بلوچستان کے مرکزی شہر کوئٹہ کے سیاحتی مقام ہنہ اوڑک، شعبان اور دیگرپکنک پوائنٹس پر جانا ممنوع قراردیا گیا جبکہ بولان میں رات کو قیام اور کیمپنگ پر مکمل پابندی عائد کردی گئی ہے۔
اس سللسے میں ڈپٹی کمشنر کوئٹہ اور پولیس نے شہریوں کو آگاہ کرتے ہوئے کہا کہ موجودہ حالات کے پیش نظر علاقہ تھانہ ہنہ اوڑک کے حدود میں پکنک پوائنٹس ہنہ اوڑک ،سرہ غلہ، شعبان تک عوام الناس کی رسائی سختی سے منع ہے کسی بھی فرد یا گروہ کو تفریحی مقاصد کے لئے ان علاقوں میں جانا منع ہے ،لہذا ان پوائنٹس پر آنے سے اجتناب کریں۔
دوسری جانب ڈپٹی کمشنر کچھی کے جاری کردہ ایک اعلامیہ کے مطابق عیدالضحیٰ کے پر مسرت موقع پر مورخہ 6 تا 9 جون تک بولان کے تمام تفریحی مقامات پر رات کو قیام اور کیمپنگ پر مکمل پابندی عائد کی گئی ہے۔
اعلامیہ میں کہا گیا کہ عوام الناس ضلعی انتظامیہ کچھی کے ایڈوائزری پر عمل در آمد کو یقینی بنائیں خلاف ورزی کرنے والوں کے خلاف کارروائی کی جائے۔
