کِسّھے ، کِسّہ ءِ ستاشانی ءَ سِتک ءِ بُندر ءَ کِسّہ کار اِیت ءُ گْوش اِیت۔۔۔۔۔۔۔۔ما پد ءَ واتر کائیں ءُ ھمُک ارواہ ءِ اندر ءَ دم کشّ اِیں۔۔۔۔۔۔۔۔۔۔، ڈیھ ءِ ھر دمکاں شیدائیں پاتو ءُ سْرپتگیں پُلّانی وشبوھے شِنگ اِیت ءُ اِنسِرتگیں جھان جھ سرّیت ، دشت ءُ کُوچّگ ، پٹّ ءُ گیابان ، کوہ ءُ ترشتیں تلار ، ھسار ءُ تیھریں مات بند ، لد ءُ کھچر ، نیلبومیں زِر ءُ گوھریں رِیگزار ، کِسّہ نویس اَنت۔۔۔۔۔۔۔۔۔۔
بلّانی کپوت۔۔۔۔۔۔۔۔کھیرانی زھیرنالیں شانتُل۔۔۔۔۔۔۔۔باگانی کُلی شیزار اَنت ءُ آشوب ءِ نام ءَ گْواچنیں سَوت گْوپ اَنت ، دِھکان پہ لئیکو کائیگراں جُگ ءُ ننگار کن اَنت۔۔۔۔۔۔۔۔، ساربان پہ مڑاھے گلگ ءَ اُوسپان کنت ءُ دمے بالا ءَ کنت۔۔۔۔۔۔۔۔۔۔
شِپانک گوں میش ءُ بُزگلاں بست ءُ ڈل دیم ، گْواش ءُ گْور دیماں زھیروک جنت ءُ نل ءَ ساز کنت۔۔۔۔۔۔
راج ءِ ماھلیں کاڑ نازینک جن اَنت ءُ مات پہ بچّاں پھر بند اَنت ، ما پد ءَ واتر کائیں سُرمگیں ڈیھ ءِ آتراپاں دُژمِن ءَ بیھار دے اِیں گْوش اِیں۔۔۔۔۔۔داں اے ڈگار ءِ دامُن ءَ سگاریں زھمے شَھم اِیت پہ ترا اِیمنی ءِ سارتیں کَوش کدی نہ کشّ اِیت۔۔۔۔۔۔۔۔۔
چی ءَ کہ اے زِر ءِ چَولاں من ءَ چو مات ءَ شاگیں گْوانزگ ءَ چنڈینتگ ءُ لیلو داتگ ، بچّیگ من ھما روچ ءَ تئی سر ءَ پھر بنداں کہ تو پہ منی لسّھیں شار ءِ پلگارگ ءَ گوں درآمد ءَ جنگ کن ئے ، بلے پہ آئی ءِ وش آتک ءَ کدی شاتمانی نہ کن ئے۔۔۔۔۔۔۔۔۔
ما مجید برگیڈ ءِ پرزند اِیں ، ما ازل ، وسیم ، اِھسان ءِ سنگت اِیں ، ما زِرپھازیں ھمّل پتھے ، اسد جان ، مِسب کریم ءُ کچکول ءِ ھم کُوپگ اِیں ، ما ریھان جان ءِ ھمسپر ءُ کاروان ءِ سِپائیگ اِیں ، ما چتور تئی بیھار ءُ زُوراکی ءِ دیم ءَ سر جھل بہ اِیں کہ تو آس بِہ دے ءُ ما آپ بِہ جن اِیں۔۔۔۔۔۔۔۔۔۔
ما سرپدیں آس گوں آس ءَ تُوسگ بیت۔۔۔۔۔۔جنگ گوں جنگ ءَ گُٹگِیر بیت ، پمیشکا ما پہ پَھر ڈیھ پاسپانی ءِ جنگ ءَ سرانی ندْر ءُ کَولیگ کنگ ءَ چک ءُ پد نہ اِیں۔۔۔۔۔۔۔نیکہ بَہ اِیں۔۔۔۔۔۔۔۔
چی ءَ کہ اے جنگ ءَ ما پہ وتی تھنائیں زِند ءِ وش ءُ وشھالی ءِ ھاتِر ءَ کنگ ءَ نہ اِیں ، بلکیں اے جنگ ءَ ما پہ وتی آیوکیں پدریچ ءِ ھاتِر ءَ کنگ ءَ اِیں دانکہ آ باندا پہ مُدیمی وتی گُلزمین ءِ سر ءَ زِندگ ءُ ابدمان بِہ بیت۔۔۔۔۔۔۔۔۔
اے راستے کہ ھر یکّے ءَ وتی بھاریں زِند ءُ سالونکیں سر دوست اِنت ، بلے اے ھبر پہ راجدوستیں راج پھازیں پُسّگاں ھِچّ مانایے نہ دار اِیت۔۔۔۔۔داں آ سر پہ ڈیھ پاسپانی ءَ ندْریگ مہ بیت ۔ ءُ آ اے ھبر ءَ ھم دِلجم اَنت کہ ما چہ مرگ ءَ پد پہ مُجّتی ابدمانیں بَہ اِیں راجدپتر ءِ دِلبند ءَ ، راج ھر زِرد ءِ درِیکگاں پیوند باں ، راج ھر ارواہ ءِ ساھگ ءَ کلاتے بنداں ءُ توکلے آچاں ، من کدی نہ مِر آں۔۔۔۔۔۔کدی نہ مِر آں ، بلکیں پد ءَ واتر کائیں۔۔۔۔۔۔۔۔۔پد ءَ واتر کائیں۔۔۔۔۔۔۔۔۔
بَہ کَول ء پِدائی سلمان ھمّل کہ وتی شَیر ءِ تہ ءَ مارا چے گْوش اِیت
ھاک ءِ وشبوھاں ھواریں پد ءَ واتر کائیں
جنگ ءِ ما کسّھاں کاریں پد ءَ واتر کائیں
شور ءِ دِلبند گْوائیں ما وتی سر داتاں
آس پہ دُژمِن ءَ گْواریں پد ءَ واتر کائیں
ما مُریدیں ءُ زمین پہ ما گْوش ئے چو ھانی
اِشک ءَ انچو ما کُماریں پد ءَ واتر کائیں
چو کُجا سبز باں آشوب ءِ گُلابیں گْواڑگ
رِتکگیں ھون ءِ بھاریں پد ءَ واتر کائیں
جی پہ آشوب ءِ یلّیں بچّاں سراں بکشایاں
دوست ءُ ھمرھاں مزاریں پد ءَ واتر کائیں
