(میجر مھمد کریم پنّام ء مُلّا بھرام)
ششُمی بھر
چہ سنگتانی پُرمھریں نیادانی سھاتگیں ساھگ ءُ سئے روچ ءِ جلّگ ءَ پد ما دیم دات پہ گْورکوپ ءِ نیمگ ءَ، سُھب ءِ سر ءَ مھلہ ما راہ گِپت اِیں ءُ سپر بِندات بوت، وھدے ما شادی کَور ءَ سر بوت اِیں، چاراں کَور آپ اِنت ءُ ما بود کُت کہ اے دْراجیں سپر ءَ جان نہ شُشتگ ءُ۔۔۔۔۔۔۔۔۔۔۔۔
ما پہ دم ءِ بالا کنگ ءَ کھیر ءِ ساھِگ ءَ نِشت اِیں، سنگتے پہ چاہ ءِ اڈّ کنگ ءَ گُلائیش بوت۔ ما گوں یکّے دومی ءَ گپ ءُ رپ ءَ اِت اِیں کہ میجر باسِت پہ کندگ ءُ مزاک درّائینت ءُ گْوشت کہ وتاک ءَ ورگ ءُ چرگ ءِ آپ نوکاپے بوتگ، بلے شادی کَور ءِ آپ ءَ جانے بِہ شُود اِت۔۔۔۔۔۔ءُ گرماگ ءَ کَور ءِ زُمزمیں آپ ءَ جان ءِ شُودگ ءِ وتی چاڑے۔۔۔۔۔۔۔۔۔ھاھاھاھاھاھا۔
ھمد ءَ مُلّا ءَ سُبکّ سُبکّ ءَ دست منی کُوپگ ءَ اِیر کُت ءُ گْوشت، بابُل جان کھیر ءِ ساھگ ءَ یلہ کن ءُ بیا جانے شُود کہ ما داں دیر ءَ اِد ءَ نہ جلّ اِیں، من مُلّا ءِ پسّو دات ءُ گْوشت سْیاہ چاھے وراں گُڑا نوں جانے شُودیں، مُلّا ءَ پہ کندگ کندگ ءَ گْوشت جان ءِ شُودگ ءَ پد سْیاہ چاہ ءِ وتی تام ءُ لِزّتے۔۔۔۔۔۔۔من ھم پہ کندگ گْوشت، مُلّا من دِلجماں کہ جان ءِ شُودگ ءَ پد سْیاہ چاہ ءِ تام ءُ لِزّت ستر وش بِہ بیت، بلے تْرنداپ ءِ مٹّ ءُ بدل نہ بیت۔۔۔۔ھاھاھاھاھاھاھا۔۔۔۔۔
من چہ مُلّا ءِ ھبر ءَ ناھبر نہ بوت آں، پمشکا چہ سیاہ چاہ ءِ ورگ ءَ پیش ما شُت اِیں ءُ جان شُشت، چہ جان شُودگ ءَ پد ما واتر اتک اِیں ءُ کھر ءِ سارتیں ساھگ ءَ نِشت اِیں ءُ سْیاہ چاہ ءِ ورگ ءَ گُلائیش بوت اِیں۔۔۔۔۔۔
چہ چاہ ءِ ورگ ءَ پد واجہ گُلام نبی ءَ درّائینت ھاں باسِت جان! جُنزگ ءِ چے اِرادہ۔۔۔۔؟، باسِت ءَ گْوشت بلے کن اِت جُنزیں کہ من دیم ءَ سنگت ھال کُرتگ آں ءُ مئے دیم ءَ کاینت۔۔۔۔۔۔۔۔۔۔
وھدے پہ جُنزگ ءَ مئے مَھری رھت بوت، ما دیم دات پہ گْورکوپ ءَ، پند بُرّان ءُ جاھے مزنیں دگ یلہ دات ءُ گْور کِشکے گپت ءُ کَورے ءَ دور کُت، کمیں دیم ءِ رَوَگ ءَ پد ما گوں سنگتاں ڈیک دات ءُ دْروتی بوت اِیں، کسانیں ساھتے ءَ پد ما میجر باسِت چہ ھمد ءَ رُکست کُت، گُڑا پہ باسِت ءَ پہ پُر کندگیں دپے گْوشت رُکست اَپ ھواریں سنگتاں۔۔۔۔۔۔۔۔۔
ما پد ءَ سپر بِندات کُت، وھدے ما گْورکوپ ءَ رست اِیں، اُود ءِ سنگتاں مارا وش آتک کُت، دِیوان ءُ مجلِس، دومی یا سیمی روچ ءَ سُھب ءِ سر ءَ مُلّا ءُ واجہ گُلام نبی گوں لس مھلوک ءِ ھواری ءَ وانگجاہ ءِ نودربر ءُ ماسٹر، مُلّاھاں گوں دیوانے کُت۔۔۔۔۔۔۔
چرئے دیوان ءَ پد ما اتکیں سنگتانی گْور ءَ کہ دیم پہ کولواہ ءِ پاند ءَ جُنزگ ءِ درگت ءَ سوڑگ کن اِیں، گُڑا مُلّا ءَ ھمد ءَ گوں من ءَ درّائینت ءُ گْوشت کہ اے نیکراھی مُلّا ھر کار ءَ وتی دست ءَ مانجنگ لوٹ اَنت، بلے پہ آجوئی ءِ جُنز ءِ دیم ءَ برّگ ءَ پاد اِش ھمراہ نہ بَہ اَنت، گْوش ئے زان ءَ بلوچ نہ اَنت ءُ اے گُلزمین آیانی مات نہ اِنت۔
نکبھتاں! شُما چو مولانا ابدُلھاک ءِ داب ءَ وتی پرز ءِ پیلو کنگ ءَ آشنا بِہ بَہ اِت کہ آ سائجی ءِ بند ءُ ھساراں سنگر بوتگ، شُما اگاں سائجی ءُ مزنبند ءَ سنگر بوت نہ کن اِت، بلے نیکراھی ءِ نام ءَ راجی جُنز ءِ دیم ءَ ڈنگر مہ بَہ اِت۔۔۔۔۔۔، پمشکا مارا گوں چوشیں نیکراھی ءَ کار نیست کہ آ مئے راجی جُنز ءِ دیم ءَ ڈنگر ءُ میلانک بِہ بیت۔۔۔۔۔۔۔۔۔
چہ مُلّا ءِ اے دانکانی گوشدارگ ءَ پد من ءَ لینن ءِ دانک یات اتک اَنت کہ آ گْوش اِیت: "ما گوں نیکراھی مردُماں مرگ ءَ رند، بھشت ءِ درگت ءَ باوست کنگ نہ لوٹ اِیں۔ مئے مکسد اِیش اِنت ھمے دُگنیا ءَ بھشت جوڑ بِہ کن اِیں”۔
ءُ اے درکپتگ اَنت ریاست پاکستان ءِ رِپک ءُ پندلاں، اگاں اِیشاں مولانا کبیر ءُ ابدُلھالک ءِ دابیں بالاد دیم ءَ بیارتیناں۔۔۔۔۔مرچی زُورگِر ءِ گْوانزگ ءَ چیکُّو اِش نہ وارت۔۔۔۔۔بلکیں وتی بندیگیں مات اِش جاہ آؤرت ءُ پہ آجوئی ءِ واستا اے جُھد ءُ جنگ ءِ بھر بوت اَنت، بلے بژن بَہ کَول ء مُلّا بھرام نکبھت تنیگا چہ نیکراھی ءِ شُونزاں در نہ کپتگ اَنت، چو کہ اِیشاں۔۔۔۔۔۔۔نیکراھی اے داب ءَ نہ اِنت۔۔۔۔۔۔۔۔۔۔۔پہ دَروَر واجہ کبیر ءُ ابدُلھالک مئے دیم ءَ دْرپشوکیں اِستال اَنت کہ بلوچ جُھد ءِ آزمان ءَ دْرپشگ ءَ اَنت ءُ پہ مُجّتی دْرپش اَنت۔۔۔۔۔۔۔۔۔۔
بلے! مُلّا ءِ اے گْوھریں دانکانی تہ ءَ من ءَ آئی زِند ءِ زیبائیں کارِست گِندگ ءَ پیداک اَت، چی ءَ کہ مُلّا لیکوی بِستار ءَ مُھکم ءُ تمردیں بالادے اَت، پمشکا آ پہ وتن کولیگ بوت بلے اَچ گچین کُتگیں راہ ءَ پدکِنِز نہ بوت۔ ھمے لیکوی کارِست ءُ زیبائی ءِ جزبگ ءَ مُلّا ءَ را مُشکلانی دیمپانی کنگ ءِ توکل، راست گْوشگ ءِ بودِشت، دیمونی دَیَگ ءِ سسّا شکساتگ اَت۔۔۔۔۔۔۔، مرچی مُلُا ءِ پِگر ءُ سسّا پہ بلوچ راج ءِ آیوکیں پدریچ ءَ درونتے کہ آ وتی شوھازگ ءِ لد ءَ سربتگی ءِ بدل ءَ گْواچن ءُ تچکیں دگ ءَ سپر بِہ کنت ءُ دانکہ وتی ھونکّیں مِنزل ءَ سر بِہ بیت۔
بَہ کَول ء پریڈ ھامپٹون ” تو یک آشوبی جُھدکارے ءَ را کُشت کن ئے، بلے آشوب ءِ جند ءَ ھجبر کُشت نہ کن ئے”۔
مرچی مُلّا گوں وتی ملشانیں جنگولاں جسمانی دْروشم ءَ راستے کہ مئے مجلِس ءُ مْیان ءَ ساڑی نہ اِنت، بلے آئی پِگر ءِ مَھری انگت پہ مِنزل ءِ پاند ءَ جُنزگ ءَ اِنت دانکہ وتی مُرادنی آپسر ءَ سر بِہ بیت، گُڑا اے ھبر ءَ دِل ھِچ رنگ ءَ نہ منّ اِیت کہ مُلّا مئے مْیانجین ءَ ساڑی نہ اِنت، ءُ مُلّا ءَ اے ھبر مُدام جت کہ ما پہ اے لبّ ءُ لالچ ءَ جُھد ءُ جنگ ءَ نئیں کہ مئے گُلزمین چہ گْواجن، مال ءُ مڈّی ءَ سرّیچ اِنت، بلکیں ما وتی مات ءِ بندیگی ءِ بگیر ءَ جُھد ءُ جنگ کنگ ءَ اِیں دانکہ آ آجو بِہ بیت ءُ مئے ایردستیں راج پہ آجو ءُ اِیمنی وتی زِندمان ءَ گْوازینت بِہ کنت ءُ بے وتن مہ بیت، ءُ اے دُگنیا ءَ راجانی راجدپتر گْواہ اِنت کہ بے وتنیں راج ھِچّ رنگ ءَ زندگ نہ مان اِیت۔۔۔۔۔۔۔، پمشکا مارا وتی ماتیں سرڈگار ءِ آجوئی چہ سر ءُ ارواہ ءَ گیش پکار اِنت، ما اگاں بَہ اِیں یا نہ بَہ اِیں، بلے اے سرڈگار پہ مُدیمی ھست بِہ مان اِیت۔۔۔۔۔۔۔۔۔
اے درگت ءَ واجہ اکبر بارکزئی وتی شائِریں ھیالاں چوش درشان کنت
تباہ ءُ سُتکگ ءُ ویراں بہ بیت وتن وتن اِنت
اگاں کہ برّ و بیاباں بہ بیت وتن وتن اِنت
نہ لوٹاں روچ ءِ دیار ءَ کہ رُژن ءِ دریا اِنت
اگاں تھار چو زِنداں بہ بیت وتن وتن اِنت
ھمے درگت ءَ بی این ایم ءِ پیشیگیں کارگشاد شھید ءُ ابدمانیں رھشُون واجہ ڈاکٹر منّان بلوچ جاھے گْوش اِیت: ” مارا بلوچستان پہ آئی گْواجن ءُ شاھگانی ءِ ھاتِر ءَ دوست نہ اِنت، بلکیں بلوچستان مارا اے ھاتِر ءَ دوست اِنت کہ مئے ماتیں وتن اِنت، اگاں اِیشی ءِ توک ءَ گْواجن بیت یا نہ بیت، بلے آئی ارزِشت ءِ تہ ءَ کسانیں کمی یے نئیت” ۔
ءُ مُلّا ءَ گوں وتی مزن شانیں کِردار ءَ، گوں بامردیں ھمگنگلاں ھمے لیکہ ءِ باپُشت ءَ سر ءُ ارواہ ءِ دیمونی دات ءُ پہ ما اے راہ سمبھینت کہ راجانی تھاردیمگیں آکبت گوں دیمونیاں رُوژناہ بیت ءُ سمبھ اِیت، اگاں ما دیمونی ءِ دَیَگ ءَ چک ءُ پد مہ بَہ اِیں، گُڑا اے زُورگِر ءِ چِرّک گیش بُن گیت ءُ پہ دائمی مئے گِلزمین ءِ سر ءَ ھِچّ رنگ ءَ جلّ اِت نہ کنت۔۔۔۔۔۔۔۔۔۔۔۔۔
روان اِنت۔۔۔۔۔
***
