” اُمّیت ءِ آس ءَ سُتکگ منی زِند ءِ زِندگی
لُنٹاں کدی نہ دیستگ بِچکند ءِ زِندگی "
روزرد گوں رولہ ءِ رنگاں جُنز اِتگ اَت ءُ شپ ءَ نوکی ھنکین کُتگ اَت کہ میتگ ءِ پدی پاند (پُشتی نیمگ ءَ) ءَ مُوتکے رُست ءُ ھلک ءِ مردُم یک یکّ ءَ دیم پہ ھما مُوتک ءِ نیمگ ءَ ، بلے منی دِل ءَ جت۔۔۔۔۔۔چو بِہ بیت ناکو دلمراد ءَ اے کُوڑھیں اِمروز یلہ دات۔۔۔۔۔۔۔۔چہ شش ماہ ءَ گیش اِنت کہ تھت ءِ باھوٹ اِنت۔۔۔۔۔۔۔۔۔۔
من ھم گوں ھمے ھیالاں پرزونگ پیتک ءُ مات ءِ ھمراھی ءَ دیم دات ناکو دلمراد ءِ گِسانی نیمگ ءَ ، وھدے ما ناکو دلمراد ءِ گِسانی کِرّ ءَ سر بیت اِیں۔۔۔۔۔۔چاراں ناکو دلمراد ءِ جکّگاں مارا پیسر ءَ مِستاگی گِپت۔۔۔۔۔۔۔۔، گُڑا من گیش اجکّا بیتّ آں ءُ دِل ءِ درِیکگانی توار آزمان ءَ پدانک بندگ ءَ اَت۔۔۔۔۔۔۔۔
نوں زِرد ءِ جنگ جاہ ءَ اجب رنگیں جُست مان اَڑان اَت ءُ گام پہ شِلنگ ءُ ھلاھُوشی کپان اِت اَنت داں ھمساھِگ ماھان ءِ گِس دپ ءَ سر بوت اِیں چاراں تانسریں میتگ جُمب اِتگ ءُ ماھان ءَ گوں وتی کَھول ءَ زار ءُ پِریاتے چیر۔۔۔۔۔۔۔۔۔۔۔
من زانت اے کھریں زُوراکاں چہ ماھان ءَ آئی ءِ تاسُپیں بچّ کمبر پُل اِت ءُ نازینک جنوزام کُت۔۔۔۔۔۔۔۔۔، باھڑ ، کلمپُر ءُ شانتُل چورہ کُت اَنت۔۔۔۔۔۔۔۔۔، شاھل ءُ مھتاپ بے برات۔۔۔۔۔۔۔۔۔پِت ءَ بیچارگ ءَ سالے ءَ پیسر ءَ وتی گم ءُ رنجانی بار کُوپگاں بست چرے ھنکین ءَ لڈّ اِت ءُ وتی مُدیمی دوار ءَ رپت۔۔۔۔۔۔۔۔۔۔
اے سکّیں ساھت ءِ ارس گْواریں نِدارگ گوں منی چمّاں چارگ نہ بوت ءُ من مات ھمود ءَ یلہ دات ءُ واتر گِس ءَ اتک آں۔۔۔۔۔۔۔
جیڑان جیڑان گِس ءِ سر بُوَگ ءَ ھوار ھیالانی اندر ءَ دوگْوانک بوت آں ، چاراں اے شپ ءِ تھاری ءَ منی چمّانی دیم ءَ شَھمے ءَ مانشانت ءُ دو ساھگ سھرا بوت کہ دَگے ءَ رھادگ اَنت۔۔۔۔۔۔۔۔۔
ھمے چارگ چارگ ءِ مْیان ءَ دوئیں ساھگانی پادبرمش ماں رُمبے ءَ بدل بوت ءُ توارے ءَ چاریں آتراپ جکسّینت ، گوں اے دوئیں ساھگانی ھمراھی ءَ دِگہ ھزاراں ساھگ ھمے دَگ ءَ گوں ارسیگیں چمّاں رھادگ اَت۔۔۔۔۔۔۔۔بلے تھاری ءَ وتی بالاد چو میھ ءَ میھ مِتگ اَت کہ رُژن پہ کَلھے گِندگ نہ بوت۔۔۔۔۔۔۔۔۔۔۔
چہ اے ارسیگیں نِدارگ ءِ گِندگ ءَ پد منی گُمان ءِ کدّہ ءَ مِھلب ءِ دُتُّکیں بالاد سنگرگ ءَ اَت کہ مِھلب انگت ودار ءِ سِیمسراں برے دریگ ءُ برے چانٹ ءِ دپ ءَ نِشتگ ، برے دست ماں چوکاٹ ءَ کُتگ اَنت ءُ گوں ودارِیگیں چمّاں اُوشتاتگ۔۔۔۔۔۔بِہ گِندئے ابّا بئیت ءُ دِل ءِ اے گمانی گْرانیں بار پہ مُجّتی سُبکّ بِہ بیت۔۔۔۔۔۔۔۔۔۔۔
بلے!
مِھلب مزن بوتگ۔۔۔۔۔وھد ءُ موسماں یازدہ تاکریچ پِلِکّ اِتگ ، ودار ودار ءِ نِوان ءَ اندیم بُوھان اِنت ءُ بھارمیچ ءِ مِستاگی ءَ موسمے انگت سنجی نہ اِنت۔۔۔۔۔۔۔۔۔
دِل پد ءَ مارِشت ءِ بُنزِہ ءَ چو لیڑہ ءَ درِیشّاپ کنان بوت ءُ گْوشگ ءَ لگ اِت ، زِری تو چے گْوش ئے اِے زِند ءِ جنجالانی درمان اِزگند نہ اِنت۔۔۔۔۔۔۔۔۔؟
مئے راج داں کد تماشائی بیت ءُ دِل ءَ پہ سبر سھڑینّیت۔۔۔۔۔؟
مئے راج داں کد اِنساندوستی ءِ نام ءَ اُوستیگیں چمّ ءُ اُمیتانی دستاں پہ دری مھلوک ءَ ٹال کنت کہ من ءَ چہ زُوراک ءِ زُورانسری ءَ اِنساپ بِہ دے۔۔۔۔۔۔۔۔۔۔۔؟
داں کد۔۔۔۔۔۔۔۔؟؟ داں کد۔۔۔۔۔۔۔۔۔؟؟؟
گْونڈیں دمانے ءِ بے تواری ءَ پد سسّا ءِ شِک اِتگیں دامُن چاک چاک بوت ءُ جُستانی پسّو ءَ یکّیں دانک درکپت ، داں تو وتی مِنزل ءِ آسر کنگ ءَ وت پاداں سواس ءَ مہ کن ئے۔۔۔۔۔۔۔۔۔دُگنیا پہ تئی چمّگ ءِ درروُپگ ءَ کدی پہ ٹیکُم ءُ کوڈال نہ بیت۔۔۔۔۔۔۔
گُڑا پہ جزم بِہ زان اے ودار ودار ءَ پِلِکّ اِیت۔۔۔۔۔۔۔۔۔۔بلے آسر نہ بیت ، داں تو ھمے چاچ ءِ بندگ ءُ ڈیل دَیَگ ( جَنَگ ءُ مانا کنگ ءَ) ءَ مُلمہ بِہ بَہ ئے۔۔۔۔۔۔۔۔۔۔۔
