بلوچستان میں حکومت سازی کیلئے مسلم لیگ ن اور پی پی میں ڈھائی ڈھائی سال والا فارمولہ کا معاہدہ طے پاگیا ہے جبکہ بلوچستان عوامی پارٹی (باپ )بھی اس مخلوط حکومت میں شامل ہوگی۔
کہا جارہا ہے کہ پاکستان پیپلز پارٹی اور مسلم لیگ ن کے درمیان وفاق میں حکومت سازی کے معاملات پر اتفاق پیدا ہوجانے کے بعد اب بلوچستان میں بننے والی حکومت کے خدوخال بھی واضح ہونا شروع ہوگئے ہیں۔
ذرائع کے مطابق بلوچستان میں 3 جماعتی مخلوط حکومت کا قیام عمل میں لایا جائیگا، پیپلز پارٹی، مسلم لیگ ن اور بلوچستان عوامی پارٹی حکومت کا حصہ ہوں گے۔
ذرائع کے مطابق جمیعت علمائے اسلام، نیشنل پارٹی، بی این پی اور بی این پی عوامی کے اپوزیشن میں بیٹھنے کا امکان ہے۔
ذرائع کا بتانا ہے کہ ایک سے دو روز میں حکومت سازی کے معاملات کو حتمی شکل دے کر وزیراعلیٰ کے نام کا اعلان کردیا جائے گا۔
بلوچستان کی وزارت اعلیٰ پیپلز پارٹی کے پاس ہوگی جبکہ سینیئر وزیر مسلم لیگ ن سے ہوں گے۔
ذرائع کے مطابق گورنر بلوچستان کی تعیناتی پاکستان مسلم لیگ ن سے کی جائے گی جبکہ اسپیکر اسمبلی ن لیگ جبکہ ڈپٹی اسپیکر بی اے پی سے ہوگا۔
ذرائع کا کہنا تھا کہ بلوچستان کابینہ میں پیپلز پارٹی اور مسلم لیگ ن کے 6-6 وزیر ہوں گے جبکہ کابینہ میں بلوچستان عوامی پارٹی کے بھی دو وزرا شامل ہوں گے۔ مشیروں کی تعیناتی پیپلزپارٹی اور مسلم لیگ ن سے کی جائے گی۔
دوسری جانب اطلاعات ہیں کہ پاکستان مسلم لیگ(ن) اور پاکستان پیپلزپارٹی میں ڈھائی ڈھائی سال کامعاہدہ طے پانے کے بعد مسلم لیگ(ن) کے ارکان اسمبلی نے معاملے پر اعتماد میں نہ لینے پر سخت ناراضگی کااظہار کردیاہے۔
باوثوق ذرائع کے مطابق گزشتہ روز ایوان بالا میں پاکستان مسلم لیگ(ن) کے قائدین اسحاق ڈار اور سردارایاز صادق کی زیر صدارت اجلاس ہوا ۔
اجلاس میں پاکستان مسلم لیگ(ن) بلوچستان کے صدر شیخ جعفرمندوخیل نومنتخب رکن اسمبلی حاجی ولی محمدنورزئی ،جام کمال خان ،کیپٹن(ر)عبدالخالق اچکزئی ،میرعاصم کردگیلو،زرک خان مندوخیل ،سلیم کھوسہ ،سردارعبدالرحمن کھیتران ،حاجی محمدخان طوراتمانخیل ،محمد خان لہڑی ،رکن قومی اسمبلی میاں خان بگٹی نے شرکت کی ۔
ذرائع کے مطابق اسحاق ڈار کاکہناتھاکہ بلوچستان میں ڈھائی ڈھائی سال کی حکومت کامعاہدہ طے پا گیا جس پر نومنتخب اراکین بلوچستان اسمبلی نے سخت ناراضگی کااظہار کرتے ہوئے کہاکہ نومنتخب اراکین سے ان کے بغیر اس طرح کے فیصلے نہیں کرنے چاہیے۔
ارکان نے کہاکہ ہمارا بلوچستان میں نمبرگیم پورا ہے جس پراسحاق ڈار نے کہاکہ مرکزی قائدین کے فیصلے کے درمیان معاہدے ہوئے ہیں ۔معاہدے کے مطابق صدر آصف علی زرداری اوروزیراعظم شہبازشریف ہونگے ۔بلوچستان میں حکومت ڈھائی ڈھائی سال ہوگی۔
اسحاق ڈار نے کہاکہ بلوچستان میں حکومت سازی کے حوالے سے وزارتوں کی تقسیم پر دو دن بعد اجلاس ہوگا۔ اس حوالے سے پارٹی ارکان اپنااجلاس منعقد کرے اور معاملات طے کرے اور مزید معاملات آئندہ اجلاس طے کئے جائیںگے۔
