غزہ کی وزارت صحت کے مطابق اسرائیلی فوج کی جانب سے شمالی غزہ کے ایک سکول پر کیے جانے والے فضائی حملے میں کم از کم 27 فلسطینی ہلاک ہو گئے ہیں۔
غزہ کے شمال مشرقی حصے تفاح میں واقع سکول دار الارقم میں بے گھر خاندانوں نے پناہ لی ہوئی تھی۔ مقامی ہسپتال کے مطابق حملے کے نتیجے میں درجنوں افراد زخمی ہوئے ہیں۔
دوسری جانب اسرائیلی فوج نے اپنے بیان میں دعویٰ کیا ہے کہ انھوں نے غزہ سٹی میں ایک ایسے مقام پر حملہ کیا ہے جہاں ’حماس کے اہم دہشت گرد ایک کمانڈ اور کنٹرول سینٹر میں موجود تھے‘ تاہم اس بیان میں انھوں نے سکول کا ذکر نہیں کیا ہے۔
غزہ کی وزارت صحت نے دعویٰ کیا ہے کہ پچھلے 24 گھنٹوں کے دوران اسرائیلی حملوں میں مزید 97 افراد ہلاک ہو چکے ہیں جبکہ اسرائیل کہہ چکا ہے کہ اس نے فلسطینی علاقے کے بڑے حصوں پر قبضہ کرنے کے لیے اپنی زمینی کارروائی کو وسعت دی ہے۔
غزہ میں حماس کے زیر انتظام سول ڈیفنس ایجنسی کے ترجمان محمود بصل نے کہا ہے کہ دار الارقم سکول پر حملے کے بعد ہلاک ہونے والوں میں بچے اور خواتین بھی شامل ہیں۔
غزہ کی سول ڈیفنس ایجنسی کے ترجمان نے مزید کہا کہ اس حملے کے بعد سے ایک حاملہ خاتون، ان کا شوہر، بہن اور تین بچے بھی تاحال لاپتہ ہیں۔
دوسری جانب قریبی ہسپتال ال اہلی سے ملنے والی ویڈیو میں دیکھا جا سکتا ہے کہ زخمی بچوں کو گاڑیوں اور ٹرکوں میں شدید زخمی حالت میں ہسپتال پہنچایا جا رہا ہے۔
اسرائیلی دفاعی فورسز (آئی ڈی ایف) کی جانب سے جاری ایک بیان میں دعویٰ کیا گیا کہ غزہ شہر میں جس مقام کو نشانہ بنایا گیا وہاں سے حماس کے جنگجوؤں کے ذریعے اسرائیلی شہریوں اور فوجیوں کے خلاف حملوں کی منصوبہ بندی کے لیے استعمال کیا جا رہا تھا۔
آئی ڈی ایف کے مطابق شہریوں کو نقصان سے بچانے کے لیے کئی اقدامات کیے گئے ہیں۔
یاد رہے کہ جمعرات کی صبح اسرائیلی فوج نے شیجائیہ اور اس کے گرد و نواح میں رہنے والوں کو فوری طور پر مغربی غزہ سٹی منتقل ہونے کی ہدایت دیتے ہوئے خبردار کیا تھا کہ ’پوری طاقت کے ساتھ دہشت گردانہ ڈھانچے کو تباہ کرنے کے لیے کارروائی کر رہے ہیں۔‘
آئی ڈی ایف نے رواں ہفتے شمالی غزہ کے کئی علاقوں، جنوبی شہر رفح اور قریبی واقع خان یونس کے کچھ حصوں کے لیے بھی اسی طرح کے انخلا کے احکامات جاری کیے۔
اقوام متحدہ کے مطابق ان احکامات کے باعث تقریباً ایک لااکھ فلسطینی نقل مکانی پر مجبور ہوئے۔
