سال 2019ءَ سوڈانءَلس مھلوکی آشوب ءِ کیت اِنت ءُ اے آشوب عمر بشیر ءِ سی ءُ پنچ سالی ڈیکٹیٹرشپ ءَ ھلاس کنت ءُ لس مھلوکی راجءِبُنھشتءَ ایر کنت، اے آشوبءِ رھشونی کنوک سوڈانءِ ڈاکٹر بنت، ڈاکٹر زمینءِ بزگر ءُ لس مھلوکءِ علاج کنوک انت ءُ آھانی درداں جوانیءَ سرپد بنت۔ ھمے درد آھانءَ راجی زرمبش ءَ گوں ھمگرنچ کن اَنت۔
ھمے سوب اِنت کہ زورگریں اِستان ھمک وھدءَ چہ اے پیمیں پگری ڈاکٹراں ترسءِ آماچ اِنت۔ آ ڈاکٹر سوڈانءِ الہ نگداللہ بہ بیت، کیوبا ءِ ڈاکٹر چے گویرا بہ بیت یا کہ بلوچستانءِ ڈاکٹر دین جان۔
زورگریں استان ءِ زوراکی برجاہ اِنت ھما ڈاکٹرانی سرا کہ آ یک رژناھیں پکرےءِ واھند اَنت، استانءِ زوراکی اِنت کہ بلوچ راجی آجوئی ءِ جنزءَ گوں بندوکیں، بلوچ ڈیھءِ بازیں ڈاکٹر ماں بندی جاھاں بندیگ انت، بازینے شھید کنگ بوتگ ءُ باز راجی آجوئیءِ جنزءِ سرپءَ وتی لیکہءِ بنیاتءَ وتی جد ءُ جھدءَ دیمءَ برگءَ اَنت۔
ھمے ڈاکٹراں چہ یکے ڈاکٹر دین جان انت کہ آ 28 جون 2019 ءَ چہ اورناچ خضدار ءَ آئیءِ نادراھجاہءَ چہ آوار جنگ بوت۔ چہ آئیءِ بیگواھیءَ پد ڈاکٹرانی آوار جنگءِ رِد یکشلہ برجاہ بوت ( مرچی ھم ایش رد برجاہ انت ) ءُ بیگواھانی لڑ ءَ نام گیش بوان بوت انت۔
ڈاکٹر دین جان کہ آ بلوچ راجی آجوئیءِ جنزءِ رھشونی کنوکیں سیاسی پارٹیءِ بنھشت ءِ ایر کنگءَ ھوار انت۔ وھدے چیئرمین غلام محمد ، رحیم ایڈوکیٹ ، لالا منیر گوں وتی سنگتاں بلوچ راجی جنزءِ سیاسی عوامی مھازءِ بنھشتءَ ایر کن انت ، اودءَ ڈاکٹر دین جان چیئرمین غلام محمد ءِ ھمکوپگ بیت، پدا شھر ، میتگ ، کوہ ، گیابان، کلیں نیمگاں آجوئیءِ توار چست بوان بیت ، برے خضدار، برے کیچ، برے کوھلو ءَ آجوئیءِ کاروان جنزان ات۔ مرچی ھم چیئرمین غلام محمد ءُ ڈاکٹر دین جانءِ کاروان دیم پہ منزلءَ جنزان انت۔
ڈاکٹر چے گویرا گش ایت کہ کیوبن جنگءِ بنداتءَ من جنگءِ تہءَ یک ڈاکٹرےءِ بستارءَ ھوار بوتگ آں ، بلے ھمے جنگءِ میانءَ یک انچیں وھدے اتکگ کہ منی دیمءَ دو راہ پشت کپتگ کہ منءَ گچین کنگ لوٹ اتگ کہ من جنگءِ تہءَ یک ڈاکٹرےءِ ھیسیتءَ بھر بہ زور آں یا کہ یک جنگولے ئے ؟ گڑا تیرگواریءِ میان ءَ من ایش پیسلہ کتگ کہ من جنگءِ تہءَ یک سپاھی یے باں۔
بگندئے بلوچ ڈاکٹرانی گورءَ ھم یک انچیں جاورے اتکگ کہ آھاں پیسلہ کنگی بوتگ کہ آھانی یک نیمگے وشیں زند ءُ وتی کھول ءُ واھشت ءُ دومی نیمگءَ بلوچ راجی جنز ءِ میان ءَ یکے گچین کنگی بوتگ۔ ایش جاہءَ ڈاکٹر دین جان ءُ سنگتاں وتی زمینءَ پہ جد ءُ جھد کنوکیں کِشک گچین کتگ۔
اورناچءَ چہ ڈاکٹر دین جان بیت ایں یا کہ جاؤ ءَ چہ ڈاکٹر منان ءُ یا کہ اکبر مری چہ کوھستان مریءَ ، آھاں وتی پیلڈءِ تھا پدمنتگیں بلوچ مھلوکءِ ھاترا پہ کار کتگ ءُ دومی نیمگءَ بلوچءِ گلامیءِ نادراھیءِ علاج کنگءِ ڈُبّءَ وتی کوپگاں زرتگ۔ ھمے ھاترا بلوچ ڈاکٹر آنی سرا زور آوریں استانءِ زوراکی تْرندیءَ گوں برجاہ انت۔
یوراگوےءِ پریزڈنٹ (2010-2015) جوز مجیکو 1970\80 ءِ دھک ءَ یوراگوےءِ ڈیکٹیٹرشپ دورءَ دوازدہ سال ماں زندانءَ بندیگ بیت ءُ مئے ھم بازیں جوز مجیکو پاکستانءِ زندانءَ بندیگ انت ، علی اصغرءَ بیست سال انت کہ بیگواہ انت ، سمیع ءِ پتءَ پہ آئیءَ 11 سال ودار کت ءُ ایش دنیاءَ پہ مدامی یلہ دات ءُ سمیع ءِ ودار انگت برجاہ انت ءُ کودکیں علی اصغرءَ وتی کسانیءِ یازدہ سال ماں پریس کلبءَ پہ زھرشانیءَ ببا دات ءُ سمی ءُ مھلب مرچی ھم پہ ڈاکٹر دین جانءِ بچکندےءِ ودارءَ نشتگ انت۔
کھولانی مردماں پہ یکےءِ پت ، یکےءِ برات، یکےءِ چکءِ سدگ ءِ درد انت بلے پہ پارٹیءَ یا پہ راجی آجوئیءِ جنزےءَ چوشیں کیڈرےءِ روگ پہ پارٹی ءَ بے کساس تاوان انت، چیءَ کہ ھمے کیڈر ءَ وتی راجءِ رھشونی کنگی انت ءُ جنگءَ را یک منزلےءَ سر کنگی انت۔
داں گلامی برجاہ انت اے گار ءُ بیگواھیءِ دِرچ ھم برجاہ بیت ، داں بلوچءِ پگری جھد دیمءَ جنزان انت ایش گار ءُ بیگواھیءِ لڑ ودان بیت۔ کارست ھما اَنت، پکر ھما اِنت ، جھدءِ بیرک بڑّ ءَ اِنت، بس نام مٹ بوان بنت ءُ راجی آجوئیءِ جُنز برجاہ بیت۔
