بلوچستان کے ضلع کیچ کے علاقہ بلیدہ میں گذشتہ روزایک حملے میں پاکستانی فوج کے ایک افسر سمیت 6 فوجی اہلکار ہلاک جبکہ ایک فوجی اہلکار زخمی ہوا ہے۔
پاکستانی فوج کے شعبہ تعلقات عامہ (آئی ایس پی آر) کی جانب سے جاری کیے گئے بیان کے مطابق پاکستان ایران سرحدی علاقے کے قریب بلوچستان کے ضلع کیچ میں شدت پسندوں کی ممکنہ نقل حمل کی نگرانی کے لیے معمول کے گشت سے واپسی پر سکیورٹی فورسز کی گاڑی پر ریموٹ کنٹرول دیسی ساختہ بم (آئی ای ڈی) سے حملہ کیا گیا۔
آئی ایس پی آر کے مطابق حملے میں پاکستانی فوج کے ایک افسر اور 5 جوان ہلاک ہوئے ہیں جبکہ ایک اہلکار زخمی ہے۔
آئی ایس پی آر کے مطابق ہلاک ہونے والوں میں پنجاب کے شہر حافظ آباد سے تعلق رکھنے والے میجر ندیم عباس بھٹی، میانوالی سے تعلق رکھنے والے نائیک جمشید، تونسہ شریف کے لانس نائیک تیمور، اٹک کے لانس نائیک خضر حیات، مردان کے سپاہی ساجد اور تونسہ شریف سے تعلق رکھنے والے سپاہی ندیم شامل ہیں۔
واضع رہے کہ اس حملے کہ ذمہ داری بلوچ عسکریت پسند تنظیم بلوچ لبریشن آرمی (بی ایل اے) نے قبول کی ہے۔
