شہیدی ءِ واھگ ءُالطاف جان | ماہ رنگ بلوچ

15 اگست پہ من یک انچیں روچے کہ تا منا ساہ یے مان ، من اے روچ ءَ کدی بے ھیال نکنی ۔

پرچہ کہ اے روچ پہ منا یک سیاہ ءُ تھاریں روچاں چہ یکے۔ من ھمے جیڑتگ ات کہ اے روچ (25 ) اگست تھنا پہ منا سیاہ ءُ تھار یں روچے،بلے وھد ءُ جاور کہ مٹ بووان بوتاں ،گڑا منا ھمے سما بوت کہ اے روچ تھنا پہ منا ناں، بلکیں سرجمیں بلوچستان ءِ واستہ سیاہیں روچاں شماربیت ۔ھمے روچ ءَ ہزاراں ماتانی تنگوئیں بچ چہ آہاں پُلگ بوتگاں ،چک چورہ کنگ بوتگاں،زالبول جنوزام کنگ بوتگاں ، گس ویران کنگ بوتگاں۔

گڑا منا ھمے سما بیت کہ اے روچ سرجمیں بلوچستان ء واستہ سیاہیں روچے۔ھمے جیڑگانی تھا گار تاں کہ نمیرانیں التاپ جان ءِ ھما داتگیں سوج ءُ پنت منی توکل ءَ چو کوہ ءِ البرز ءَ مھکم ءَ چہ مھکم تر کنان اِتاں۔
"مرگ ءَ چہ رند زندگی وش انت "

مدامی نمیرانیں التاپ جان ءَ ھمے گشت کہ
"مرگ ءَ چہ رند زندگی وش انت "
گڑا یک روچے من جست گپت کہ کجام مردم مریت ءُ پدا زندگ بیت کہ تو مدامی ھمے گپ ءَ کن ئے؟

گڑا منا پسو دات اش کہ
” ھما ماتانی تنگوئیں بچ کہ پہ وتا گلزمین ءَ ندر کن اَنت، وتی سر آنی دئیگ ءَ ہچ چک ءُ پد نباں، ءُ ہچ نچار اں ،ھما بچ پدا زندگ بنت "

دیمترا پدا ھم پسو دات اش کہ
"منا انچو سما بیت کہ من ھم پہ گلزمین ءَ کربان بئیں "

بچار التاپ جان تو ھم پہ گلزمین ءَ وتا ندر ءُ کربان کت۔

اے گپاں چہ رند مدتے ءَ پد کساس شش ءُ ہپت ماہ ءَ رند بالاچ مری ھم نمیران کنگ بوت۔ بالاچ مری ءِ نمیرانی ءَرند بالاچ مری ءِ اکسے زرت ءُ گس ءَ اتک گوں بچکندگے ءَ گشت ے:
آ روچ دور نہ انت کہ شما منا ھم گشئے کہ” التاب جان کو سرخ سلام "

ھمے بچکندگانی تھا وتی ءُ بالاچ مری ءِ اکس اش یکجاکرت انت ءُ منا گشتے
” من ھم چو بالاچ مری ءَ نمیران بئیں ،منا ھم بگشئے سرخ سلام "

التاپ جان! تئی شہیدی ءِ واھگ پیلو بوت ۔ تو ھم نمیران بوت ئے۔ مرچی من ناں بلکیں سرجمیں بلوچستان ترا گشگ ءَ انت کہ "التاپ جان کو سرخ سلام "

تئی نمیران بوھگ ءَ رند سرجمیں بلوچستان ءِ ھمے نعرہ جنگ بوت کہ
” التاپ تیری خون سے انقلاب آئے گا”

شہیدءَ سہریں سلام

٭٭٭