ویلیم شیکسپیر ءِ کسمانکے لچہی تہرءِ تہا
رجانک : میجر مجید
پیریں بلّکے اَرزالیں
ڈیھ ءِ مادریں شیرزالیں
وار ءُ بزّگ ءُ بدھالیں
نیست اِنت ئِے گُد ءُ پوشاکے
نیست ئِے دَز رسے، بے واکے
دمکاں میتگ ءِ گردان اِنت
ہلک ءِ گِس گس ءَ گولان اِنت
زرّ ءُ نْیامتے پِنڈان اِنت
گُژن ءَ بزگ ءُ شُدلاپ اِنت
نشتگ گیدی ءِ چار راہ ءَ
بُرزیں ماڑی ءِ پیژگاہ ءَ
پُرسیت رہگْوزاں یک یک ءَ
دست ئِے مَہرمیں دْراج کُرتگ
لوٹیت اِنت کُمک چہ راج ءَ
ہچ کسّ ءَ نہ کُت دلگوش گْور
گْوست اَنت مہتریں رہدربر
دیم ءِ ماڑی ءَ ڈولداریں
راج ءِ مہتراں دیوان انت
دیوان اِنت کلمکارانی
کوّاس ءُ مزن زانتانی
بٹ ءُ گوشت ءُ نان تالان اِنت
تْرنداپ کِرمِزیں کیفان اِنت
(ہمے) بلّک مجلس ءِ سرھال اِنت
پیریں بلک ءِ بُت ایر اِنت
گپ ءُ مجلس ءُ تقریر اِنت
بُنگپ بلّک اِنت دیوان ءِ
ڈیھ ءِ مادریں شیرزال اِنت
مرچی بزگ ءُ بدھال اِنت
زند ءَ بے وس ءُ جنجال اِنت
اپسوز کننت ءُ گْریونت
(کہ) بلُّک پرچہ چو بدھالیں
(مئے) راج ءِ مکہیں شیرزالیں
(بَلے) ڈنّ ءَ بلک ءِ جند نشتگ
ہرکس چہ ہمودا گوستگ
دْرستاں بلّک ءِ جند دیستگ
ہچ کسّ ءَ نہ کُت دلگوشی
گْوستگ ہرکس پہ ھاموشی
چونیں وتگڑیں رہشون اَنت
دہر ءِ شاعر ءُ کوّاس اَنت
گالاں پہ ہُنر چکّاس اَنت
*
