بلوچ وومن فورم کے آرگنائز رڈاکٹر شلی بلوچ نےاتوار کے روز اپنے دیگر تنظیمی ساتھیوں کے ساتھ تربت پریس کلب میں پریس کانفرنس کرتے ہوئے کہا کہ بلوچستان میں سیاسی تنظیمیں، سول سوسائٹی، خصوصاً بلوچ یکجہتی کمیٹی اور این ڈی پی اس وقت ایک منظم ریاستی کریک ڈاؤن کا سامنا کر رہی ہیں۔
انہوں نے کہا کہ بلوچ وومن فورم نے 27 جولائی کو گوادر پریس کلب میں ایک روزہ کانفرنس کے انعقاد کا اعلان کیا تھا، جس کا مقصد بلوچوں کی سیاسی شرکت، جبری گمشدگیوں، گرفتاریوں اور بڑھتے ہوئے ریاستی جبر پر تنقیدی مکالمہ تشکیل دینا تھا۔ اس کانفرنس کی تیاری کے سلسلے میں ہماری ٹیم نے گوادر شہر اور گرد و نواح میں وسیع پیمانے پر عوامی آگاہی مہم، وال چاکنگ اور رابطہ مہم کا آغاز کیا۔
تاہم، اس پُرامن اور آئینی جدوجہد کے دوران ہمیں ریاستی اداروں کی جانب سے ناقابلِ قبول نوعیت کی رکاوٹوں، ہراسانی، اور مسلسل نگرانی کا سامنا کرنا پڑا۔ ہم پر سایہ فگن کیا گیا، پروفائلنگ کی گئی، اور بالآخر ہمیں گوادر پولیس نے بلا جواز اور ماورائے آئین حراست میں لے کر وومن پولیس اسٹیشن منتقل کر دیا۔ وہاں ہمارے ساتھ تفتیشی عمل غیر انسانی، غیر پیشہ وارانہ اور توہین آمیز تھا، جس کا مقصد فقط ذہنی اذیت دینا اور ہماری سیاسی حوصلہ شکنی کرنا تھا۔
ڈاکٹر شلی بلوچ نے کہا کہ ہمیں غیر متعلقہ اور اشتعال انگیز سوالات کا سامنا کرنا پڑا، اور ہم پر یہ دباؤ ڈالا گیا کہ ہم تحریری طور پر کانفرنس کی منسوخی کا اعلان کریں۔ جب ہم نے اس غیر آئینی مطالبے سے انکار کیا تو ہمیں زبردستی گوادر سے تربت منتقل کر دیا گیا یہ عمل انسانی وقار اور شہری آزادیوں کی صریح خلاف ورزی ہے۔ہم اس سراسری جبر اور ریاستی استبداد کی پرزور مذمت کرتے ہیں۔
ان کا کہنا تھا کہ یہ امر باعثِ افسوس ہے کہ جب بھی بلوچ وومن فورم سیاسی شعور کے ساتھ اپنے بنیادی حقوق کے لیے آواز بلند کرتی ہیں، تو انہیں غیر مرئی قوانین اور غیر رسمی طاقتوں کے ذریعے خاموش کرانے کی کوشش کی جاتی ہے۔ 27 جولائی کا کانفرنس نہ صرف آئینی حدود میں تھا بلکہ اس کا مقصد ایک فکری و جمہوری مکالمے کو جنم دینا تھا، تاکہ بلوچ عوام کی سیاسی شرکت کو تقویت دی جا سکے۔
بی ڈبلیو ایف کے رہنما نے کہا کہ بلوچستان میں سیاسی تنظیمیں، سول سوسائٹی، خصوصاً بلوچ یکجہتی کمیٹی اور این ڈی پی اس وقت ایک منظم ریاستی کریک ڈاؤن کا سامنا کر رہی ہیں۔ کارکنان کو بلا وارنٹ گرفتار کرنا، اور سیاسی سرگرمیوں کو “قومی سلامتی” کے نام پر جرم قرار دینا اس امر کی عکاسی کرتا ہے کہ جمہوریت کا مفہوم یہاں صرف طاقتور طبقات کے لیے محفوظ ہے۔
انہوں نے کہا کہ بلوچ وومن فورم یہ واضح کرنا چاہتا ہے کہ ہماری جدوجہد نہ صرف آئینی و جمہوری ہے بلکہ اس کا ماخذ بلوچ عوام کی صدیوں پر محیط مزاحمتی روایت ہے، جس میں حوصلہ، خودداری اور دانشوری بنیادی ستون ہیں۔ ہم اس جبر کے آگے سرنگوں نہیں ہوں گے، اور اپنی سیاسی سرگرمیوں کو مزید مربوط اور مؤثر انداز میں جاری رکھیں گے۔
ان کا کہنا تھا کہ ہم ریاست سے یہ دو ٹوک مطالبہ کرتے ہیں کہ بلوچوں کو اُن کے بنیادی انسانی، سیاسی اور سماجی حقوق سے محروم کرنے کا سلسلہ فوری طور پر روکا جائے۔ انہیں ملک کی دیگر اقوام کی طرح مکمل شہری حیثیت دی جائے، اور اُن کی سیاسی آواز کو عزت و قبولیت دی جائے۔
ڈاکٹر شلی بلوچ و ساتھیوں نے کہا کہ ہم اس بات پر بھی زور دیتے ہیں کہ عالمی صحافتی ادارے، انسانی حقوق کی تنظیمیں، اور عالمی ضمیر اس تمام صورتِ حال کا نوٹس لیں، تاکہ بلوچوں کی آواز کسی خندق میں دفن نہ ہو جائے۔
انہوں نے کہا کہ ہم اس پریس کانفرنس کے توسط سے بتانا چاہتے ہیں کہ بلوچ وومن فورم اپنی بنیادی حقوق، بلوچ مفاد ، اور سیاسی جد جہد میں کسی بھی صورت دستبردار نہیں ہوگی،اور ہم اپنی سیاسی جد جہد کومزید تیزی کے ساتھ جاری رکھیں گے۔
