پاکستان کے دارلحکومت اسلام آباد میں واقع تھنک ٹینک پاکستان انسٹیٹیوٹ فار کانفلکٹ اینڈ سیکیورٹی اسٹڈیز (پی سی ایس ایس) کی جانب سے جاری کی گئی تازہ ترین ماہانہ سیکیورٹی رپورٹ میں بتایا گیا کہ جون میں پاکستان بھر میں کل 78 مسلح حملے ہوئے ، جن کے نتیجے میں کم از کم 100 افراد کی اموات ہوئیں، جن میں 53 سیکیورٹی اہلکار اور 39 شہری ہلاک ہوئے جبکہ 6 حملہ آور بھی مارے گئے۔
رپورٹ میں کہا گیا ہے کہ ان حملوں میں 189 افراد زخمی ہوئے، جن میں 126 سیکیورٹی اہلکار اور 63 شہری شامل ہیں۔
تازہ رپورٹ میں جولائی میں پاکستان بھر میں 82 مسلح حملوں کا ذکر کیا گیا ہے، جن کے نتیجے میں 101 افراد کی اموات اور 150 زخمی ہوئے۔
پی سی ایس ایس کے مطابق مسلح حملوں میں ہلاک ہونے والوں میں 47 شہری اور 36 سیکیورٹی اہلکار شامل ہیں جبکہ 18 حملہ آور بھی مارے گئے، اس کے علاوہ زخمی ہونے والوں میں 90 شہری، 52 سیکیورٹی اہلکار، 7 حملہ آور اور ایک امن کمیٹی کا رکن شامل تھا۔
رپورٹ میں مزید کہا گیا کہ ’سیکیورٹی فورسز نے اپنے آپریشنز کو تیز کیا، جس کے دوران 106 حملہ آور ہلاک اور 69 مشتبہ افراد کو گرفتار کیا گیا، تاہم ان آپریشنز کے دوران 7 شہری بھی ہلاک ہوئے۔
پاکستان انسٹیٹیوٹ فار کانفلکٹ اینڈ سیکیورٹی اسٹڈیز نے نوٹ کیا کہ پاکستان میں سیکیورٹی فورسز کی کارروائیوں میں سب سے کم ماہانہ ہلاکتیں ہوئیں، جس میں صرف ایک اہلکار ہلاک ہوا، تاہم جولائی میں مسلح افراد کے حملوں میں 36 سیکیورٹی اہلکار ہلاک ہوئے۔
رپورٹ کے مطابق ’مجموعی طور پرمسلح حملوں اور سیکیورٹی آپریشنز کے نتیجے میں جولائی میں 215 افراد کی اموات ہوئیں، جن میں ہلاک 124 حملہ آور شامل ہیں، جبکہ 54 شہری اور 37 سیکیورٹی اہلکار ہلاک ہوئے، جبکہ 199 افراد زخمی ہوئے، جن میں 107 شہری، 56 سیکیورٹی اہلکار، 35 حملہ آور اور ایک امن کمیٹی کا رکن شامل تھا۔
مزید بتایا کہ مسلح حملہ آوروں نے اس ماہ کم از کم 14 افراد کو اغوا کیا۔
رپورٹ میں یہ بھی بتایا گیا کہ خیبر پختونخوا بشمول قبائلی اضلاع مسلح حملوں کا مرکز رہا، جہاں پاکستان بھر میں ہونے والے 82 میں سے 53 حملے ہوئے، اس کے بعد بلوچستان میں 28 حملے ہوئے، جبکہ پنجاب، سندھ، آزاد کشمیر یا اسلام آباد سے دہشتگردی کا کوئی واقعہ رپورٹ نہیں ہوا، تاہم گلگت بلتستان کے ضلع دیامر میں ایک حملہ ہوا۔
