بلوچستان کے ساحلی علاقوں میں پاکستان کوسٹ گارڈ کے رویے اور جگہ جگہ چیک پوسٹوں کیخلاف ٹرانسپورٹرز نے کل بروز ہفتہ 15 مارچ کومکران کوسٹل ہائی وے پرگاڑیاں نہ چلانے کا اعلان کیا ہے ۔
سندھ بلوچستان ٹرانسپورٹرز نے بلوچستان میں مکران کوسٹل ہائی وے پر مسافر کوچز کی بندش کا اعلان کرتے ہوئے سخت احتجاج کی کال دے دی ہے۔
سندھ بلوچستان ٹرانسپورٹ یونین نے اعلان کیا ہے کہ 15 مارچ سے مکران کوسٹل ہائی وے پر کوئی مسافر کوچ نہیں چلے گی۔
ٹرانسپورٹرز نے ضلعی انتظامیہ گوادر کے نوٹیفیکیشن کو ظلم قرار دیتے ہوئے مطالبہ کیا ہے کہ جب تک یہ نوٹیفیکیشن واپس نہیں لیا جاتا، احتجاج جاری رہے گا۔
یوسف گوٹھ ٹرمینل میں ہنگامی اجلاس کے بعد ٹرانسپورٹ یونین نے موقف اختیار کیا کہ کوسٹل ہائی وے پر کوسٹ گارڈز کی بے شمار چیک پوسٹوں کی وجہ سے تاخیر ہوتی ہے، اس کے باوجود ضلعی انتظامیہ کا ٹرانسپورٹرز کو نوٹس جاری کرنا ناانصافی ہے۔
ٹرانسپورٹرز نے مطالبہ کیا کہ چیک پوسٹوں پر چیکنگ کا نظام مزید بہتر اور تیز کیا جائے تاکہ مسافروں کو مشکلات کا سامنا نہ کرنا پڑے۔
ٹرانسپورٹرز نے خبردار کیا کہ اگر ان کے مطالبات تسلیم نہ کیے گئے تو احتجاج مزید سخت کیا جائے گا۔
