منی ھنکین کہ چُش تباہ کُت ؟ – نبشتانک:۔ روھیل بلوچ

سھبی کہ پاد آتکاں دل ءَ نہ گُشت وٹسپ ءِ میسجاں   بچار . من زانت ھر کسی گپ ھمیش اِنت” ائید مبارک وتی ھق ءَ پِھل کن منی ھق ترا  پِھل اَنت”. من چو نہ مروچی گیش زدگ اِت آں .
ھر نیمگ ءَ کہ منی چم گَشت اَنت .
ھون اِت اَنت 
گار ءُ بیگواھی اَت
چُوراھانی ائیدی روچ ءَ لنٹانی  ھشکی  اَت  .
ھُدا ءَ دوست بوتگیں(شہیدانی) پُشپدانی  کبرانی سرا ھسکار ءُ پریات اَت ۔
من ءَ پمشکا  ھمے ھک  پِھلی گُشگ  تب ءَ نہ کپت .
اودا کہ منی دل لوٹیت ھک پِھلی بکن آں یا من بُگوش آں  ترا منی ھک پِھل نہ اَنت ۔ آیاں گوں سک دیر اِنت ناں  نیادے بوتگ ناں سلام ءُ دُعایے .
من فیسبوک پچ کُت ۔ منی دیم ءَ اولی ءَ یک رکاٹ(سوت) یے کپت اردو ءِ زمانگی رکاٹے اَت
من ءَ منی ھدامرزھی ئیں اَبی (پِیرُوک)داد مھمد  گیر آتک من اِے رکاٹ ءِ ایش کنگ ءِ ھمراھی ءَ چم بند کُت آں گُشئے من 18 /16 سال پشت ءَ شُت آں . من وتی ھنکین ءِ بُو ءُ باس مارِت.
بلے ائیدے ءِ روچ اَت ۔
منی دپ ءَ اَبی داد جان ءِ ھیری چاھانی تام آتک . گُشئے اَمی ( بلوک) سر گپتگ اَت پہ وتی براتانی ھلک ءَ۔ گشت ئِے  رَوَ آں منی پیریں مات من دیر اِنت نہ دیستگ.
منی مات امی ءِ ھمراھی ءَ رَوَگ ءَ ساڈی اَت۔ پرچہ کہ ائید ءُ وشّیں روچاں ھر کس وتی ماس ءُ مردمانی گندگ پہ مرادی اَت .
امی ءِ آ دِگہ  دویں نِشار کمے پیسرتر شُتگ اِت اَنت ۔  آیانی ماس ھمے بازار ءِ نندوک اِت اَنت ۔
آ ستار جان ءَ گاڈی ءِ سر ءَ بُرتگ ءُ سر کُتگ اِت اَنت
من گپے ءَ بیھال آں ۔۔۔
سنگین اِے روچ ءَ ماس ءَ شوک کُتگ اَت ماس ءِ گُشان ءِ لمبے  داشتگ کجاہ کے ماس شُت دمب ءَ گوں اَت گون.
ناکو واپس آتک دیست ئِے ماس ءُ نیشار پِیدل ءَ سر گپتگ اِت اَنت ءُ گُشت ئِے امی سبر کن اِت ما شُما یکجاہ رَوَ ایں
من گَل بوت آں کہ ما گاڈی ءِ سر امی ءِ ھلک ءَ رَوَ ایں ۔
ستار نور ھاتون  ءِ دوستریں نُماسگ اَت ۔اے گپ چہ کس ءَ چیر نہ اَت .
بِگند ئے  ستار اوں اِشتاپ اَت پہ آئی ءِ گندگ ءَ . نورھاتون ءَ ستار ھر وھد ءَ پہ نیک دُعا سلام ءُ وش آتک کُت . چہ وش آھت ءَ ساری دعاھانی رُومبے پہ ستار ایر اَت۔
بِگندئے ھمے مھر اِت اَنت ستار ئِے ءُ آئی نیام ءَ
کہ ءَ چہ 18/20 نُماسگ ءَ چہ گیش دَوست تر اَت .
ستار ءَ وھدے اَبی دیست ءُ گُشت ئِے ابی بھتارو تئی واست ءَ من دو دزمال ( چادر ) زورتگ.
ترا بدنامی انگت ءَ ھمے پولنگیں زرمال سر ءَ اِنت۔۔۔۔ نماز ءَ شُتگ ئے .
من ءَ ھَکل ئِے  کُت برو امی ءَ بُگوش ابی ءِ نوکیں دزمالاں چِے یکے بدئے .
اِے وھد ءَ ناکو ءِ چُک دُرست گوں وتی مات ءِ ہمراھی ءَ وتی بلکوک ءِ ھک ءُ پھلی ءَ شُتگ اِت اَنت .
من دل ءَ کُت من ءَ ناکو ءَ پرچہ ھَکل دات . من شُت امی گُشت ءُ امی ءَ دزمال در کُت سینٹ ئِے جت  ءُ  وت بُرت ئِے ناکو ءِ دست ءِ دات . ناکو ءَ ابی ءِ پُولنگی ئیں  دزمال دور کُت ءُ نوکینے سر ءَ دات .
من اشتاپ اِت آں کدی بیت مارا ناکو زوریت ءُ بارت کلات ءِ بازار ءَ . ( کلات ءِ بازار اَمی نورھاتون ءِ بازار اَت )
ناکو ءَ ابی ءَ آئرا پہ مھرے گُشت ابی تو کا ئے گوں ھاجی ءِ زھی ءِ نیمگ ءَ ؟؟ یا دِگہ جاگے رَو ئے ھک پِھلی ءَ ؟
ابی گُشت من  رَواں وتی ناکو ءِ چارَگ ءَ ( بزان کھدا غلام نبی ) ءِ
ناکو ءَ گُشت گُڈا سبر کن ترا بَراں  سر کناں۔
ابی ءَ جواب ترینت  من وت رواں.
تو وتی ماس ءَ بُزو بُرو وتی امی ءِ چارَگ ءَ.
گومے گپّ ءَ ابی ءَ سْیہ چاھے ایریتک ءُ وارگ ءَ شروع بوت.
ھمدا  من گپّے کِمار کُت چہ منی پس ءُ جاوید ءَ ۔ ناکو ستار گیشتر  ابی ءِ ھیال ءَ داریت
من ھمے گپ ءِ سر ءَ گیشتر جیڑگ لوٹ اِت.
ھمے دمان ءَ دو گونڈو وت ماں وت نبد مِڑتگ ءُ یکے  ابی ءِ سر ءَکپت .
ابی ءَ پہ زھر گُشت کستےخوار چٹ اِت دیاں شاماتے مِس بکن ئے .
منی دلگوش اِد ءَ اَت کہ  من ءَ ناکو ءَ توار بِر جت ءُ گُشت ئِے بیا اِے زَرّاں بر وتی پس ءَ بدئے اِش ۔ بلئے شمارا ائیدی یے دَنت .
من مرچی ماراں زَرّ انچوکیں چیزے نہ اَت .
آئی ھیال داری ءِ مستریں مکسد ھمیش بُوتگ منی براس وتی چُکانی دیم ءَ نیست ءَ کم دست زانگ مہ بیت .
ستار ءِ وَڑیں برات پہ کسمت کس ءَ نہ رسی اِت.
ما شُت ایں کلات ءِ بازار گول اِت  .
شپ ءَ وھدے ما پدا درست ھور ءُ یکجاہ بوت ایں ھر کس واتر بوتگ اَت ۔ چہ گردگ ءُ ھک پِھلی ءَ .
اِے شپ ءَ منی دویں تُرو ھم آتکگ اِت اَنت
مئے کَہول  سرجم اَت۔۔
کندگ اَت ۔کُوکار اَت ۔مستی اَت ۔ . ما کستریں ھر کسّ یکے دومی ءِ دیم ءَ ھمے شو ءَ کنگ ءَ  اَت اِیں ۔ کہ منی ائیدی باز اَنت آئی گُشت منی ائیدی باز اَنت ما ماشاءاللہ 18/19 گونڈو اَت اِیں
ابی ءَ ھمے کوکار ءِ ھچ تَب نیست اَت .
دیم ئِے گردینت ءُ گُشت ئِے  بس کن اِت  ڈئے (کستے خوارانی ) زھگاں .
ابی دژماں دیگ (زا) ءَ مشہور اَت . آئی کسّے  آسرا نہ کُت . وتی دویں دُژمان ئِے دات اَنت .
ابی ءِ شخصیت ءَ گوں سے چیز بندوک اَت
اولی : سیاھیں چاہ گوں ھیر ءَ
دومی : پیناسونک ءِ ریڈیو . بی بی سی ئِے گوں پابندی ءَ ایش کُت
سیمی : دژمان اَت .
ستار ءِ بیگواھی ءُ شھیدی ءَ رند مئے لوگ ءِ آئید یک پُرسی پترے ءِ دروشم بوت ۔
ستار ءِ شھیدی ءِ زوت آں سنگین ءَ من ءَ بے گُھار کُت ءُ شُت ۔۔۔سنگین ءِ مرگ ءَ مارا گپش تھ پروش کُتگ اَت  . سنگین ءَ ھر وھد ءَ پس ءَ را جست کُت. ناکو کُج اِنت ناکو پرچہ اِے ائید ءَ نہ یتکگ ؟؟
بگند ئے اِے اولی ائید ءَ کہ ستار ھوار نہ بوتگ اَت دومی ائید ءَ تاں سنگین اوں سبر نہ کُت .
اِے دردانی ساھت من پہ وت دیستگ  اِت اَنت .
لوگانی توک ءِ مردمانی بیگواھی .
بیگواہ بوتگیں مردم ءِ مرچی باندا ءِ آسر ءَ  مرگے ءَ چہ گمتر نہ اِنت .
ھمے مرگی ساھتاں ترا ھما گاریں مردم ءِ لاش ساڈینگ ءُ چہ تو چِیر دیگ بِہ بیت .
ترا وتی مردم ءِ لاش ءِ وتی کنگ ءِ ھک مہ بیت . من ءَ مرچی ھمے واست ءَ ھق  پھِلی تب نہ بوت .
پرچہ کہ من آیانی درد ءُ رنجان گوں آشناہ اِت  آں    .
ستار ءَ پدا ابی ءِ گنوکی……
مُدتے پہ گنوکی گْوست . ستار۔۔۔۔۔۔۔ستار کنان ءُ زمین  ءِ باھوٹ بوت
آئی ءَ پد اَمی بزگ اَنچو سر پہ گنوکی در آروت
برے برے گَشت ءُ دژمان ئِے دات .
بلے امی ءَ دژمان پہ گنوکی دات سر ئِے وت نہ اَت۔
آئی چمّاں ھر کس کہ رو ء زمین سر ءَ گَشت  ستار ءِ  کاتل اَت. 
برے برے پاد ء ھک ھُشت . دِگی اللھی بنداں گپت ءُ آرت . من ءَ وھدے اِے ھال سر بُوت اَنت ۔
من گُڈا دلے سیر ءَ گیریت ءُ دعا لوٹ اِت . من چے دعا لوٹ اِت آئی من اِدا گُشت نہ کناں  .
پہ ھمے وڑا آئی 6/7 سال گوزینت .
گوستگیں سال ءَ گپڈے روچ بے سار ءُ بے سما بوت وتی کسّے پجا نیارت ۔ گڈی ءَ سرے ما گوریچان ءَ دات .
من وت ءَ سکیں بد نسیبے گُشاں .
من ءَ  ناں ستار ءِ گُڈی دیدار بسیب بوت . ناں آئی کبر ءِ گندگے ۔ . من ءَ ستار ءِ سک باز ھک گون ۔  من ءَ  دِگہ دو زند بہ رسیت من آئی  ھکاں چِہ در آتک نہ کن آں . گُڈا ھک پِھلی ستار گوں وش اِنت .
سنگین ءِ اوں اَنچو۔۔۔ 3 ماہ ءَ رند سرپد بُوت آں کہ سنگو ءُ شُتگ بد نسیبی دیگا کجام اِنت ؟
ابی داد مھمد ءَ ھم بے ستار ءَ وش نہ بوت ءُ شُت .
ابی اوں گندگ نہ بوت. ناں آئی زندے ءِ گڈی روچاں گندوک کسمت بوت ناکہ آئی کبر ءِ سر ءَ  دستے  دارگ  اللہ ءَ نسیت ءَ کُت .
ستار ءُ اَبی ءَ پد اَمی سک ایوک اَت ستار ءِ مھر ءُ دلگوش کس نہ کُت اَنت .
برے برے منی پس ءَ گوں ھبرے  کُت گُڈا ابید گیروگ ءَ دِگہ ھِچّ گپّ ءُ ھالی نہ اَت.
اگاں گپّے کُت ئِے گڈا  ھمے 
منی ھنکین پرچہ شما یلہ کُت  ؟؟
منی ھنکین کہ چُش تباہ کُت ؟؟ .
پس ءَ تسلی دات ءُ دورگ بست من کا آں تو وت ءَ پریشان مہ کن . اِے رندی گُشت ئے تو دروگ بند ئے تو نیا ئے  .
منی گڈی دیدار ھمے رند ءَ بوتگ اَت  .
دیم پہ دیمی گندگ منی واست ءَ وابے اَت ۔
اَمی اوں من نہ دیست ءُ  ناکہ پہ من کسے ءَ
آئی  کبر ءِ اَکسے  دیم دات .
من وتی پت دو رند ءَ گیروگ ءَ دستگ اَت.
ستار جان ءِ شھیدی ءَ اولی رند اَت کہ منی گوں آئی ھبر ءُ ھال بُوتگ اَت ۔
دومی من ءَ وھدے نگاہ ءَ میسج کُت کہ ابی ءَ وپات کُت . من آتک ءُ پس یک کِرّ ءَ کشّ اِت ءُ گُشت ابی  وپات بوتگ ۔ گُڈا سگریٹے روک ئِے کُت شیپ ءَ جھلاد بُوت . من کمے سبر کُت پد ءَ دُمب ءِ شُت آں گوں. آپے ءِ  لمب ءَ نشتگ اَت  ارس ئِے آپ ءِ توک ءَ ترمپ ترمپ ءَ کپگ ءَ اِت اَنت . من شُت آں کِرّ ئِے ءُ دست کوپگ  ءِ سرا اِیر کُت . تسلی دات ءُ گُشت بابا مگریھ . گُشت ئے منی اُمبر اِے ھد ءَ آتکگ ءُ رستگ من ءَ گیروگ ءَ کس نہ دیستگ ۔۔۔ بلے من ءَ مرچی وتی پس ءُ کسانی چو فلمے  وڑا منی دیم ءَ گوزان اَنت . من سرپد بوت آں .
منی پس پہ من چونیں ھمت ءُ ھوسلہ یے  بگندئے آئی پس اوں ھمے رنگ ءَ بُوتگ .
اگان منی پس مرچی منی ھمراہ مہ بوتیں بِگندئے  منی اندر ءَ انچو سبر ءُ سگ نیست اَت.
منی پس منی اولی سنگت ءُ بُنکی استاد اِنت .
ناکو،ابی ،امی، سنگو وتی ھکاں  پِھل کن اِت من ءَ ھکے نیست  .
من ءُ پس انگت گلام ایں .