بلوچستان کے علاقے کوہلو، لسبیلہ اور کچلاک میں مختلف حادثات و واقعات میںاسکول پرنسپل سمیت 3 افراد ہلاک ہوگئے۔
کچلاک میں ایک اسکول پرنسپل کو خنجر سے وارکرکے قتل کر دیاگیاہے۔
کچلاک پولیس ذرائع کے مطابق الفلاح پبلک اسکول کلی لنڈی کچلاک کے پرنسپل محمد سکندر کو مبینہ طور پر بچے کے ماموں شمس اللہ ولد معاذ اللہ قوم توخء سکنہ کلی لنڈی نے صبح اسکول کے سامنے خنجروں سے وار کرکے شدید زخمی کردیا۔
پولیس کے مطابق موقع پر موجود عینی شاہدین نے کہا کہ قاتل خنجروں کے وار کے دوران بار بار بچے کو کیوں مارا کہتے ہوئے پرنسپل کو لہو لہان کر دیا۔
زخموں کی تاب نہ لاتے ہوئے پرنسپل محمد سکندر موقع پر ہی ہلاک ہوا۔
مقتول پرنسپل محمد سکندر کی لاش کو ایمبولینس کے ذریعے پوسٹ مارٹم کے لیے سول ہسپتال کوئٹہ منتقل کر دیا گیا۔
مقتول پرنسپل محمد سکندر کا تعلق کراچی سے بتایا جاتا ہےجو گزشتہ کئی سالوں سے کچلاک کے مختلف پرائیویٹ اسکولوں میں درس و تدریس کے فرائض سر انجام د ے رہے تھے۔
واضح رہے کہ گزشتہ روز ایم ایس مفتی محمود میموریل ہسپتال کچلاک کی جانب سے کچلاک پولیس، سماجی بہبود اور ایک این جی او کو الفلاح پبلک سکول کلی لنڈی کچلاک کے 13 سالہ طالب علم کو تھپڑوں سے مارنے والے پرنسپل محمد سکندر کے خلاف پولیس کو اطلاعی رپورٹ دیا جس میں بچے کو سخت زرد وکوب اور انھیں ٹراما سینٹر کوئٹہ منتقل کرنے کی سفارش کی تھی۔
واضح رہے کہ کل بروز جمعرات 03 جولائی 2025کو بچے کے والد نے پرنسپل محمد سکندر سے 10 ہزار روپے تاوان وصول کر کے معاف کر دیا تھا۔
دوسری جانب کوہلو کے علاقے میں آسمانی بجلی گرنے سے ایک لڑکا ہلاک جبکہ دوسرازخمی ہوگیا۔
لیویز کے مطابق جمعہ کو کوہلو کی تحصیل کاہان کے علاقے چپی کچھ میں آسمانی بجلی گرنے سے 12سالہ ایک لڑکا ہلاک جبکہ دوسراجھلس کرشدیدزخمی ہوگیا ،جسے فوری طور پرہسپتال پہنچادیا گیا ۔
علاوہ ازیں ضلع لسبیلہ کے مرکزی شہر بیلہ میں افسوسناک واقعہ پیش آیا ہے جہاں ایک 13 سالہ معصوم بچی پرالی ندی میں نہاتے ہوئے ڈوب گئی۔
واقعے کی اطلاع ملتے ہی ریسکیو ٹیمیں اور ایس ایچ او بیلہ فوری طور پر موقع پر پہنچ گئے، بروقت کارروائی کرتے ہوئے ریسکیو اہلکاروں نے بچی کی لاش ندی سے نکال لی۔
