بابا منان جان وتی اھد ءِ ھما نام اِنت کہ آئرا ھر بلوچ زانت ءُ آشنا اِنت، آشنا پرے ھاتر ءَ کہ گوں وتی آشوبی ئیں کرد ءُ اَمل ءَ اے پیشداشت کہ راج گوں دیمونی ءِ سسّا ءَ زندگ مان اَنت۔ آ ھمے دیمونی ءِ دگ ءَ رھادگ اَت داں زندمان ءِ گڈی دم ءُ ساھت ءَ سر ءُ ارواہ ندر ءُ کولیگ کرت اَنت۔
اے ھبر راست اِنت کہ جھان ءَ بنی آدم گوں وتی جوانیں کرد ءَ زندگ مان ایت، پمیشکا مرچی بابا منان ءَ نام ءُ توار بلوچ ءِ کڈک ءُ مئے دلانی ھست ءُ ابدمان اِنت۔
ھمے رنگ ءَ نام ء بابا زان ئے منان جان ءَ چون گوشگ بوتگ۔۔۔۔۔؟ ایشی ءِ پژدر ءِ کسہ چو اے رنگ ءَ اِنت۔ منان جان وتی مھلوک بزاں کھول ءِ تہ ءَ پت ءِ بستار ءِ واھند بوتگ، چی ءَ کہ آ وتی گس ءِ مستریں زھگ بوتگ۔ وھدے آئی ءِ مکھیں مات مر ایت گڑا کسانے مدتے ءَ پد آئی پت ھم کشگ بیت، گڑا آ وتی ناکو واجہ ابدلکریم بیزنجو ءِ گس ءَ بیت۔
منان جان اد ءَ چہ کلیں زھگاں مستر بیت، پمیشکا گس ءِ توک ءَ آ بابا ءِ نام ءَ توار جنگ ءُ زانگ بیت۔ وھدے آئرا گس ءِ کلیں مردم کہ بابا گوش اَنت، گڑا میتگ ءِ مردم ءُ سیاد ھم آئرا بابا ءِ نام ءَ زان اَنت ءُ جاہ کار اَنت۔
ھمے رنگ ءَ بابا منان جان کہ وتی سیاسی تر ءُ تاباں برے ھلک ءُ میتگے ءَ شت، گڑا اے وھد ءَ آئی ھمراہ گیشتر شھید ساجد جان، شھید ماجد جان، شھید سرپراز ءُ شھید ابدلرھیم بوتگ اَنت۔ اے ورناھاں آئرا کدی منان نہ گوشتگ، بلکیں بابا ءِ نام ءَ توار کرتگ۔ چی ءَ کہ اے آئی زھگ ءِ ھساب ءَ ات اَنت، ءُ دومی آئی ھمراہ ءُ چمانی دیم ءَ ردوم زرتگ اَت۔
پمیشکا من گوش آں کہ اے نام اچ ھمے شھیدانی سبب ءَ ھر دمگ ءُ ھنکین ءِ مردماں منان جان بابا ءِ نام ءَ توار کرت، ءُ آئی ءِ ھاسیں ھبر اے بوتگ کہ آئی ھرکس ءَ را وتی بچ ءُ جنک ءِ نام ءَ توار کرت۔ چو پتے ءِ رنگ ءَ مھر دات ءُ دیوان کرت۔
وھدے ۲۰۱۳ ءِ زمین چنڈ ءَ پد مشکے ءَ ماہ وش ھان (مہوش خان) نامیں اھوالکارے اتک داں ھمے ھند ءُ دمگانی بارو ءَ اکس بندی بہ کنت ءُ رپورٹے شنگ بہ کنت۔ وھدے آ گوں بابا منان جان ءَ دچار کپت، گڑا بابا ءَ آئرا جوانی ءَ ھند ءُ دمک، سیاسی تک ءَ سرپد کرت۔ آئی دوران ءَ بابا ءِ گلگدارے ھم کرت۔ چرے گلگدار ءَ پد ماہ وش ءِ گوں بلوچ جز ءَ نزیکی پیداک بوت، گڑا بابا منان جان ءِ نمیرانی ءَ پد آئی ءَ کسے جست کنت کہ تو ڈاکٹر منان ءَ را چوں دیستگ ءُ آئی ءِ بارو ءَ چے گوشت کن ئے۔۔۔۔۔۔؟
آئی پسہ ھمے بیت ڈاکٹر منان بلوچ اول مردماں وتی زھگ، برات ءُ گوھار جوڑ کنت، نوں گوں آئی ءَ وتی ھبراں کنت۔ آئی پرنسلیٹی جتا بوتگ، پمیشکا راج ءَ آئرا دوست داشتگ۔
ھبر ءِ مول ءُ مراد ھیمش اِنت کہ آئی گوں وتی جھد ءُ جپاھاں تانسریں بلوچستان ءَ راجی جز ءِ تہ ءَ بازیں مٹ ءُ بدلی آؤرتگ۔ اے آئی مزن بالادی ءِ سبب اِنت کہ آئی ءَ را ھر یکے ءَ بابا ءِ نام ءَ توار کرت ءُ جاہ آؤرت۔
ھمے رنگ ءَ راجی جز ءِ تہ ءَ نامداریں سر نواب ھیر بکش مری اِنت کہ آئی ءَ را مردم بابا ءِ نام ءِ سر ءَ توار کرتگ، چے ءَ کہ آئی ءَ راfather of Baloch ideology گْوش اَنت، ھمے سبب اِنت کہ آئی ءَ را بابا گوش انت۔
بلے منان جان وتی گس ءِ تہ ءَ بابا ءِ نام ءَ زانت بوتگ، ءِ ھمے نام کلیں راج ءِ تہ ءَ پرشت ءُ نامدار بوت۔ مرچی آئی کمی ءَ ھرکس مار ایت، بلے راستی ھیمش انت کہ آ واتر بوت نہ کنت۔
ھمے رنگ ءَ اے راجی جھد ءِ سپر ءَ بابا ءِ دوستریں ھمراہ ڈاکٹر واجہ اللہ نزر بوتگ کہ آ اچ کسانی ءَ یکے دومی ءِ سنگت ءُ ھمراہ بوتگ اَنت۔ ھمے بالاد مرچی بلوچ جز ءِ نامدار ءُ مزنیں نام اِنت پاکیں ھاوند آئی ءَ ھست سلامت بہ کنت ءُ داں آجوئی ءَ وتی راج ءِ راھشونی ءَ بہ کنت۔ ءُ ھمے رنگ ءَ پہ مھر ءُ دوستی ھر وھد ءَ بابا ءَ را واجہ ءَ جان گوشتگ، چی ءَ کہ بابا ءِ کھول ءِ کلیں مردماں وتی مردمانی دیم ءَ جان گوشتگ، پمیشکا ھرکس ءَ بابا ءَ را جان گوشتگ ءُ توار جتگ، پہ درور بابا جان، منان جان۔۔۔۔۔۔
بابا ترا یک ھبرے ھال دیگ لوٹاں کہ بلوچ راج ءِ تہ ءَ باز بدلی آتگ، ھما راج ءِ یکمشت کنگ ءَ تو شپ ءُ روچ سپر کرت، ھما راج مرچی ڈاکٹر دین جان ءِ لاڑیں جنک سمی ءُ نمیرانیں گپار جان ءِ جنک ماہ رنگ ءِ توار ءَ گوں یکمشتی ءَ چست بوتگ اَنت۔ جوانیں رنگے ءَ وتی راجی زمہ واری ءَ پیلو کنگ ءَ اَنت۔
ترا مالوم بیت الم، پرچا کہ تو ھمروچ روتاک ءُ ھالتاک (اخبار ) وان ئِے، دومی ٹی وی ھم چارئے، بلے مہ زان آں کہ اود ءَ تئی گور ءَ ٹی وی ھست کہ نہ، بلے تو وڑ ءُ ڈولے کن ئِے ءُ اے چیزاں الم ودی کن ئِے، چی ءَ کہ ترا مالومات ءِ یکجاہ کنگ ءِ باز ھب ءُ واھگ اَت۔
اے راستی یے کہ یک سیاسی باسک ءُ جھدکارے چہ ھمروچیگیں اھوالاں سھیگ ءُ سرپد بہ بیت گڑا چیزے کرت کنت، منی دل گوش ایت ترا بہ گوش کہ اے کار اد ءَ بوگ ءَ اِنت۔ تو کہ ھر وھد ءَ وتی رودپتر (ڈائری) نبشتہ کتگ من ءَ مالوم اِنت، بلے من وتی ھیالاں ھمے جیڑگ ءَ آں کہ مرچاں تو تھنا وان ئِے ءُ گوشدار ئِے دگہ ھچ نہ گوش ئِے، ناں کہ نبشتہ کن ئِے۔
ھمے ھاتر ءَ ترا ھال دیگ ءَ آں کہ تو سھی بہ ہہ ئِے کہ بلوچ پہ وتی وشھالی ءِ واستا انگت جھد کنگ ءَ اِنت۔نوں سک باز ورناہ پہ اے جھد ءَ ہہ منزل ءِ سر کنگ ءَ واستا تیار اِنت۔ باز مردم نبشتہ کنگ ءَ اِنت، ھر وھد ءَ کہ سمی جان گشتانک دنت کلیں جھان آئی ھبر ءَ گوش دار ایت۔ سمی نوں مزن ءُ باز زانتکار بوتگ، وتی پت ءِ چھرگ ءَ جنت۔ مھلو جان وانگ ءَ اِنت ،نہ زاناں تو سرپدے یا کہ نہ، بلے ترا ھال دے آں کہ مھلو جان پلسپہ وانگ اِنت۔
ترا من اے ھم ھال دے آں کہ من جی جی نہ گوش آں، بلکیں من مھلی جان گْوش آں، بلے کل نزیکیں مردم جی جی گوش اَنت ءُ من ءَ دوست نہ بیت کہ جی جی بہ گوش انت، بلے مھلی جان نام ھدا وتی وانگ ءِ سر ءَ باز جھد کنگ ءَ اِنت۔
بابا ترا مالوم اِنت رامین مرچاں مزن بوتگ ءُ شائری کنت، بلے آئی وانگ سرجم نہ بوت۔ پرچا کہ ما گوش آں اللہ ھیر کنت ءُ اللہ مالکے، ما انگت اللہ مالکے ءِ سر داشتگ ءُ دیم ءَ روگ ءَ اِیں داں کد۔۔۔
دل گْوش ایت گوں تو بازیں کسھاں بیار آں، بلے نس اِنت داں ھمینچک ءَ، اگاں وھد ءَ موہ دات الم نبشتہ کن آں۔
بلے ترا گڈی ءَ ھال دے آں کہ پپی جان ھم مزن بوت ،ملا جان ھم وانگ ءَ اِنت، ءُ زندگی ءِ تہ ءَ دگہ بدلی ھم آتکگ۔
ترا اے ھم ھال دے آں کہ منی آروس ءَ پد مارا شرنگیں جنکے ھم بوتگ، زان ئِے نام کے ایر کرتگ۔۔۔؟ مزنیں بابا گوش ایت تئی پیرک ءِ نام پیری بوتگ وتی جنک ءِ نام ءَ ھوری بہ کن، پمیشکا من شرنگ ءِ نام ھوری کرتگ۔
بس تئی کمی ھست! ءُ اے کمی ءَ ابید تئی جند ءَ دگہ کس پورا کرت نہ کنت۔ باریں تئی گوں کے گند ءُ نند بیت، اے راستے کہ تو مئے چارگ ءَ نیائے، بلے روچے مہ روچے ما الم تئی چارگ ءَ کا اِیں ءُ سرجمیں ھبراں ھمود ءَ کناں، بلے چیزے ھبر من نبشتہ کرتگ تئی ھاتر تو الم ایشاں وان ئے ءُ گندئے۔
دومی من اے ھبر ءَ پہ جزم زان آں کہ تئی ءُ سنگتانی الم مجلس ءُ دیوان اِنت، بلے تو گپار لانگو ءَ ھال بہ دے کہ ماہ رنگ مزن بوتگ، نوں وتی راج ءِ راھشونی ءَ کنگ ءَ اِنت۔ ترا مراد بات، پرچا کہ تو پہ ھمے روچانی واستا وتارا ندر کرتگ۔ گڈی ءَ یک رندے پد ءَ گوش آں کہ بابا تئی کمی ھست ءُ پہ مدامی بیت۔
***
