بلوچستان کے مرکزی شہر کوئٹہ میں شاہوانی اسٹیڈیم کے باہر خود کش دھماکے کا ایک اور زخمی دم توڑ گیا، جس کے بعد ہلاکتوں کی تعداد بڑھ کر 14 ہوگئی۔
29 زخمی افراد سول ہسپتال میں زیر علاج ہیں۔
ہسپتال حکام کی جانب سے کہا گیا ہے کہ زخمیوں کے تفصیلی معائنے کے بعد شدید زخمیوں کو کراچی منتقل کرنے کا فیصلہ کیا جائے گا۔
دوسری جانب اسلامک اسٹیٹ (داعش)نے کوئٹہ میں بلوچستان نیشنل پارٹی بی این پی کے جلسے پر خودکش حملے کی ذمہ داری قبول کرلی ہے۔
داعش کی جانب سے جاری بیان میں حملہ آور کی شناخت “علی المہاجر” کے نام سے کی گئی ہے اور یہ دعویٰ داعش پاکستان کے مرکزی میڈیا ادارے “اعماق” اور “خلافت نیوز” کے ذریعے سامنے آیا۔
یاد رہے کہ گزشتہ شب کوئٹہ کے شاہوانی اسٹیڈیم کے قریب بی این پی کے جلسے پر خودکش بم دھماکے میں متعدد افراد ہلاک اور درجنوں زخمی ہوئے تھے۔
بلوچستان نیشنل پارٹی کے مطابق حملے میں بی این پی قائد اختر مینگل کو نشانہ بنایا گیا جس میں وہ محفوظ رہے تاہم اس حملے میں 15 شرکاء ہلاک اور 70 سے زائد زخمی ہوئے ہیں۔
