بلوچستان کے دارلحکومت کوئٹہ میں بلوچ یکجہتی کمیٹی کے زیر اہتمام گوادر میں باڑد لگانے کے ریاستی اقدامات کے عنوان پر منعقدہ کانفرنس کو روکنے کیلئے پاکستانی فوج کی جانب سے پریس کلب کومقفل کردیا گیا۔
شرکا کا کہنا تھا کہ انہیں ہراساں کیا گیا تاہم انہوںنے رکاوٹیں عبور کرتے ہوئے کانفرنس میں شرکت کی۔
اس حوالے سے ایک ویڈیو بھی سوشل میڈیا پر وائرل ہے جس میں بی وائی سی کے رہنما ڈاکٹر ماہ رنگ بلوچ ، اسسٹنٹ کمشنر کوئٹہ سے محوگفتگو ہیں کہ پریس کلب کو تالہ کیوں لگایا گیا ہے ۔
ڈاکٹر ماہ رنگ بلوچ مذکورہ ریاستی عہدیدارسے کہہ رہا کہ کہاں گئی ہے تمہاری ایجوکیشن و رتبہ ، تم تو ایجنسیوں سے آرڈر لیتے ہو۔
بلوچ یکجہتی کمیٹی کے رہنما ڈاکٹر ماہ رنگ بلوچ نے سوشل میڈیا ایکس پر اپنے ایک پوسٹ کہا ہے کہ صحافیوں، طلباء اور پینلسٹ سمیت شرکاء کو جمعہ کے روز ’گوادر پر باڑ لگانے‘ پر بلوچ یکجہتی کمیٹی کی کانفرنس میں شرکت سے روک دیا گیا ہے۔
انھوں نے لکھا ہے کہ حکام نے تقریب شروع ہونے سے قبل پریس کلب کے گیٹ کو تالا لگا دیا اور اس کا تقدس پامال کیا۔ ہم نے پریس کلب انتظامیہ کے ساتھ مسئلہ اٹھایا لیکن بتایا گیا کہ پریس کلب کے عہدیداروں کا سول انتظامیہ اور حکام پر کوئی کنٹرول نہیں ہے۔ شال کے اسسٹنٹ کمشنر طاقتور ایجنسیوں کی جانب سے مشکلات پیدا کر رہے ہیں۔
ان کا کہنا تھا کہ پریس کلب میں بلوچ یکجہتی کمیٹی کے زیراہتمام "گوادر: میگا پروجیکٹس سے میگا جیل تک” کے کانفرنس میں شرکاء کو روکنے کیلئے عسکری حکام نے پریس کلب کے دروازے پر تالے لگا دیئے۔
