چالزڈارون ءُ مردمی زھن ءِ بن رود- ارتقاء
چارلزڈارون کہ یک مزنیں سائنسدان ءُ شھزانتے بوتگ، بنی آدم ءِ بُن رود ءِ بارو ءَ انچیں لیکھے دیم ءَ ایر کُتگ کہ آھانی مَنّگ انوگیں دور ءِ دینی مردم ءُ پہ پیشواھاں باز جنجال اِنت۔ ڈارون ءِ زندگی آئی ءِ لوٹوک ءُ بگیری کنوکانی یک تَھلیں زیدرے (مناظرے) بوتگ بلے آئی گوں بے تواری ءَ وتی ساچشتی ءُ پولکاری ءِ کار کُتگ اَنت ءُ بے زانتی ءِ تھاریاں زانت ءِ چراگ بالینتگ۔ڈارون سائنسی ھسابءَ سابت کُتگ کہ بنی آدم دابہ ءِ بن رود ءِ دروشُم اِنت ءُ ایشی جان ءُ سسّا ءَ گوں دابہ ءِ جان ءُ سسّا ءَ باز نزدیکی ھست۔بشکوپ
Bischoff
ءِ بارو ءَ گپ کنان ءَ ڈارون گْوشتگ کہ مات ءِ شکم ءَ مردمءِ زھگ ءِ سسا ھپتُمی ماہ ءَ کہ ھمنچو ردوم زور ایت ، شادو ءِ سسّا ھم ورنائی ءَ ھمے ھساب ءَ بیت۔پمشک دابہ ءُ مردمانی سَسّائی، شَرّیاں تپاوت ھست۔ ڈارون ءِ لیکہ ءِ انگیز ءَ دینی، ارواھی(روحی) ءُ سیکولر لیکھاں ھرچی کہ چَپ بوتگ اَنت آ بُرز ءَ اتکگ اَنت۔ڈارونءِ گْوشگ اَت کہ مردم ءِ سیادی چء پریشتگاں گیش دابھانی گون ءَ ھست ءُ بنی آدمی سَسّا ، دابھے سَسّا ءِ بن رود ءِ چھرگ اِنت۔ڈارون ءَ وتی کتاب
The Descent of Man
ءَ سابت کُتگ کہ بنی آدم ءُ دابھانی بازیں شَرّی دگہ دِگِر اَنت۔ڈارون سابت کُتگ کہ بنی آدمانی پیمءَ دابَہ ھم گَل ءِ شات بنت ءُ یکے دومی ءَ گوں گوازی ءُ شیتانی ءَ مِڑ اَنت۔وشی ءُ شریانی ھواری ءَ دابہ اندوھاں یکے دومی ءَ گْوشیت ءُ وھدےکہ بنی آدمانی پیم ءَ تُرس ءِ ھم آماچ بنت ءُ آھانی دل زور زور ءَ جنت ءُ آھانی مود ھم چیست بنت۔اگاں دابھانی نزدیکیں کسے بیران بہ بیت گڑا آ پریشان ھم بنت۔وھدے کہ شادوانی زھگ چورہ بنت تاں آ دگہ شادو آئی ءِ زھگاں رودین اَنت۔ڈارون اے سابت کُتگ کہ دابھاں سَسّا ھم بیت۔یک شادوے کہ آئیءِ دنتان نزور اِتاں آئی سنگ ءِ سرا اکروٹ پروشگ بندات کُتگ اَت۔دابہ مردمانی وڑ ءَ مھر ھم کن اَنت۔کُچِک گوں وتی واجھاں وپاداری کن اَنت۔دابھاں زیبائی ءِ مارشت ھم بیت۔مور ءُ مورانی ناچ ایشی ءِ جوانیں درور اِنت۔ڈارون ءِ گْوشگ اَت ھما چیز کہ آ بنی آدماں چہ دابہ آں گھتر کنت آ ایشانی زُبان اِنت۔زُبان ءِ انگیز ءَ بنی آدم ءَ شائری ءُ لبزانکءَ را دیمروئی داتگ ءُ سائنس ءُ ٹیکنالوجی، دین ءُ ارواھ(روحانی) زانتاں دیمروئی کتگ۔ڈارون ءِ گُمان اَت ھما مردم آں کہ سَسّائی ھساب ءَ بُن رود نہ کُتگ آھاں دین ءِ جھان ابید پگر کنگ ءُ سرپد بوئگ ءَ مَنّ اِتگ۔ھما کہ بن رود کُتگیں مردم اَنت آھاں نوکیں زانت دربُرتگ ءُ کْوھنیں دود چیلنج کُتگ اَنت۔آ مردماں کہ کْوھنیں دود گُٹ ءَ لوپ کتگ ءُ آھانی سرا کوریں ایمان دار اَنت چہ ایشاں دینی راھشون ردیں نپ چیست کن اَنت۔آ چہ وتی لوٹوکاں ھُدا ءُ دین ءِ نام ءِ سر ءَ دیمونی ءِ لوٹ کن اَنت ءُ دل سپاھیں مردم دیمونی دیگ لوٹ اَنت۔ھما مردم کہ بُن رود کُتگیں اَنت آ ایرادی پگر دار اَنت ءُ دینی دوداں سائنس، شھزانتی ءُ تب زانتی ءِ چکاسگ ءَ چار اَنت۔ آ دینی کتاباں ابید وتی زاتی ءُ یکجاھی زرد ءِ رندگیری ءَ کن اَنت۔پہ آ دگرانی ھمدردی ءِ روشتے دار اَنت۔دابہ وتی روشت ءِ کُرتگین ءَ کن اَنت بلے مردماں اے سوڑگ کنگ لوٹ اِیت کہ وتی روشت ءِ کُرتن ءَ بہ زور اَنت یا وتی زِرد ءِ رندگیری ءَ بہ کن ایں۔ھمے پیم ءَ بنی آدم سائنسی ءُ راستبندیں دروشُمے ءَ پگر کنگ ءُ دربرگ ءَ اِنت آ وتی زندگی ءِ بارو ءَ اگل مندیں سوڑگ کنگ ءِ کابل بوگ ءَ اِنت ءُ پہ وتی زھگاں نوکیں دروشُم ءُ پگر کنگ ءَ بلد کنگ ءَ انت۔ڈارون ءَ کہ ھمے سائنسی ءُ بے دینی لیکہ ءِ بُن ایر کُت گڑا ھمے بُن ھشت ءِ سر ءَ سگمنڑ پرائڑ، کارل مارکس ءُ ژال پال سارتر ءِ وڑیں شھزانتاں بے دینی لیکہ ءِ سر ءَ مزنیں زانشتے ماڑی مِک کت۔ ڈارون ءَ وتی پولکاری ءَ سابت کُت کہ بنی آدم ءِ سَسّا دابھانی سَسّائے بن رودیں چھرگ اِنت۔
