بلوچستان کے مرکزی شہر کوئٹہ کے مشرقی بائی پاس پر واقع بکرا منڈی کے قریب نامعلوم افراد نے پولیس اہلکاروں پر دستی بم سے حملہ کر دیا۔
حملے کے نتیجے میں شہید تھانہ کے ایس ایچ او منظور سمیت 3 افراد زخمی ہو گئے۔
پولیس ذرائع کے مطابق زخمیوں کو فوری طبی امداد کے لیے قریبی ہسپتال منتقل کر دیا گیا ہے، جہاں ان کی حالت کی نگرانی کی جا رہی ہے۔
واقعے کے بعد پولیس اور دیگر قانون نافذ کرنے والے اداروں نے علاقے کو گھیرے میں لے کر سرچ آپریشن شروع کر دیا ہے۔
حملہ آوروں کی تلاش جاری ہے، جبکہ جائے وقوعہ سے شواہد اکٹھے کیے جا رہے ہیں۔
پولیس کا کہنا ہے کہ حملے کے محرکات کا تعین تحقیقات مکمل ہونے کے بعد ہی کیا جا سکے گا۔
شہریوں سے اپیل کی گئی ہے کہ وہ مشکوک سرگرمیوں کی اطلاع فوراً متعلقہ حکام کو دیں۔
بم حملے کی ذمہ داری تاحال کسی تنظیم نے قبول نہیں کی ہے ۔تاہم گذشتہ 24 گھنٹوں کے دوران بلوچستان کے علاقے کوئٹہ اور ہنہ اوڑک میں 2 بم حملوں میں ایک کی ذمہ داری بی ایل اے نے قبول کرلی ہے ۔
