(شہید ساجد حسین ءِ نام ءَ)
کلم پْروشاں کلم پْروشتگ
زبان گُڈئِت زباں گُڈاں
کساب ءُ دہر ءِ سہگیراں
پہ زوراکی پُلئت ارواہ
گسر بیتاں چہ ہمراہاں
منی ارواہ برزخءَ نشتگ
منی ارواہ نبشتہ کنت
منی ارواہ گوں ہاوند ءَ
تئی زُلم ءِ کسہاں کاریت
منی کارست،
منی ساچشت نمیران انت
مناں اکبرؔ، مناں منصورؔ،
منا سکراؔت
منی راج ءِ یلیں پُسّگ
منی رہبند ءَ جُنزان اَنت
شہید کندؔیل، منی رند پد
شہید گُل ؔجان منی پُشپد
مناں آجوی ءِ سنگت
دگہ چینچو کلم پْروش ئے؟؟
دگہ چینچو زبان گُڈئے؟؟
دگہ چینچو پُل ئے ارواہ؟؟
تئی دیم سْیاہیں کردانی
من پردگ پاشک کتگ ہرجاہ
اُستمان ءُ مْیاں اُستمان ءَ
منی پگر ءُ سما ءُ
سسّا ءُ دیدانک
من نمیراناں دل ءَ راج ءِ
کیَا گُشتگ من بیگْواہاں
من چو عیؔسٰی ءَ پدا کایاں
دگہ بچّے منی دابیں
بہ رودینیت بلوچ ماتے
بہ چنڈینیت، بہ نازینیت،
گْوانزگ ءَ شاگیں
منی ماتی،
منی بابُل،
منی شاہ ؔناز
منی تاہیر کساں زاتیں
منی شاہاؔن پُل ءُ سوگاتیں
مہ ریچ اِت تْرونگلیں ارساں
منی پُرس ءِ پتّر ءَ پیچ اِت
بہ دار اِت چاپ ءُ نازینکاں
پدا مرچی من سالونکاں
مروچی راج ءِ سالونکاں
منی بانور بلوچ ءِ مکہیں ڈیھ اِنت
منی ماتی، منی بابُل،
منی تاہیرؔ، منی شاہاؔن
پُلئت چہ تو منا اے دہر ءِ زوراکاں
ہمک اہد ءَ، ہمک دہر ءَ،
من زندگ باں،
تئی نام ءُ نشاناں من
وتی راج ءِ زباناں من
وتی ہوناں شلاناں من
کلم جنزیت،
زمین جُنزیت،
زباں جُنزیت
چہ ربّ ءِ کارگس ءَ
لوح ءُ کلم جُنزیت
کلم آشوب ءِ پجّار اِنت
کلم مہرانی امبار اِنت
کلم زُلمانی دیندار اِنت
منا واستار، کلم دوستار
مناں سالونک، کلم بانور
مناں سالونک، کلم بانور
