَ ماندارگ ءُ چو رِمیز ءَ وران اَت۔ ھمے جیڑگ جیڑگانی تہ ءَ زانگ نہ بوت کہ شپ اِنت یا روچ تھتگاں باھِند کُت ءُ من جھ سِرّ اِت آں ، ملکموت دیم ءَ زاھر بوت ، بلے مرگ دِگہ لد ءُ گیابانے ءَ چرّگ ءَ اَت۔
وھدے دروازگ ءِ تاک پچ بوت اَنت ءُ منی چمّانی سْیاھیں پُچ لگوشگ بوت چاراں ھما مردکار اِنت گوں ھما ھمراہ ءُ دِگہ چار کسّ ءَ۔۔۔۔۔۔۔۔۔۔۔
من کہ چار اِت چاراں بچکندگ ءَ لگّّ اِت ءُ کُرشی ءِ سر ءَ نشت ، چہ نِندگ ءَ پد درّائینت ئِے
ھاں ورنا۔۔۔۔۔۔۔۔۔۔!
ھالاں دئے باریں دوشی چے جیڑ اِتگ۔۔۔۔۔۔۔۔۔ءُ چے پیسلہ کُتگ۔۔۔۔۔۔۔۔۔۔؟
نوں تئی جواب گُوشدارگ بَہ اَنت بس ، دِگہ پُوتّاری ءِ ھِچّ گُنجاھشت ( گُنجائش ) نیست۔۔۔۔۔۔۔۔
من اُمیت کن آں تو مرچی کُلّیں جُستانی پسّو ءَ پہ دِلجمی دئے ۔ مُپت ءَ وت ءَ پرچا بزّگ کُتگ ءُ ناشرانی ھمراھی ءَ ھوار کپتگ ئے۔ پہ کاپِر ءُ جھودانی ھاتر ءَ وتی اسلامی ءُ پاکیں اِستان ( مُلک ) ءِ ھِلاپ ءَ تُپنگ چِست کُتگ ءُ وتی مسلمانی شرمندگ کُتگ ۔ شُما گوں وتی پاکیں مُلک ءَ چوش کن اِت ، ھاوند ءُ آئی مزن نامیں پیگمبر سردار ء دو جھان نارزا بیت۔۔۔۔۔۔۔
چی ءَ کہ اے مُلک ھمائی ءِ وابانی بشارت اِنت کہ تیوگیں گیدی ءَ اِسلام ءِ چیدگ ءُ کلات اِنت ، اگاں کسے جھود ءُ کاپِرانی گْوشگ ءِ پد ءَ پہ اے مُلک ءِ ڈُرینگ ءَ لانکبند بیت ، گُڑا واجہ ھُدا ءُ آئی ءِ پاکیں پیگمبر الم نارزا بیت۔۔۔۔۔۔۔۔۔ ، نیکہ ما کسے ءَ کِلّیں کہ آ جھودانی رِپک ءُ پندلاں آپ بِہ دنت ءُ پاکیں اِستان ءِ بگیر ءَ جنگ بِہ کنت۔۔۔۔۔۔۔۔۔
من گْوشت سر۔۔۔۔۔۔۔۔۔!
تو منی گپّاں باور نہ کن ئے ، دروگ من بست نہ کن آں۔ اگاں ترا پہ ھُدا سِتک ءُ باور بیت گُڑا من نہ ایشانی ھمراھاں نا دِگہ تُپنگے چِست کُتگ ءُ پاکیں اِستان ءِ ھِلاپ ءَ جنگ کنگ ءَ آں۔۔۔۔۔۔۔
منی اے گپّانی اِش کنگ ءَ پد وتی ھمراھاں چہ یکّے ءَ را گْوشت ئِے ، بیار چر ءَ بلیک لیبل ءَ گِلاسے چاڑین باریں چون نہ گْوش اِیت کہ دِلپُلّ ءُ شاھو کَے اَنت۔۔۔۔۔۔۔
چہ گِلاسے تْرنداپ ءِ نوشگ ءَ پد منی سر ءَ برانز گِپت ءُ گْوشگ ءَ لگّّ اِت ، اگاں تو نہ منّ ئے گوں گُرزاں ترا انچو مان بنداں کہ تو چو کُچِکّ ءَ نہ راش اِت ءُ لَھ لَھ ، ھو ھو نہ کُرت گُڑا من ءَ رند ءَ بِہ گْوش کہ من چے کُتگ ءُ چے کنگ ءَ آں۔۔۔۔۔۔۔۔۔۔۔۔
گھ ھمیش اِنت کہ وت ءَ گوں گُرزاں لیبوک جوڑ مہ کن ، انگت تچک ءُ راستیں ھبراں بِہ گْوش ءُ آجو بُو ۔۔۔۔۔۔۔
چوناھا پمّن زِندان ءِ ھر ساھت ءُ دمان چہ گُرزاں کمتِر نہ اَت ، لیپ ءُ گندلانی چو ڈُونڈ ءَ بو ءُ بھار ، گوں شپ ءِ تھارونکی ءَ دُونتگیں کُوٹی ءِ جناوریں گوناپ ، چِرِتانی گٹّ پاچگ ءُ دم پہ ساھت توار ، یکّیں جاہ ءَ ورگ ءُ بوجگ ، بلکیں زِند ءِ ھر کترہ گوں کلپیں ملکموت ءَ دیم پہ دیم بلے مرگ گار اَت۔۔۔۔۔۔۔۔
من درّائینت سر۔۔۔۔۔۔۔۔۔!
تو شر سرپدے من بے میار آں ، منی کَھول ھم بے میار اِنت۔۔۔۔۔۔۔۔
من ءَ گوں اے آجوئی ءِ جنگولاں نزّیکی وتی جاگہ ءَ ھِچّ وڑیں ھال اھوالے نیست ، من چتور وَ سر ءَ زان آں کہ دِلپُلّ ءُ شاھو کَے اَنت۔۔۔۔۔۔۔۔
چرئے گپّانی ھلاسی ءَ ھوار پاد اتک ءُ من ءَ گوں بُوٹاں لگت جَنّگ ءَ گُلائیش بوت ، کِساس دہ ءُ پانزدہ مِلٹ ءَ گیش من ءَ شِت ءُ دورے دات ۔
چہ جَنَگ ءُ پُروشگ ءَ پد وتی ھمراھاناں گْوشت ئِے ایشی ءَ ٹنگ اِت ، پاداں بُرز ءُ سر ءَ جھل بِہ کن اِت وت گْوش اِیت کہ راستی چی یے۔
من پہ بے وسی دِل ءَ جوڑان اِت آں کہ من ءَ تو اگاں کارچ ءَ گُٹّ ءَ ایر بِہ کن ءُ پاھُو بِہ دئے۔۔۔۔۔۔۔۔۔۔۔۔من بے میار آں ،
چی ءَ کہ من ھِچّ ءَ سرپد نہ آں ۔چتور دِگہ دروگے بست کن آں کہ من راجی جُھد ءُ آجوئی ءِ جنگولاں زان آں ، یا وت راجی جنگول ءُ سِپاھی یے آں۔۔۔۔۔۔۔۔۔۔۔۔
چہ واجہ ءِ گْوشگ ءَ پد آئی ھمراھاں من ءَ گِرّان کنان کُت ءُ دِگہ کُوٹی ءَ بُرت ءُ پہ دْرنجگ ءَ ساد ئِے ماں باسکاں لوپ کُت۔۔۔۔۔۔۔۔۔۔۔۔۔
چہ ھمے ھمراھاں یکّے ءَ پد ءَ پہ تژن گْوشت ،
بِہ چار بلوچُک۔۔۔۔۔۔۔۔۔۔۔!
تو اگاں وتی ردیاں منّ ئے ، ما واجہ ءَ انگت گپ جن اِیں ءُ ترا چہ زِندان ءَ آجو کن اِیں ، اگاں نا گوں ترا مرچی ھما زُوراکی کنگ بَہ اَنت کہ شُمئے کماندار ڈاکٹر اللہ نزر ءَ گوں نہ بوتگ اَنت۔۔۔۔۔۔۔۔
نوں من پھک زانت کہ اے سِزا من ءَ الم دے اَنت ، بلے تُرسینگ ءَ اَنت دانکہ پہ تُرس بِہ منّ اِیت ءُ مئے بے سریں دانکاں وتی گردن ءَ بِہ مُش اِیت۔۔۔۔۔۔۔۔۔۔۔۔
من کُجا ءُ ڈاکٹر اللہ نِزر کُجا۔۔۔۔۔۔۔۔۔؟
بلے دِل من ءَ مُدام ھمے پنت دَیَگ ءَ اَت کہ منّگ ءِ کار ءَ نہ کن ئے کہ پہ مُجّتی بیگْواہ بَہ ئے ، اگاں گوں ترا چے کنگ بِہ لوٹ اَنت۔۔۔۔۔۔کن اَنت ، چی ءَ کہ وھد ءِ ھُدا ھمیش اَنت ، مرگ ءُ زِند ءِ پرمان ھم ھمیشانی دست ءَ اِنت۔۔۔۔۔۔۔۔۔۔۔ ، بلے منّگ ءِ کار ءَ نہ کن ئے۔۔۔۔۔۔۔۔۔۔
من پد ءَ پہ لاچاری گْوشت ،
سر۔۔۔۔۔۔۔۔۔۔!
منی مرگ ءُ زِند شُمئے دست ءَ اِنت ، شُما من ءَ کُش اِت شر زِندگ کن اِت۔۔۔۔۔۔۔۔۔، منی دست ، منی وس ءُ واک گوں شُما نہ روت۔۔۔۔۔۔۔۔۔۔
بلے پہ ھُداھگی اگاں باور کن اِت گُڑا من اے وڑیں مردمے نہ آں کہ شُما پھم اِت یا پھم اِتگ۔۔۔۔۔۔۔۔
گوں منی اے گپّانی ھواری ءَ ھمے بُرزیں مردِک ءَ وتی چم در گُڑینتاں ءُ پہ زاہ ءُ بَد من ءَ گْوشت ،
ترا گْوش آں کہ وتی ردیاں بِہ منّ تو مارا ھُدا ءِ بیھار ءَ دئے۔۔۔۔۔۔۔۔۔۔
بلے چابُکدستاں۔۔۔۔۔۔۔۔۔۔!
دِگہ گیشیں گپ ءُ رپ نہ لوٹ اِیت ، اِیشی ءِ سر ءَ جھل ءُ پاداں بُرز کن اِت۔۔۔۔۔۔۔۔۔، وت منّ اِیت کہ من انڈیا ءُ اسرائیل ءِ ایجنٹ ءُ چانوگراں۔۔۔۔۔۔۔۔۔۔
گوں بُرزیں مردِک ءِ گپّاں ھوار کُلّاں من ءَ گِپت ءُ گوں ساد ءَ ٹٹات۔۔۔۔۔۔۔۔سر جھل ءُ پاد بالا دات اَنت ٹنگ اِت۔۔۔۔۔۔، پشک ءُ شلوار لگُوشگ بوت اَنت۔۔۔۔۔۔۔۔۔
چہ سر ءِ جھل ءُ پادانی بالا کنگ ءَ ھوار ھرکس ءَ پہ دیم من ءَ گوں گُرزاں مان بست ءُ جَنَگ ءُ چوپگ بِندات کُت۔۔۔۔۔۔۔۔۔
ھمے جَنَگ ءُ چوپگ ءِ مْیان ءَ من چہ وتی سما ءَ در کپت آں ءُ بے سما بوت آں ، نہ زان آں چینچو کلاک ءَ پد بود کُت ءُ دم کشّ اِت۔۔۔۔۔۔چاراں چہ ھون ءَ میچلاں بُن ءَ کپتگ ءُ بے ھاٹیگ آں۔۔۔۔۔۔۔۔۔
دِل ءَ پہ سُرگ ءُ نِندگ ءَ اُومان کُت ، بلے سُر اِت نہ کُت ۔ دومی نیمگ ءَ تُنّ سر ءَ میلانک اَت ءُ نُکّ چہ نادوکاں ھُشک اَت کہ توار ھم بے تواری ءِ چنکّان ءُ چم پَرپَٹگ ( پَلپَٹگ ) ءَ اِت اَنت۔۔۔۔۔۔۔
چم ھردیم ءَ کہ کپت اَنت زِندان ءِ اندر ءَ تھاری ءَ زُبان رُودینتگ اَت۔۔۔۔۔۔۔۔۔۔، در ءُ دِیوالانی گوں ھوناں مینتگ ءُ رستری اکس بے تواری ءِ آدینک ءَ سک بیمّناک اِت اَنت۔۔۔۔۔۔۔۔۔۔۔۔
بلے! چہ جیڑگانی بُندر ءَ دُور مات ءُ نازی ءِ گِریوگ ءُ اِیڈسکّگانی توار گُوشانی پردگاں دِرّان ءُ راہ کنان پمّن پیداک اِت اَنت ، گُڑا بے تاھِیریں ٹپّ ءُ ٹورانی زیمیں سروز وت ءَ گیش ساز کنان اَت کہ یکبرے پد ءَ دِل اِیربُڈّ اِت ءُ سما ءِ واگ چہ دستاں لگوشت ءُ من بے سما بوت آں۔۔۔۔۔۔۔۔۔۔۔۔۔
