بلوچستان کے علاقے ڈھاڈر میں ایک دھماکے میں 2 افراد زخمی ہوگئے جبکہ مچھ اور دشت میں فائرنگ سے ایک شخص ہلاک ، ایک کو جبری لاپتہ کردیا گیا ہے ۔
ضلع بولان کے علاقے ڈھاڈر میں ایر یگیشن آفس کے قریب ہونے والے دھماکے میں دو افراد زخمی ہوگئے۔
ڈھاڈر پولیس کے مطابق دھماکے کے نتیجے میں زخمی ہونے والوں کی شناخت لال محمد ولد لیاقت علی مستوئی اور میر حسن ولد گل حسن جتوئی کے طور پر ہوئی ہے۔
دھماکے کی اطلاع ملتے ہی پولیس موقع پر پہنچ گئی، زخمیوں کو سول ہسپتال ڈھاڈر منتقل کیا گیا۔
پولیس حکام کا کہنا ہے کہ دھماکے کی نوعیت تاحال واضح نہیں ہو سکی، تاہم شواہد اکھٹے کیے جا رہے ہیں۔ واقعے کے بعد علاقے کی ناکہ بندی کر کے سرچ آپریشن شروع کر دیا گیا ہے۔
دوسری جانب مچھ میں دربار ہوٹل کے قریب نامعلوم مسلح افراد کی فائرنگ سے نوید نامی شخص ہلاک ہوگیا۔
واقعے کے محرکات تاحال معلوم نہیں ہوسکے ہیں۔
دریں اثنا ضلع کیچ سے فورسز نے ایک شخص کو جبری لاپتہ کردیا۔
دشت کے علاقے درچکو سے اتوار کی شب فورسز نے عدنان ولد غفور کو حراست میں لینے کے بعد نامعلوم مقام پر منتقل کردیا جس کے بعد ان کے حوالے سے کسی قسم ی معلومات نہیں مل سکی ہے۔
